Read Namrrik Lucas 8 Bible Online

Lucas 8 - Namrrik bible

Lucas 8

¹Yandø iig chab puraiben, Jesúsbe tru tabig srø wam Tius nø ashib karub wainuguigwan eshkab kusrenanøb pueblomerasrø yamera tsitsø pønrrabsrø uñibig køn, nui doce kusrenanøb pera uniiløba.

²Inchen katø mø ishumburmera køsrøn nø kwaimandziimeran webusriiløba, kwanrrømeran tamariiløba linchibelø køn. Inchen truilai utube tru siete kwaimandziimera webambinabig, María Magdalena køben,

³Herodeswei yau ya ashib tsubig Cuzai srai Joana køben, Susana køben, katøgan ishumburmera køben linchibelø køn. Iiløbe nømui chi tøgagúiløtøga Jesúswanba, nui kusrenanøb pera uniilanba purugubelø købig køn. Kan kwallibig mandø kwaligwan kemesra kusrenanøb

⁴Misag truba nørrø tulundzuna, chu puebloyuelø køben, Jesúswan itømaytø ashchab webamben, nøbe ‘øyeeg lataitøwein køn’ cha, kemesra waminchib trenchibig køn:

⁵—Kan kwallibiibe nui yellwan tsurøb kwallchab webyan cha. Incha tsurøb ibene, kanbalø yellbe mayu kørrøben, itøbunøben, illimera amrrua, man cha.

⁶Inchen katøganbaløbe srug trølyu kørra, kal-lappe, kal-labendø, pirø søig kømøwagurri mul-lan cha.

⁷Kan utu yellmerabe kalshau utu kørra, kal-laben, kalbe kanbalatø nørrørawa, chab tsibisan cha.

⁸Inchen kanbaløbe yell tab pirau kørra, nørrørawa, tabig misra, kan yellgurrindø trulzheelø ciengatig nigan— cha. Iigwan trenchabe, Jesúsbe truba mur waminchib trenchibig køn: —¡Møramig kalu pønsraibe, mør!— cha. Mandøgurri ‘iibe øyeelø latailø køn’ cha Jesús wamindig

⁹Inchen nui kusrenanøb pera uniiløbe: —¿Tru ‘øyeeg lataitøwein køn’ cha wamindiibe tappe, mandø køh?— cha payen,

¹⁰Jesúsbe trenchibig køn: —Tiusbe nø ashib karub wainug mu asiimíig tøgagúilan ñimun ashchai tranan cha. Trune katøganelane ‘øyeeg lataitøwein køn’ chib wamindiiløtøga eshkab waminchar cha,“nømbe ashippe ashendø, ashmøwa lataig kørrømisrøb;mørøppe mørendø, chigúi mørmøwa kørrømisrøb inchain” cha. ‘Iibe kan ellmarøbig lataitøwein køn’ cha wamincha pasrigwan Jesús tab eshkab

¹¹’Tru ‘øyeeg lataitøwein køn’ cha, kemesra wamindiibe øyeeg chibig køn cha: Tru yellbe Tiuswei wamwan eshkabig køben,

¹²tru may pulu kørrab yellmerabe, tru Tiuswei wamwan mørøbelan truilan eshkabig køn cha. Inchen nugwaimandziibe arruppa, nømui manrrau tru wam ellmarigwan kerran cha, nøm Tiuswan køreben, kaigyugurri wesrailø kømønrrai.

¹³Inchen srug trølyu kørrab yellbe tru Tiuswei wamwan møra, truba truba tab kui mørøb utabelan, truilan eshkabig køn cha. Inchendø truiløbe chi srølgar kua, maya yanagatiitø kørewa amøña, chigøben maig inchibelø køtashchab pubene, tarømisrøptinchibelø, truilø køn cha.

¹⁴Inchen tru kal shau utu kørrab yellbe tru wamindigwan mørøbelan eshkabig køn cha. Inchendø truiløbe nømui ambam maywan ambub køben, tru chine, chine menrra isubiibah, puamisrøg købiibah, chigurrimbunø marøb kasrag amøñinrrab treeg marøg købiibatø kasran cha. Incha tru ellmarigwane nørrørabashmøn cha.

¹⁵Inchen tru tab pirau kørrabiibe tru nømui manrrau purø tabig isub, trurrigu sølwan isub, Tiuswei wamwan møra, truigwan elachimø, tøgagua, melabig meløwa, ellmarig misrøbelan eshkabig køn cha. ‘Aceite lámpara lataitøwein køn’ cha, kemesra wamindig

¹⁶’Mugucha kan aceite lámparan piløgøppe, chitøgagøben kasrømøwei, kabe cama umbu pasrtrab kømøweim piløgøbelø køn cha. Treeg kømøtø, kerrubelan tør kønrrai, pala pasrøbelø køn cha.

¹⁷Inchawei chitøgucha søriibe søriitø kørrømisrmø, kenamisrtrun cha. Katø chigøben ashmønrrai kasra pasriibe, nebua asiimíig kørrømisrmøtø, tøryu webattrun cha.

¹⁸’Inchawei ñim mørigwane tab isua asha kuy cha. Kaguen tøgaigwane masken tranen, trune chigaigwane nui lamøtiig tøgagurmab isuigwanguen kerraig kønrrun— chibig køn, Jesúsbe. Jesúswei usrimba, nuneløba nun lab

¹⁹Inchen Jesúswei usrimba, nuneløba nø wainug pubendø, menrra nu misag pasrøwa, nuim pulugatig kemallchab kaima køben,

²⁰møikkøsrøn Jesúswan trencha eshkabig køn: —Ñui usrimba, ñui nuneløba wambig pønrran cha, ñun ashchab isua amrrua.—

²¹Inchene Jesúsbe løtappe trenchibig køn: —Tiuswei wamwan møra, trunun marøbeløbe, nai usri, nai nunelø køn— cha. Isig ichibigwanba, pi welarmeranba Jesús kønøbashmub

²²Kan kwaløm Jesús nui kusrenanøb pera uniiløba barcoyu kebyabe, trenchibig køn: —Pisu ambøgatøsrømay larraamun— cha. Inchabe ambubelø køn.

²³Incha larraambub ambub købene, Jesúsbe barcoyu kiptinchen, møimbe tru nu pisuyube isig ichibig purø trømbøig namab webarruben, pibe barcoyu michab mendøben, yandø ke asentanrraptiig inchibig køn.

²⁴Inchen Jesúswan kasrønanabe trenchibelø køn: —¡Kusrennøbig! ¡Kusrennøbig! ¡Nambe piu ke chab asentab meler!— cha. Inchen Jesúsbe kurra, isig ichibigwanba, pi welar trømbøig latøgushib kurrabelanba pasrambunrrai kandø wamabig køn. Inchen truiløbe pønrrambuben, yandø kerrigu wasrønzhig kørrømisrøbig køn.

²⁵Inchen Jesúsbe nui kusrenanøb pera uniilan trenchibig køn: —¿Ñimui isubigwan nainuutø pasra tøgagúigwane chinchigue?— cha. Inchen nømbe truba kwaariilø, kan øyeebe mandø kermab isub kangurrin kangurri trenchibelø køn: —¿Iibe mu kerah cha, isig ichibig lata, pi latøgushib kurrabig lata, nø pasrambungarubene, iiløguen nun mørtrappe?— Kan gadarasriig kwaimandzig tøgaig

²⁶Incha yandø gadarenosmeraim pirausrø larraambubelø køn, tru Galilea nu pisu ambøgatømaysrø.

²⁷Incha Jesús barcoyugurri pirau pinaiben latatø, tru puebloyuig kan møg kwaimandziimera tøgaig katønrrab webibig køn, truibe manasrøngurri chigucha kemøwei, yau tsumøwei inchibig, sørin trabmerayutø tsubig.

²⁸Incha Jesúswan ashippe, nui merrab mur trashib tømbasrøb peñabe, trenchibig køn: —¿Ñibe nane chi martrab inchigu cha, Jesús, Mayeelaim Pala Pasrabigwei Nusrkai? ¡Ñi nan purø trømbøig møra megamig kømønrrai marmørrunrrig!— chib.

²⁹Kaguende Jesúsbe tru trømbøig maringarub kwaimandzigwane: “Møweinukkurri webinrrø” chibguen indin køben nøbe trendaig køn, kaguende truigwane kwaimandziibe katø katø nø merrarrawa sruaig købig kua. Inchen chu imønrrai, misaamerabe tasiimeran srøbmeran cadenastøga lusra tøgagúingucha, nøbe cadenasmeran lurren, kwaimandziibe mu misag warab waraimøsrø ingarubig køn.

³⁰Inchen nune Jesúsbe payibig køn: —¿Chi munchi kugu?— cha. Inchen nøbe løtappe: —Nabe: “Legión”, munchi kur— chibig køn, kaguende tru møweinuube kwaimandziimera purø nu kebamba kua.

³¹Incha tru kwaimandziimerabe ‘tru purø trømbø umbu trabyumay ørmørrunrrig’ chib truba rugabelø køn, Jesúswane.

³²Inchen tru tunyube kuchimera truba nu søtø mab llirab amøñiben, tru kwaimandziimerabe ‘tru kuchimerayu kebambingarurra’ chiben, Jesúsbe ka kebambashibig køn.

³³Inchen kwaimandziimerabe møweinukkurri webamba, kuchimerayu kebambene, tru kuchi søtøbe truba trømbø lendeyu lula, chab pinøgørraptincha, pisuyu kegørra, pi keesra chab kwabelø køn.

³⁴Inchen tru kuchi ashibelø treeg purayaigwan ashabe, kwaariilø lula, puebloyu køben, wambig nøørøwansrøn køben eshkab ambubelø køn.

³⁵Inchen misaamerabe chi purayaigwan ashchab werrua, Jesús waisrø pubene, tru kwaimandzig tøga møg købiibe Jesúswei srøb pulu, yandø asru keweig ke yandø tabig wai ashibelø køn. Inchabe truba kørig kui inchibelø køn.

³⁶Inchen tru treeg purayaigwan ashibeløbe tru kwaimandzig tøga møwan Jesús mandø incha tamarigwan katøganelan eshkaben,

³⁷tru Gadara pirau maya misaamerabe Jesúswan nømuinukkurri ‘irra’ chib truba rugabelø køn, kaguende nømbe truba truba kørig kuilø kua. Inchen Jesúsbe barcoyu kebya ibig køn.

³⁸Inchen tru kwaimandziimera webambinab møøbe: —¿Ñui mendig arruah?— chib truba inchen, Jesúsbe trenchibig køn:

³⁹—Ñui yamay katø inrrø cha, ñun Tius chigøben yeeg nørriig mariilan kerriguh eshkanrrab.— Inchen tru møøbe, Jesús nun øyeeg nørreelø marigwan kerrigu eshkab ibig køn tru pueblo ørøba. Kan ishuwei kwanrrøwan Jesús tamarøb

⁴⁰Incha katø Jesús pisu ambøgatøsrømay larraibene, mayeeløba munig kuig køppe, misaabe nune truba kasrag utabelø køn.

⁴¹Inchen kan møg judíosmera tulundzuni yau chi maramigwan ashibig, Jairo taig, puabe, Jesúswei katsig pulu tømbønsra, nui yamay tiusmanda arrubsrumugu chibig køn,

⁴²kaguende nui kandø nimbasr doce añosig tøgagúibe ke kwanrrab inchib tsuben. Inchen Jesús ibene, nu misag søtøbe nui mendig trag marøb ambubelø køn.

⁴³Inchen tru ututø kan ishug doce años ørøba ani ib kwanrrø tøgaig kua, nui chi tøgagúigwan kerrigu patsøgøben, mugucha tamartrab kaimaig købig køn.

⁴⁴Tru ishuube Jesúswan wendaugurri kemallippa, Jesús nø kewagúig urøzhigwandø katørabene, tru urastø tru ani ibiibe pasramisrøptinchibig køn.

⁴⁵Inchen Jesúsbe trenchibig køn: —¿Nane mu katørah?— cha. Inchen mayeeløba: “Ñune mu katøramer” chiben, Pedrobe trenchibig køn: —Kusrennøbig, misag søtøbe ñun yeeg tinmarøb ambumay imay trawagutsan— cha.

⁴⁶Inchen Jesúsbe trenchibig køn: —Møikkøben nan katørainrrun cha. Kaguende nai maramburab marig nainukkurri webrain kui mørar— cha.

⁴⁷Inchen ishuube nø treeg marigwan chi søramgaig kuin kui ashabe, itønab arrua, Jesúswei merrab tømbønsrøb srala, maya misagwei merrab chindimba katøraigwanba, katø tru urastø mandø tabig kørrømisrigwanba eshkabene,

⁴⁸Jesúsbe trenchibig køn: —Nimbasr, ñui isubigwan nainuutø pasra tøgagúikkurri tamarig kørrømisran cha. Chi isumø, inrrø— cha. Jairoi nimbasrwan Jesús øsiiranøb

⁴⁹Inchen Jesús waminchib pasramnetø, tru judíosmera tulundzuni yau ashib karubigwei yaugurri møikkøsrøn puabe, unai møskawane trenchibig køn: —Ñui nimbasrbe kwabguen indan cha. Kusrennøbigwan mas chi chimøta— cha.

⁵⁰Inchen Jesúsbe mørabe trenchibig køn: —Kørig kui inchimøtø, køreptø køreu cha, ñui nimbasrbe tammisrtrun— cha.

⁵¹Incha yau puabe, Jesúsbe mungucha kerrubashmøtø Pedronbah, Jacobonbah, Juanwanbah unai møskalanbatø kerrubashibig køn.

⁵²Inchen mayeeløba unan isub waminchib truba kishib køben, Jesúsbe trenchibig køn: —Kishmøtay cha, unøbe kwaig kømøtø, ka kiptø tsun— cha.

⁵³Inchen nømbe kwain tsui asha kua, Jesúswane ka indzatø mørøbelø køn.

⁵⁴Inchen unan Jesúsbe tasigu kemøra, mur wamab trenchibig køn: —Ishug-unø, ¡kurrø!— cha.

⁵⁵Inchen espíritube katø nuinug puben, øsiirawa tru urastø kurraptinchen, Jesúsbe manrrai manningarubig køn.

⁵⁶Inchen møskaløbe ke kwaara asha kørrømisren, Jesúsbe chi purayaigwan nømune mungucha eshkamønrrain karubig køn.