Read Namrrik Lucas 9 Bible Online

Lucas 9 - Namrrik bible

Lucas 9

¹Jesús nui doce kusrenanøb pera uniilan wama, tulundzunabe, mayan kwaimandziimeran wambig webusrøb, kwanrrømeran tamarøb inchai, maramburab maramigwanba, mu chindamgaig karumigwanba tranøbig køn.

²Incha Tius nø ashib karub wainuguigwan eshkab kusrenanrraimba, kwanrreelan tamartraimba karua ørabe,

³nømune trenchibig køn: —Mayuweimbe chigøben srua ammønrrigay cha. Pøtønain tsig srua ammøwei, wasr ila ammøwei, pirri srua ammøwei, an srua ammøwei, turingucha pagatø kømø, kandø kewa ambay cha.

⁴Chugøben puebloyu yau puppe, webamba ambamnegatig truyutø kørrømisrtrigay cha.

⁵Inchen ñimun wamab utag kømui indinuube, trube, tru puebloyugurri webamrrappe, ñimui srøbyu usrøwan chishtø kørrøgønrrigay cha. Treeg marøppe, trube ‘ñim kaasig købene, møimbe ñim kusrenrrigay’ chib eshkab.—

⁶Inchen nømbe webamba, pueblomørig puraambub ambuppe, Tiuswei tabig srø wamwan eshkab kusrenanøb, chutøgucha kwanrreelan tamarøb ambubelø køn. Jesúswan Herodes mu kuinguen mørmub

⁷Inchen Galilea pirau ashib karub wabig Herodesbe Jesúsweimburab wamindi mørøb nø chi mariilan kerrigu wammørabe, chi isum kuinguen mørmíig køn, kaguen møiløgøsrøn: “Juan Bautista kwailai utugurri katø kurriinrrun” chiben.

⁸Inchen kan utueløbe: “Tius maig karuigwan eshkabig Elías kenamisrin køn” chiben, kan utueløbe: “Tius maig karuigwan eshkabig merrabsriig møikkøben katø øsiirain køn” chiben, inchibelø køn.

⁹Inchen Herodesbe trenchibig køn: —Juanwane natøwei turwan paringaruig køn cha. ¿Trube, chigøben na yeeg wamindig wammøriiløbe mu kønrrab køh?— cha. Incha Herodesbe Jesúswan ashig kui inchibig køn. Trattrø mil møguelan Jesús mamig tranøb

¹⁰Jesús nøashib karua øriilø katø amrruabe, nøm chi marigwan nun eshkaben, nømune Jesúsbe Betsaida pueblosrømay nømundø nøørø pera ibig køn.

¹¹Inchendø tru nu misag søtøbe wammørøppe, wendautø amben, Jesúsbe tabig wamab uta, nømun Tius nø ashib karub wainuguigwan waminchib, kwanrrøwan tamaramig palai melabelane tamarøb inchibig køn.

¹²Inchen yandø mawab misrøb arruben, nui doce kusrenanøb pera uniiløbe Jesúswan kemallabe, trenchibelø køn: —Misaameran yandø amrrai, ungwa chi cha, puluwandø yamera pønrrabsrøn køben, chugøben nøørøsrøn køben, ya peba kørrømisrtrappa, mamig penønrrappa amrrain cha. Kaguende yube nambe mugucha warømønug pønrrer— cha.

¹³Inchene Jesúsbe trenchiptinchibig køn: —Manrrai ñim mannay— cha. Inchen nømbe trenchibelø køn: —Nambe trattrøgatø pirrimbah pagatø peskaubatø tøgaguer cha. Ya nu misagweimbe srøig penønrrab ambatøwein kønrrun— cha.

¹⁴Kaguende møgueløtø trattrø milburab købig køn. Inchen Jesúsbe nui doce kusrenanøb pera uniilan trenchibig køn: —Kan søtø, cincuentabatø, cincuentabatø purramisringaruy— cha.

¹⁵Inchen treeg maren, misaabe mayeeløba chab purramisrøbelø køn.

¹⁶Inchen Jesúsbe tru trattrøgatø pirriwanba, pagatø peskaumeranba nui tasku muta, srømbalaneb neesha, Tiuswan ‘mayanguen pay’ cha, pirrimeran pirishabe, nui kusrenanøb pera uniilan misagwan pirishinrrai tranøbig køn.

¹⁷Inchen mayeeløba øska ma kørrømisren, pitis undailan tasinmerayu netsøbatø doce tulishibelø køn. Pedrobe Jesúswan: “Cristo køn” chib

¹⁸Kan kwaløm Jesús nøørøsrø Tius Møskaimba waminchib wabene, nui kusrenanøb pera uniiløbe nøba purrøben, Jesúsbe trencha payibig køn: —¿Misaamerabe nane mu køn tah?— cha.

¹⁹Inchen nømbe trencha løtabelø køn: —Møiløbe: “Juan Bautista køn” chiben, møiløbe: “Elías køn” chiben, møiløbe: “Tius maig karuigwan kan eshkabig merrabsriig katø øsiirainrrun” chiben indan— cha.

²⁰Inchen Jesúsbe trencha payibig køn: —¿Trune ñimbe nane mu køn chinrrague?— cha. Inchene Pedrobe trencha løtabig køn: —Ñibe Tiuswei tru Cristo køn— cha. Jesús nø kwamigwan eshkab

²¹Inchen Jesúsbe iigwane mungøben eshkamønrrain karubig køn.

²²Inchabe trenchibig køn: —Møg Misra Arrubiibe chinetø kaig indinab megamig nebunrrun cha. Katø misagwan karubelø kølli misaamera køben, sacerdotemeran karubelø køben, Moisés pørigwan kusrenanøbelø køben nune kaasig kømig kønrrab køn cha. Incha kweechen, pøn kwalømyube kusraig kønrrun— chibig køn.

²³Incha mayeelan trenchibig køn: —Møikkøben nai mendig uñig købene, nøasiitø nuimburabigwangøba isumøtø, kwalømmørig nui kuruswan muta, nai mendig arrum nebunrrun cha.

²⁴Inchen møikkøben øsig kømigwangøba esegabiibe yandø pinab pinamig nebunrrun cha. Inchen nagurrindø kwabiibe managatig øsig kømigwan esegawa tøgagønrrun cha.

²⁵¿Kan møg yu pirau chine købigwan kerrigu nuindø maringucha, nøasiitø minchib, nøasiitø pinamigwei marøb indiibe, chiwein kui tabig kønrrab kø?

²⁶Pøs møikkøben naimburappa, na wamindiilaimburappa kørig isub kørig kui inchibigwane, nune kørig purørtrun chibig køn, tru Møg Misra Arrubig tru nui tørguegwalmabiiba, nui Møskawei tørguegwalmabiiba, Tiusweindø tarømari ángelesmerai tør pilabiiba arrua.

²⁷Nabe ñimun cierton trendamønrrun chibig køn: Møiløgøben yu purrabelø Tius nø ashib karub pasraigwan ashmøwatøbe kwanrraamøn— cha. Jesús ke peemayig misrøb

²⁸Øyeeg taig trune wendau køsrøn Jesúsbe Pedronba, Juanwanba, Santiagonba pera, kan tun palasrø Tius Møskaimba waminchab nebibig køn.

²⁹Inchen Jesúsbe Tiusba waminchib pasramnetø, nui maløbe ke peg lataig misrøptinchen, nui kewagúiløbe truba puløzhig tørgwalmabelø misrøbig køn.

³⁰Inchen møimbe pailø møguelø nøba waminchib kenamisrøptinchibelø køn. Truiløbe Moisésba, Elíasba,

³¹nømbe tørguegwalmabig pinøgasrailø, Jesús Jerusalénsrø mandø kaig indinab megawa, kwamigwan waminchib pønrrabelø køn.

³²Inchen Pedroba, nui linchibeløba kigøbiitø ke chindamdø kuim purrøwagucha, kimø kasrig ka purrøwa, Jesúswei tørguegwalmabigwanba, tru pagatø møguelø nøba pønrrabelanba ashibelø køn.

³³Inchen tru møguelø yandø Jesúsweim pulugurri tarømisra ambene, Pedrobe nøtøwei chi chib pasrarmabguen mørmubendø, trenchibig køn: —Kusrennøbig, ¡nam yu pønrramibe purø tab køtan! cha. Pøngatø ya-ureg margun cha, kan ñui, kan Moiséswei, kan Elíaswei.—

³⁴Inchen tru waminchib pasramnetø kan wañi arrua, nømun kasrøben, nømbe wañi umbu kørrømisra, Pedroba, Juanba, Santiagobabe truba truba kørig kui inchibelø køn.

³⁵Inchen wañi umbugurrimbe kan wam trenchibig køn: —Iibe nai Nusrkai, nai lawa wesruig køn cha. Nune møray— cha.

³⁶Tru wambe yandø mas mørø waminchimuptinchen, Jesúsbe katø nøtø pasrai ashibelø køn. Incha nømbe tru chi asigwane tru kwalømmerawane mungucha maizhikken mørø waminchimeelø køn. Jesús kan kwaimandzig tøga unan tamarøb

³⁷Katø kwaløm tunbalasrøngurri kørrørrubene, Jesúswan katønrrab truba nu misag werruben,

³⁸møimbe kan møg tru misaamerai utugurri truba mur wamab trenchibig køn: —Au, Kusrennøbig, kabe tiusmanda nai nusrkawan ashibsrumuguh cha, nai kandø nusrkain køn cha.

³⁹Nune kwaimandziibe merrarraben, nøbe møi møin trashibig køn cha. Inchen kwaimandziibe pirausrø kucha, itønangarub, triimay chall kutsingarub, purø trømbøig lastimaig marøb, ¡katø! elachimøsraatø inchibig køn cha.

⁴⁰Inchen ñui kusrenanøb pera uniilan kwaimandzigwan webusrtrai na rugaben, kaiman— cha.

⁴¹Inchen Jesúsbe trenchibig køn: —¡Kan ñim møi misaamera kørenrrab inchimeelø larrø kailø! cha, ¿Nabe managatig ñimba unamig kønrrerah cha, ñimun øyeeg ashiptø? Ñui nusrkawan yu srua amø— chibig køn.

⁴²Inchen unøbe kemallib iben, kwaimandziibe unan pirausrø kucha, sruaguchen, Jesúsbe trømbøig maringarub kwaimandzigwan nama, webingarua, unane tamara, møskawan tranøbig køn.

⁴³Inchen Tiuswei purø nuig tabigwan mayeeløba kwaara ashibelø køn. Jesús nø kwamigwan katø eshkab

⁴⁴—Pesannanrrab kømø, iigwan tab møray cha, tru Møg Misra Arrubigwane møguelai tasku tranig kønrrabigwan.—

⁴⁵Inchen nømun øyeeg taigwane nømbe chi tainguen mørmeelø køn, kaguende Tius chigúinguen mørmønrrai indiilø kua. Incha nø øyeeg taigwan chi chibig kø cha payamibe nømbe kørig kui inchibelø køn. Mas nuibe mu kerah

⁴⁶Inchen nui kusrenanøb pera uniiløbe nømui utu nømbe møig mas nuig kønrraptiig kuin kui waminchib payiyab mendabelø køn.

⁴⁷Inchen nøm chi isub purraigwan Jesúsbe wetøbeña, kan unan srua ya, nuim pulu pasrabe,

⁴⁸trenchibig køn: —Møikkøben i unan nai munchiyu tab wamab utabiibe, nan utan cha. Inchen nan utabiibe, nan karua ørøbigwangucha utan cha. Inchawei ñimui utu mas chigucha kømíig lataig kui asiibe, truibe si, mas nuig køn— chibig køn. Namun maig købash inchimíibe namuingatø pasran

⁴⁹Inchene Juanbe trenchibig køn: —Kusrennøbig, kan møikkøsrøn ñui munchiyu kwaimandziimeran webusri aser cha. Inchendø namba uñmíig købene, nambe truigwane merer— cha.

⁵⁰Inchen Jesúsbe nun løtappe trenchibig køn: —Merømøtay cha. Kaguende ñimun namig kurrømíibe ñimuingatiig køn— cha. Jesús Jacobonba, Juanwanba namab

⁵¹Yandø Jesús srømbalasrø utig kømig lutau køben, Jerusalénmay ke punrrab isua ib menda,

⁵²eshkanrrabelø wam sruar merrab øren, nømbe Samaria pirau kan pueblosrø chigøben nuyasig tamartrab ambene,

⁵³samaritanosmerabe Jesúswane utømeelø køn, kaguende nøbe Jerusalénsrømay inrrab arri asha.

⁵⁴Inchen nui kusrenanøb pera uniilø Jacoboba, Juanba øyeeg indi ashabe, trenchibelø køn: —¿Señor, nømun pinishinrrab srømbalasrøngurri nam nag kørraarringaruah cha, Tius maig karuigwan eshkab møg Elías latawei?—

⁵⁵Inchen Jesúsbe nømun keesha ashabe, namabig køn.

⁵⁶Incha katøganbalø yamera tsitsø pønrrabsrømay ambubelø køn. Jesúswei mendig ambamibe murig køn

⁵⁷Nøm maywan ambub købene, kan møg Jesúswan trenchibig køn: —Señor, ñi chu ibendø, nabe mendig arrumønrrun— cha.

⁵⁸Inchen Jesúsbe trencha løtabig køn: —Zorramerabe waramig trabmera tøgar køben, katø pala amøñib illimeragucha nømui lemera tøgar køn cha. Trune na, Møg Misra Arrubiibe ni nai turwan chu nerrarramikken chigaig kur— cha.

⁵⁹Incha Jesúsbe katøganun trenchibig køn: —Nai mendig amø— cha. Inchen nøbe: —Señor, nai møskawan sørønrrabmerrig ibashcha— chiben,

⁶⁰Jesúsbe trenchibig køn: —Ñibe nai wendautø amø cha. Tiusweimburabigu kwaig latailøbe nømui kwailan sørøbash cha. Inchen ñibe ya, Tius nø ashib karub wainuguigwan katøganelan eshkab kusrenan— cha.

⁶¹Inchen katøgangucha trenchibig køn: —Señor, ñui mendig arrug køtan cha. Inchendø nai yauelanmerrig ungwa chinrrab ibashcha— cha.

⁶²Inchen Jesúsbe trencha løtabig køn: —Mutøgucha arauwan kemøra arab pasrøbendø, wendømaygøba keeshibiibe, Tius nø ashib karub wainuguigwane chi tab martrabgaig køn— cha.