Read Namrrik Juan 1 Bible Online

Juan 1 - Namrrik bible

Juan 1

¹Chigucha kaabenbatø tru Wambe manawei pasrabguen inchibig køn. Tru Wambe Tiusba pasrøben, katø tru Wambe Tius købig køn.

²Tru Wambe srøsrøgurri Tiusba pasrabig købig køn.

³Tiusbe chiwandøgucha marøppe, tru Wamgurriwei marig køn. Inchen chitøgucha Tius mariilø pønrrabiibe, tru Wamgurrin kømíibe chigucha mariilø kaagøn.

⁴Øsig kømibe nuinug pasrøben, tru øsig kømig pasrabiibe mayeelayasig tør købig køn.

⁵Inchen tru tørbe løstøyu piløben, tru tørwane løstiibe chinchaguen kasrønrrab kaimaig køn.

⁶Kan møg købig køn, Tius karua ørig, truibe Juan taig,

⁷tru maig kuigwan waminchabig. Nøbe tru tørweimburab maig kuigwan waminchen, nøgurri mayeeløba kørenrrai.

⁸Juanbe nøashib tru tør kømøtø, tru tørweimburab maig kuigwan ka waminchaptø arrig købig køn.

⁹Tru tør ciertonig maya misagwan pilabiibe yu pirau kebarrub arrubig køn.

¹⁰Inchen truibe yu pirau pasrøben, katø Tiusbe pirøwan truikkurri marig kuindøgucha, pirau misaamerabe nune mu kuinguen ashmuig købig køn.

¹¹Trendø nuinuumay nøbe arrubendø, nui misaamerabe utømøtø, kaasig køn.

¹²Trune mutøgucha nun kashmø, utab, nui munchiyu kørebelane Tiuswei ureg misra pønrramig kønrrai tranig køn.

¹³Truiløbe yu pirau maig kal-labelø køben treeg kal-lawar kømøwei, ureg tøgagug køben tøgagúig ureg latailø kømøwei, katø møwei isuig maig køben, trumay kømøtø, Tiusweinug kal-lawar køn.

¹⁴Tru Wambe kan møg misra, namui utu unig købig køn. Inchen nambe tru nui tørguegwalmabigwan tab asig købig køn, tru Møskaweinukkurri arrubig Kandø Nusrkawei ka yandø tab indiiba, ciertoniibatø netsigwan.

¹⁵Juan truigweimburab maig kuigwan eshkappe, trenchib waminchibig køn: —Iig køn cha, tru na øyah taig købiibe, nai wendau arrubiibe, na lataguen kømø, nøbe purø nuig køn cha, kaguende naguen kømøwatø, nømerrig købig kua.—

¹⁶Kaguende tru chigucha palømíig nui tab indigugurri nambe mayeeløba tru ka tab indigwane srøig, srøig itø uter.

¹⁷Tru maig maramigwan martrai pørigwane Moiséskurri tranig købig køn. Inchen tru ka yandø tab indiiba, newan ciertoniibabe Jesucristogurri arrig køn.

¹⁸Tiuswane mugucha managuen ashmuinrrun. Inchendø nui Kandø Nusrkai Tius, managucha Møskaweim pulu trag lincha pasrabig, truig namun kenamaran, Tiuswan ashibelø kønrrai. Juan Bautista Jesucristoimburab waminchib

¹⁹Iig køn, tru Jesúsweimburab maig kuigwan Judíosmeran Juan eshkaig. Judíosmerabe Jerusalénsrøngurri sacerdotesmeranba, levitasmeranba karua ørøbelø køn, Juanwan: “¿Ñibe mu kugu?” cha payrrab.

²⁰Inchen Juanbe sørømø, maig kuigwan eshkab, masken maig kuigwan kelarrab eshkaig køn. —Nabe Cristo kømur— chib.

²¹Inchen nømbe katøle payibelø køn: —Trube, ¿mu kugu? cha. ¿Kabe Tius maig karuigwan tru eshkabig Elíasteh?— cha. Inchen Juanbe: —Tru kømur— chibene, nømbe payibig payibelø køn: —Trube ñigan, ¿Tius maig karuigwan tru eshkabig køtirru?— cha. Inchen nøbe: —Kah— chibig køn.

²²Inchen: —Trube, ¿mu kugu? chibelø køn. Kaguende nambe tru namun karua ørøbelan eshkamig køn cha. Trube, ¿ñuimburappe, ñibe mu kur chinrragu?— cha.

²³Inchen nøbe trenchibig køn: —Kan wam mu misag warab waraimønug trenchib trashibig, truig kur cha: “Señorwei maywan ølgandø kuray” chib, tru Tius maig karuigwan eshkabig Isaías maig taig, treekke.—

²⁴Inchen tru Juanwan payrrai karua ørøbeløbe fariseosmera købelø køn.

²⁵Tru karua øriiløbe trenchib payibelø køn: —Trube, ¿misagwan chindimba piu umbu ulsrøbig kugu cha, Cristo kømøwei, Elías kømøwei, Tius maig karuigwan tru eshkabig kømøwein købendøbe?—

²⁶Inchene Juanbe trencha løtabig køn: —Nabe pitøga pi pinøbulrrai ulsrøbig kur cha. Inchendø ñimui utube, ñim asiimíig, kan mugøsrøn pasran cha,

²⁷tru nai wendau attrabig. Nabe trunune nui alpargatisyu tsiwanguen pichib pasramig truburab kømuinatan— cha.

²⁸Øyeelø kerrigu pureppe, Betaniasrøn purayaig køn, Jordán pi ambøgatøsrø, tru Juan misagwan piu umbu ulsrøb uniisrø. Jesús, tru Tiuswei Ubisha-unø

²⁹Indiibe katø kwaløm Juanbe Jesús nuim pulumay pub arri ashabe, trenchibig køn: —Asay cha, iibe Tiuswei tru Ubisha-unø pirauelø kaig mariilan kerranrrabig køn cha.

³⁰Iig køn, chibig køn, tru na øyah taig: “Nai wendau attrab møøbe na lataguen kømø, mas nuig køn cha. Kaguende naguen kømøwatø, nøbe manawei købig kuig køn” cha.

³¹Natøweinguen nabe nune mu kui ashmíig kuig køn cha. Inchendø Israel misaameran mu kui nebua ashchai kenamartrab, misagwan piyu ulsrøb arrur— cha.

³²Katø Juanbe maig kuigwan trenchib eshkabig køn: —Nabe Espíritu Santon kan paloma lataig srømbalasrøngurri kørraarrua, nuim pala pasramisri ashar cha.

³³Inchen nabe katøgucha nune mu kui ashmuig køn cha. Inchen misaameran pitøga pinøbulrrai piu ulsrønrrai nan Karua Ørøbiibe trendaig købig køn cha: “Tru ñi ashen Espíritu Santo nuim pala kørraarrua, pasramisrinabig, truig kønrrun cha, Espíritu Santotøga pinøbulrrabiibe.”

³⁴Inchen nabe yandø trunun nai kaptøga asha, truibe Tiuswei Nusrkain kui nabe eshkabig kur— chibig køn Juanbe. Jesúswei kusrenanøb pera uniilø srøsreelø

³⁵Katø kwaløm Juanbe tru nui mendig amøñibelø parba katøle truyu pasrøwabe,

³⁶Jesús pureb pasrai ashabe, Juanbe trenchibig køn: —Au, asay cha, øibe Tiuswei tru Ubisha-unø køn— cha.

³⁷Inchen tru Juanwei pailø mendig amøñibeløbe tru trendaigwan mørabe, Jesúswei mendig ambubelø køn.

³⁸Inchen Jesúsbe keesha asha, nui mendig amrrui ashabe, trenchibig køn: —¿Chi lague?— cha. Inchen nømbe trenchibelø køn: —¿Kusrennøbig, chu wabig kugu?— cha.

³⁹Inchene Jesúsbe trenchiptinchibig køn: —Ashchab amrruy— cha. Inchen nømbe amba, chu wabig kui ashabe, tru kwalømbe truyu nøba kørrømisrøbelø køn, kaguende yandø las cuatro lutau køben.

⁴⁰Tru pailø Juan wamindigwan mørøbelø Jesúswei mendig ambubeløbe, kane Simón Pedroi nuneg Andrés købig køn.

⁴¹Incha Andrésbe nuneg Simónwanmerrig lanrrab ya, wetørrawabe, trenchibig køn: —Nambe si, Mesíaswan wetørrer— cha, (Mesías chippe, Cristo taig).

⁴²Incha Andrésbe Simónwan Jesúsweisrømay pera iben, Jesúsbe Simónwan ashabe, trenchibig køn: —Ñibe Simón køn cha, Juanwei nusrkai. Inchendø møimbe yandø Cefas taig kønrrun— cha, (trenchippe, Pedro cha wamig). Felipenba, Natanaelwanba Jesús wamab

⁴³Katø kwaløm Jesúsbe Galilea pirausrømay inrrab isua, Felipen wetørrawabe, trenchibig køn: —Nai mendig attra— cha.

⁴⁴Tru Felipebe Betsaida pueblosriig købig køn, tru Andrésba, Pedroba waraisriig.

⁴⁵Inchen Felipebe Natanaelwan lanrrab yabe, trenchibig køn: —Tru maig maramigwan martrai Moisés pøriguba, katø Tius maig karuigwan eshkabelø pøriguba, truiløyu nuimburab pørig pasrab møwan nambe wetørrer cha. Truibe Nazaret puebloyu Joséwei nusrkai, Jesús køn— cha.

⁴⁶Inchen Natanaelbe trenchibig køn: —¿Nazaretkurringan chi tappaig webattraitarru?— cha. Inchen Felipebe trenchibig køn: —Trube, ashchab amø pøs— cha.

⁴⁷Inchen Jesúsbe Natanael kemallib arri ashabe, trenchibig køn: —Øibe si, isa kømø, israelita kui asamdiig køn cha. Nuinuube treeg kønmab ashchaindø indiibe chigaig køn— cha.

⁴⁸Inchene Natanaelbe trencha payibig køn: —¿Nane treeg kuimbe mandø incha ashku?— cha. Inchene Jesúsbe trenchibig køn: —Felipeguen ñun wamømøwatø, ñi higuera tusr umbusrø wabenwei nabe ñun asig køn— cha.

⁴⁹Inchen Natanaelbe trenchibig køn: —Kusrennøbig, ñibe Tiuswei Nusrkai, Israel misagwei Rey køn— cha.

⁵⁰Inchene Jesúsbe trenchibig køn: —¿Na ñun: “Higuera tusr umbusrø waben ashar” cha, na trendaimba, ñigan nan køretirru? cha. Øyeetø kømø, purø nørreeløguen ñibe ashchabguen— cha.

⁵¹Incha katø Jesúsbe trenchibig køn: —Pøs nabe ñimun isa kømø, cierton trendamønrrun cha: Srømbalabe kurim pasrøben, Tiuswei ángelesmerabe Møg Misra Arrubigweinukkurri nebambub, katø nuimay kørrørrub, inchib køben ñimbe ashchabguen— cha.