Read Namrrik Juan 12 Bible Online

Juan 12 - Namrrik bible

Juan 12

¹Pascua Fiesta maramig trunewei pa kwaløm paløbenba Jesúsbe Betaniasrømay ibig køn, tru kwabelai utugurri nø øsiirangaruig møg, Lázaro tsuisrømay.

²Truyube Jesúswan tab inchab kan mamig tamara nena, Martabe pirishiben, Jesúsba mishatsigu purrabelai utu Lázarogucha wabig køn.

³Inchene Maríabe purø may irrabzhig nardotøzhig marig libraburab srua arrubig køn, truibe truba nuweyig. Incha nøbe Jesúswei katsig tambalyu itølushabe, nui pusruutøga pinømørøbig køn. Inchen tru may irrabzhiitø ya ørø kebig køn.

⁴Inchen Judas Iscariote, Jesús kusrenanøb pera uniilai utuig, tru Jesúswan wendø nun ashig kømui inchibelan trannrrabiibe trenchibig køn:

⁵—¿Waachameran purugumig i may irrabzhigwan kan trescientos denarioswei yanamdiig kømø, chindah?— cha.

⁶Inchendø Judasbe waachameran isubig kua kømøtø, niliig kua, trendaig køn. Katøgucha nømui anwane nø esegab srua uñibig kua, truyu pusrigwan wesrubrre inchibig køn.

⁷Inchene Jesúsbe trenchibig køn: —Ka marbash cha. Nan søram kwalømwei esegawa tøgagúin køn cha.

⁸Waachamerane chu uragucha ñimui utube tøgagønrrun cha. Trune nane ñimui utube ñimbe chu uragucha tøgagønrraamøn— cha. Lázaron kwetchab inchib

⁹Truba nu søtø judíosmera Jesús Betaniasrø unan taig wammørøppe, trusrømay ambubelø køn, nun ashchab isuatø kømøtø, tru kwailai utugurri nø øsiiranig Lázaron ashchappa.

¹⁰Inchene sacerdotesmeran karubeløbe Lázarongucha kwetchab wamincha kørrømisrøbelø køn,

¹¹kaguende Lázarogurrindø judíosmerabe truba nu tarømisra, Jesúswan køreben. Jesús Jerusalénsrø kebib

¹²Indiibe katø kwaløm Jesús Jerusalénmay attrab køn taig wammørøppe, misaamera tru fiestayumay purø nu søtø amrrua pasrabiibe,

¹³palma ishiimeran muta, Jesúswan trenchib trashib katønrrab webambubelø køn:“¡Hosanna! chib.¡Señor Tiuswei munchiyu nø ørig arrubiibe,tru Israel misagwei Rey, mayanguen tab kuig køn!” chib.

¹⁴Jesúsbe kan burro-unøzhig pasrain køben, trunun itøguana ibig køn, Tiuswei wamyu maig pørig køben treekke:

¹⁵“Jerusalén, kørig kui inchimøta cha. Asay cha, ñimui Reybe kan burra lluig burro-unøyu itøguana attrun” taig.

¹⁶Srøbatøbe Jesúswei kusrenanøb pera uniiløbe øyeeg mariilane chi chibig kuinguen ashmeelø køn. Inchen yandø Jesúswan purø nuig, purø tabig mara kusruben, truyu wetøgørrabelø køn, tru øyeeg pørig pønrrabiibe, nuimburab pørig pønrrøwa, nun tru øyeeg mariilan eshkabig kuin kui.

¹⁷Tru Lázaro kwaben sørig truyu waben, tru misaamera Jesúsba pønrrabelø købeløbe nøm maig asigwan eshkab waminchibelø køn.

¹⁸Inchagurri tru nu misag søtøgucha Tius nøba pasrain kui asamig i tru marigwan wammørabe, Jesúswan katønrrab webambubelø køn.

¹⁹Inchene fariseosmerabe kangurrin kangurri trenchibelø køn: —Au, chiguen maramgaig køn cha. Ñimguen asay cha. Maya misaabe kerriguba nui wendautø chab amban— cha. Møiløgøsrøn griegosmera Jesúswan lab

²⁰Misaamera Jerusalén fiestasrø Tiuswan køriibala tabig waminchab nebambubelai utu truyu møiløgøsrøn griegosmeragucha tøgagøbig køn.

²¹Incha truiløbe tru Felipe Galilea pirau betsaidasriigwan kemallabe, trenchibelø køn: —Kasuku, namune Jesúswan ke asinrrabna køtan— cha.

²²Inchen Felipebe ya, Andréswan eshkaben, nømbe pailøba Jesúswan eshkanrrab ambene,

²³Jesúsbe trenchibig køn: —Møg Misra Arrubigweyasig purø nuig, purø tabigwan kenamaramig yandø uta pun cha.

²⁴Nabe ñimun isa kømø, cierton trendamønrrun cha: Kan tirigu trulma pirau peña kwamøwabe, chu uragucha kan truldø kønrrun cha. Trune pirau peña kwawabe si, truba nu larrøbichib misran cha.

²⁵Møikkøben nui øsig kømigwan undaguibe yandø pinab pinamig nebunrrun cha. Trune møikkøben yu pirau nui øsig kømigwan tsalø inchibiibe, managatig øsig kømigweyasig esegawa tøgagønrrun cha.

²⁶Inchen møikkøben naiwan marøb megabiibe, nai mendig arrumig køn cha. Incha na chu pasrøben, nai mendig megabikkucha truyutøwei pasrønrrun cha. Møikkøben naiwan marøb megabigwane nai Møskaimbe nune truba tab inchun chibig køn. Jesús nui kwamigwan eshkab

²⁷’Møimbe nane manrrau isubiitø purø trømbøig køtan chibig køn. ¿Nabe mandø chinrrab køh? cha: “¿Nai Møskai, nan øyeeg trømbøig møi pumønrrai purømisrtra” chinrrab kø, chindah? cha. Treeg kømøtø, nabe øyeeg punrrabigu pasrønrrabwei arrur cha.

²⁸Nai Møskai, ñui munchiwan maya nuguen tabig kønrrai mar— cha, trenchibig køn. Inchene srømbalasrøngurri kan wam mørø, trenchibig køn: —Nabe nai munchiwan yandø maya nuguen tabig kønrrai marar cha. Katøyukken maya nuguen tabig kønrrai maramønrrun— cha.

²⁹Inchen misag truyu mørøb purrabeløbe trenchibelø køn: —Kan palaig trashitan— cha. Inchen kaneløbe trenchibelø køn: —Nune kan ángel wamindinrrun— cha.

³⁰Inchen Jesúsbe trenchibig køn: —I wam mørø wamindiibe, nayasig kømøtø, ñimuyasig køn cha.

³¹Møin køn chibig køn, yu pirau maig kønrrabigwan asha maramig. Katø møin køn, chibig køn, yu pirau nø karub pasrabig, Satanáswan wambig wegutsamig.

³²Incha nabe piraugurri kusruig kua, mayeelø naimay amrrug kui inchai maramønrrun— chibig køn.

³³Øyamay Jesúsbe mandø kwamigwan eshkabig køn.

³⁴Inchen misaabe nune trenchibelø køn: —Tru maig maramigwan martrai pøriiløyube trenchibig køn taig nambe mørøbelø ker cha: “Cristobe managatig wanrrabig køn” cha. Inchen ¿ñibe mandø chigu cha: “Tru Møg Misra Arrubiibe kusruig kømig nebunrrun” chippe? ¿Tru Møg Misra Arrubiibe mu køh?— cha.

³⁵Inchene Jesúsbe nømun trenchibig køn: —Katøgucha kan maya yanatø tørbe ñimui utu pasrønrrun cha. Tør tøgagøppatø tøryu amønay cha, løstiig ñimun ke ka inchib latatø merrarramønrraimbe, kaguende løstøyu uñibiibe chumay ib pasrarmabguen ashmøn cha.

³⁶Ñim tru tørwan tøgagøppatø, tørwan kørey, chibig køn, tørwei ureemera kønrrappe.— Øyeelan chab trenchabe, Jesúsbe tarømisra, nømuinukkurri trubabig køn. Judíosmera Jesúswan tru Cristo kømuitamab køremub

³⁷Yeeg nørreelø chigøben Tius nøba pasrain kui asha kømig mariilø nømui merrab Jesúsbe kenamaringucha, nune køremeelø køn.

³⁸Kaguende Isaías, tru Tius maig karuigwan eshkab møg øyah chib pørig nebunrrain kuig køn:“Señor Tius, ¿namui eshkaigwane mu køreitarru? cha. ¿Señor Tiusbe nui maramburab maramigwan mun kenamarah?” cha.

³⁹Inchawei nømbe treeg kuitamappe køremeelø køn. Kaguende Isaíasbe trencha pørig købig køn:

⁴⁰“Tiusbe nømun kabmeran ashmeelø kønrrai marøb, katø nømui manrrømeran murelø kønrrai marøb indig køn cha,kaptøga chigúi ashmøwei,nømui manrrøtøga chigúinguen mørmøwei inchain cha, nøm nuimay llirawa amrruben, tamariilø kømønrrain” chib.

⁴¹Isaías øyah chippe, Jesúswei tørguegwalmabigwan nøbe asha kua, nuimburab treeg wamindig købig køn.

⁴²Treeg kuingucha tru utu ashib karubeløguen nun truba nu kørebelø køn. Inchendø nømbe fariseosmeran kørig køptø nøm kørewa pønrrain kui ashchai mayeelai merrappe chi kenamarmeelø køn, tru judíosmera tulundzuni yaugurri webusriilø kømønrrab.

⁴³Kaguende nømbe misaamera maya nuguen tab indiilø kømigwan chullelø købig køn, Tius maya nuguen tab indig kømigwan kømøtø. Jesús wamindiibe misagwan maig kønrrabigwan asha mara kørrømarøb

⁴⁴Inchen Jesúsbe truba mur waminchib trenchibig køn: —Møikkøben nan kørebiibe nan køremøtø, nai Møskai nan karua ørøbigwan køren cha.

⁴⁵Inchen nan ashibiibe, nan karua ørøbigwan asan cha.

⁴⁶Nabe arruppe, yu piraumay kan tør lataig arrig køn chibig køn, mutøgucha nan kørebiibe løstøyu kørrømisra pasrømønrrai.

⁴⁷Inchen møikkøben nai wamwan mørendø, maig taigwan møra marmíigwane, nun maig maramigwane na asha marmur cha. Kaguende nabe yu pirauelan maig maramigwan na asha mara kørrømartrab arrumøtø, misagwan kaigyugurri wesranrrab arrig køn cha.

⁴⁸Inchen møikkøben nan kaashib, na wamindigwan mørmub inchibiibe, maig kønrrabigwan asha kørrømartrabig chabguen nøbe tøgaguen pasran cha. Tru na nun wamindi wamdøwei tru srabe kwalømbe nun maig kønrrabigwan asha mara kørrømartrun cha.

⁴⁹Kaguende nabe waminchippe, naimburaptø waminchimøtø, Møskai nan karua ørøbig chi tamigwan chiwan wamindamigwan nane nø karuig køn cha.

⁵⁰Incha tru nø martrai karua pasriibe managatig øsig kømig, treeg kui, nabe ashar cha. Inchawei na waminchippe, nai Møskai nan maig wamindingaruigwan nabe treeg waminchar— cha, trenchibig køn Jesúsbe.