Read Namrrik Juan 13 Bible Online

Juan 13 - Namrrik bible

Juan 13

¹Yandø tru Pascua Fiesta pumig kan kwalømdø paløben, yandø yu piraugurri Møskaweisrømay yamig puin kui Jesúsbe ashibig køn. Yu pirau amøñibelan nuielane chu uragucha nøbe undaarabig kua, møimbe øyeeg newan srabegatig undaaraig køn.

²Inchen mab purramnetø nugwaimandziibe Simónwei nusrkai, Judas Iscariotei manrraube, Jesúswan ashig kømui inchibelan trannrrai isungarubig køn.

³Inchen Jesúsbe chiwandøgucha nø asha martrai Møskaimbe nui tasku pønsrain kui ashib, katø nøbe Tiusweinukkurri webarrua arrua, katø Tiusweimaytøwei yamig kui ashib inchibig køn.

⁴Incha Jesúsbe mab wainukkurri kurra pasramisrøb, pala kewa pasraigwan wesrawa, kan toallan nemøra, pørønawa,

⁵trugurrimbe kan paila-unøyu pi usrøb, nui kusrenanøb pera uniilan srøbmeran kwalla, nui pørønawa pasraig toallatøga pinømørøbig køn.

⁶Incha tru Simón Pedron srøbwan kwallchab inchene, nøbe trenchibig køn: —¿Señor, ñigan nan nai srøbmeran kwallchaindirru?— cha.

⁷Inchene Jesúsbe trencha løtabig køn: —Na møi marøb waigwane ñibe chigúinguen ashmøn cha. Inchendø tsøndasrømbe chigúi ashchun— cha.

⁸Inchen Pedrobe trenchibig køn: —Nan kuimbe, managuen ñibe nai srøbmerane kwallchaamøn— cha. Inchene Jesúsbe trenchibig køn: —Na ñui srøbmeran kwallmubene, ñibe nainuube chi asamig tøgagømønrrabguen— cha.

⁹Inchen Simón Pedrobe trenchibig køn: —Señor, trube, treeg købene, srøbwandø kwallmøtø, tasigwan kinøsrøb, turwan chishtø pirtra— cha.

¹⁰Inchene Jesúsbe trenchibig køn: —Chab piraibe srøbwandøwein kwalamig palan cha. Kaguende asr ørøba chishtø køn cha. Ñimbe yandø chishelø køn cha, søteeløbabe treetø kømuingucha.—

¹¹Nun tru ashig kømui inchibelan trannrrabiibe nøbe manawei mu kui asha kua: “Søteeløbabe chishelø kømøn” cha trendaig køn.

¹²Yandø Jesúsbe nømui srøbmeran chab kwalla, nui pala kewagúigwan katøle kewa, mishatsigu wamisrabe, trenchibig køn: —¿Na ñimun øyeeg marigwan ñimbe chigúi mørgueh? cha.

¹³Ñimbe nane: “Kusrennøbig” cha wamamba, katø: “Señor” cha wamamba indan cha, trumaybe sølwein tan cha. Kaguen nabe treegwein kur cha.

¹⁴Pøs na Señor, na Kusrennøbikken ñimui srøbmeran kwallene, ñimgucha kangurrin kangurri srøbmeran kwalamig køn cha.

¹⁵Nabe ñim asha kusrenrrai mara pasrar cha, na mari lataitøwei ñimgucha martrai.

¹⁶Pøs nabe ñimun isa kømø, cierton trendamønrrun cha: Kan mendig megabiibe nun martrai karubigwan purab nuig kømøn cha. Katø kan karua øriinabiibe tru karua ørøbigwan purab nuig kømøn cha.

¹⁷Ñim iilan chigúi asha, treegwan marabe, mayanguen tab kuilø køn cha.

¹⁸’Nabe ñimun øyeeg waminchippe, søteelanbabe øyeeg chimur cha. Kaguende møilan na lawa wesruilø kui nabe asha pasrar cha. Inchendø, Tiuswei wamwan pørigu øyeeg pasrabig nebunrrain køn cha: “Tru naba lincha mab wabiibe nan srøb kusrawa eshkan” taig.

¹⁹Inchawei nabe møingurri nabe ñimun eshkar cha, øyeeg puraimøwatø, øyeeg puraibene, tru Nabe Na kuin kui kørenrrai.

²⁰Pøs nabe ñimun isa kømø, cierton trendamønrrun: Na karua ørigwan tab wamab utabiibe nan utan cha. Inchen nan utabiibe nan karua ørøbigwan utan— chibig køn Jesúsbe. Judas ashig kømui inchibelaingatø pasramisrtrab køn cha, Jesús eshkab

²¹Jesúsbe iilan chab trenchabe, nune chindamguengaig isuben, maig kuigwan kelarrab eshkab trenchibig køn: —Nabe ñimun isa kømø, cierton trendamønrrun cha: Ñim møikkøsrøn nan ashig kømui inchibelaingatø misra, nan trannrrab køn— cha.

²²Inchen nui kusrenanøb pera uniiløbe mun waminchib waig mørmøwa, nømbe kangurrin kangurri malau asiyabelø køn.

²³Inchen møikkøsrøn nui kusrenanøb pera unig mas undaaraibe Jesúsweim pulu mab wabene,

²⁴Simón Pedrobe mun waminchib wain kui pay chib, señas marøbig køn.

²⁵Inchen tru pulu wabiibe pechoyu kemenda, Jesúswan payibig køn: —Señor, ¿møig kerah?— cha.

²⁶Inchene Jesúsbe trenchibig køn: —Na pirrim pitin kebisha, møigwan tranen, truig kønrrun— cha. Incha pirrim pitin kebisha, Simón Iscariotei nusrkai Judaswan tranøbig køn.

²⁷Inchen Judas pirriwan utøben latatø, Satanásbe nui manrrau kebiben, Jesúsbe trenchiptinchibig køn: —Tru ñi marøb pasraigwane petø mar— cha.

²⁸Inchen mishatsigu mab purrabeløbe chindimba trendermab møikkucha chi tainguen mørmeelø køn.

²⁹Katøgucha Judasbe anwan nø esegawa sruaig købene, møiløbe treeg isubelø køn: “Jesúsbe fiestayuwei chi palabigwan penøtah, kabe waachameran maitøguen tranø” ta, chindermab.

³⁰Inchen yandø Judasbe pirriwan utaptø webiben, yandø yem købig køn. Kan srøig martrai karua pasrig

³¹Inchen yandø Judas webiben, Jesúsbe trenchibig køn: —Møimbe tru Møg Misra Arrubiibe maya nuguen tabig indig kønrrai maren, Tiusbe nuinug maya nuguen tabig indig kønrrai maran cha.

³²Tiusma Cristoinug maya nuguen tabig marig kuig køppe, Tius nøgurringucha Nusrkawane nuinuutøwei maya nuguen tabig martrun cha. Tru purø nuig tabig kønrrai maramigwane petø martrun chibig køn.

³³Nai ureezheelø, yandø ñimbabe maya yanatø unamønrrun cha. Ñimbe nane lanrrun cha. Inchendø na judíosmeran trendaig købigwandøwei møimbe ñimun trendamønrrun cha: “Na yamsrømay ibene, ñimbe amrrunrrab kaimanrrun” cha.

³⁴Nabe ñimune kan srøig martrai karua pasrar cha: kangurrin kangurri undaarayamig. Na ñimunma mandø undaaraibe, treetøwei ñimgucha kangurrin kangurri undaaramig køn cha.

³⁵Ñim kangurrin kangurri undaguelø købene, maya misaamera ñimune nai kusrenanøb pera uniilø kui ashchun— chibig køn. Pedron Jesúsbe nan ashmíig kur chinrrautan chib

³⁶Inchen Simón Pedrobe Jesúswan trencha payibig køn: —Señor, ¿Chumay inrrainchigu?— cha. Inchene Jesúsbe trenchibig køn: —Na yamsrømay ibene, ñibe nai mendig attraamøn cha møimbe. Inchendø tsøndatøsrømbe si, attrabguen— cha.

³⁷Inchene Pedrobe trencha løtabig køn: —Señor, ¿møimbe nabe chindimba arrumønrrain køh? cha. Nabe ñuimburab nai øsig kuigwan trannrraptøweim pasrar— cha.

³⁸Inchene Jesúsbe trenchiptinchibig køn: —¿Ñigan isa kømø, naimburab ke kwanrraptø pasrar chitirru? cha. Pøs nabe isa kømø, cierton trendamønrrun cha: Kallu wamømøwatø, ñibe pønmayguen nan ‘ashmíig kur’ chinrrautan cha.