Read Namrrik Juan 16 Bible Online

Juan 16 - Namrrik bible

Juan 16

¹’Nabe ñimun iilan waminchippe, ñimui isubigwan nainuutø pasra pønrraigwan ni chindinguen mørmøwa pønrrømønrrai waminchar cha.

²Ñimune judíosmera tulundzuni yamerayugurri webetab inchun cha. Inchen møikkøben ñimun kweechabe, truibe ‘Tiusweyasig tabig mararmab’ inchib pasramig, treekkatikken punrrab køn cha.

³Ñimun øyeeg marøppe, Møskawan lata, nan lata ashmeelø kuarre, treeg martrun cha.

⁴Na ñimun iilan eshkappe, yandø tru øyeelø pubene, ñimbe manawei na tru eshkaigwane isua pønrrønrrai eshkar chibig køn, Jesúsbe. Espíritu Santoi chigøben maramelø ’Inchendø øyeelane nabe ñimun srøsrøgurri eshkamuig købig køn cha, kaguende nabe ñimba unig kua.

⁵Incha møimbe nan karua ørøbigweisrømay na inrraindingucha, ñimbe møikkucha nane paymøtan cha: “¿Chumay inrrainchigu?” cha.

⁶Na iilan ñimun trenchib eshkabene, ñimui manrrøbe purø isui indan cha.

⁷Inchendø nabe ñimun isa kømø, cierton trendamønrrun cha: Na yamibe ñimuimbe mas tabguen køn cha. Kaguende na imubene, tru chi isumønrrai Purømisrøb Lincha Pasrønrrabiibe ñimba pasrønrrab arrumønrrun cha. Inchen na yabe, ñimuyasig nun øramønrrun cha.

⁸Inchen nø arruppe, yu pirau misaamerane tru kaig mariibe chi købig kuin kui ashchai tørgandø kenamarøb, misagwan Tiusba sølgandø mandø pønrramigwan kenamarøb, natøwei kaig mara pasraibe chu pasrig kømigwan kenamarøb inchun chibig køn:

⁹Tru kaig marigwan kenamarøppe, nan køremuikkurrin køben,

¹⁰misagwan Tiusba sølgandø mandø pønrramigwan kenamarøppe, nabe Møskaweisrømay iben, ñimbe nan mas ashmønrrab kuikkurrin køben,

¹¹natøwei kaig mara pasraigwan tru chu pasrig kømigwan kenamariibe, tru Satanás, yu pirau nø karubigwan, nune chu pasramigwan pasrønrrai kørrømara pasrabguen indikkurrin køn cha.

¹²’Nabe ñimune chigøben eshkamig katøgucha truba truba tøgagøbendø, ñimbe møimbatøbe trengatig nebua chigúi mørtrab kaimanrrun cha.

¹³Inchen tru Espíritu newan ciertonig arruppe, truibe kerriguwan ciertonigumay ñimune pera inrrun cha. Kaguende nøbe ka nuimburaptø waminchimøtø, nø maig mørigwan kerrigu waminchib, katø chigøben maig pub attrabigwan ñimune eshkanrrun cha.

¹⁴Nøbe nane maya nuguen tabig kønrrai martrun cha. Kaguende nøbe naiwan uta, ñimun maig kuigwan asha kønrrai kenamartrun cha.

¹⁵Chitøgucha nai Møskai tøgagúibe nain køn cha. Inchawei nabe trendaig køn, Espíritube naimburabigwan uta, ñimun maig kuigwan asha kønrrai kenamartrun cha. Isuig melaibe katølebe kasrag købig misrtrun

¹⁶’Maya yanayutø ñimbe nane yandø ashchaamøn cha. Inchendø katø yana kømøwatø ñimbe nane katø ashchun cha. Kaguende nabe nai Møskai waisrømay inrrainchar— cha.

¹⁷Inchen møiløgøsrøn nui kusrenanøb pera uniiløbe nømdø kangurrin kangurri payibelø køn: —¿Øyeeg chippe, mandø terah? cha: “Maya yanayutø ñimbe nane yandø ashmønrrun chib; katø yana kømøwatø ñimbe nane katø ashchun chib. Kaguende nabe nai Møskai waisrømay inrrainchar” chib.

¹⁸“Maya yanayutø” chippe, ¿mandø chibrreendah? cha. Nøbe ni chi waminchib pasrainguen mørmer— chibelø køn.

¹⁹Inchene Jesúsbe trunun payig køb inchib kui mørabe, trenchibig køn: —¿Ñimgan na ñimun øyeeg taigwanrre payib køtirru? cha, tru: “Maya yanayutø ñimbe nane ashchaamøn” taigwan: “Yana kømøwatø ñimbe nane katø ashchun” taigwan.

²⁰Pøs nabe ñimun isa kømø, cierton trendamønrrun cha: Ñimbe isuig wamamøra kishib kømnebe, yu piraueløbe kasraaranrrun cha. Ñimbe truba isuig kullaaraig melønrrun cha. Inchendø tru isuig kullaaraig melaibe katølebe kasrag købig misrtrun cha.

²¹Kan ishuuma tammisrtrappe, truba pusrkwai inchib kullaaran cha, kaguende yandø tru tammisramig ura puben. Inchen yandø unø kal-labene, kasrag købiitø tru treeg pusrkwaigwane isubguen inchimøn cha, kaguende kan srø misaazhig yu pirau kal-laben.

²²Inchawei ñimgucha møimbe øyeetøwei isub kullaaran cha. Inchendø katøle na ñimun ashene, ñimui manrrøbe truba truba kasraaranrrun cha, kasrag købigwan kan muguen kerramgaikke.

²³’Tru kwalømbe ñimbe nane yandø chigucha paymønrrun cha. Nabe ñimun isa kømø, cierton trendamønrrun cha: Ñim chiwandøgucha nai Møskawan miappe, nai munchiyu miabene, nøbe ñimune tranrrun cha.

²⁴Møingatig ñimbe nai Møskawan nai munchiyube chigucha miamuig køn cha. Miay, chibig køn, utønrrabguen cha, ñimui kasrag købigwan chigucha palømíig newanig kønrraimbe. Jesucristobe yu pirau kaig puingucha, treegu puraya pasramisrøb

²⁵’Nabe ñimun iilan waminchippe, iibe øyeelø latailø køn chib, kemesratø wamindig køn cha. Inchendø øyeelø latailø køn chib kemesra waminchimumig punrrun cha, nai Møskaweimburabigwan tørgandø kelarrab wamindamig.

²⁶Tru kwalømbe ñimbe nai munchiyu Tiuswan mianrrigay cha, pøs nabe ñimuyasig Møskawan miamønrrun chimur.

²⁷Pøs Møskai nøashib ñimune undaaran cha, kaguende ñimbe nan undaarab, katø nabe Møskaweinukkurri webarrua arrig kui køreb indikkurrimba.

²⁸Nabe nai Møskaweinukkurri webarrua, yu piraumay arrig køn cha. Incha møimbe katøle yu piraugurri, nai Møskaweimay yamønrrun— chibig køn.

²⁹Inchen nui kusrenanøb pera uniiløbe trenchibelø køn: —Møimbeguende ñibe chigøben ‘iibe øyeeg latailø køn’ chib, ka kemesratø waminchimøtø, tørgandø kelarrab wamindan cha.

³⁰Ñibe chiwandøgucha newan ashibig kuin kui møimbeguende nambe aser cha. Mugøben ñune chi paya ashib pønrramikken palømøn cha. Øyeekkurriwei, ñibe Tiusweinukkurri arrubig kuin kui kørewa pønrrer— chibelø køn.

³¹Inchene Jesúsbe trencha løtabig køn: —¿Møimbesi køregueh? cha.

³²Pøs øyeeg punrrab kuig yandø møiwei pubguen indan cha, ñimbe nøørøtø, kan kan chab tarømisra, nane yandø nandø kørrømara ambamig. Inchendø nabe natø pasrømur cha, kaguende nai Møskaimbe naba pasrøben.

³³Øyeelan nabe ñimun waminchar cha, naba kanbalatø pønrrøwabe, chi isumø purø tab pønrramigwan tøgagønrrai. Yu piraube chigøben isumdiig puig melønrrabguen cha. Treeg kuindøgucha kullaaramø, mur isua pønrrønrrigay cha. Nama yu pirau chine kaigwan kanawa pasrar— cha, trenchibig køn Jesúsbe.