Read Namrrik Juan 3 Bible Online

Juan 3 - Namrrik bible

Juan 3

¹Kan fariseo Nicodemo taig købig køn, judíosmerai utu nø karub møg.

²Truibe Jesúsweimay yem ashchab arruabe, trenchibig køn: —Kusrennøbig, ñibe kusrenanøbig Tiusweinukkurri arruaig kui asha ker cha. Kaguende mugucha Tius maramburab mariilan asha kønrrai martrab kaiman cha, ñi mari lataibe, Tius nøba pasrømubene.—

³Inchene Jesúsbe løtappe trenchibig køn: —Nabe ñun isa kømø, cierton trendamønrrun cha: Katøyug srøig kal-lamíibe Tius nø ashib karub waisriigwan ashchab kaimanrrun— cha.

⁴Inchen Nicodemobe payibig køn: —¿Kan møg yandø kølig misra, katøyuube mandø incha kal-layasamø? cha. ¿Kabe katøyug usrai patsau kebinrrautah cha, katøyug kal-lanrrab?—

⁵Inchene Jesúsbe trenchibig køn: —Nabe ñun isa kømø, cierton trendamønrrun cha: Pigurrimba, Espíritu Santogurrimba kal-lamíibe Tius nø ashib karub wainug kebinrrab kaimanrrun cha.

⁶Møskaløgurrin kal-labiibe, misag maig køben treetøwein køn cha. Inchen Espíritu Santogurrin kal-labiibe, espíritu maig køben treetøwein køn cha.

⁷“Mayeelø katøyug srøig kal-lamig køn” cha, na trendaigwan, kan treebe maig kermab isub kwaara ashmøta chibig køn.

⁸Isig ichibiima muba køben itsan cha, wanrrimbe mørendø, chugurri arri mørmuwei, ni muba yai mørmuwei indan cha. Øyeetøwein køn chibig køn, mayeeløba Espíritu Santogurrin kal-labeløbe.—

⁹Inchene Nicodemobe katøyug payibig køn: —¿Treebe maig kønrrab køh?— cha.

¹⁰Inchene Jesúsbe trenchibig køn: —¿Ñi Israel misaamerai utu kusrennøb møg købendø, ñigan øyeelan chigúi mørmíig køtirru? cha.

¹¹Nabe ñune isa kømø, cierton trendamønrrun cha: Nambe maig kui asha waminchib, katø namashib namui kaptøga asigwan waminchen, nam eshkaigwan ñim utømøn cha.

¹²Na yu pirau chine pønrrabelan waminchen, ñim trununguen køremuibe, trube ¿srømbalasrøn pønrrabelan waminchene, chincha kørenrrague? cha.

¹³’Srømbalasrømaybe mugucha nebimuben, tru srømbalasrøngurri kørraarrubig, tru Møg Misra Arrubiitøwei nebyan cha.

¹⁴’Moisésma mu misag warab waraimønug tsandzøn ulwan tsigu mesra kusruibe, øyeetøwei tru Møg Misra Arrubigwangucha mesra kusraig kømig palønrrab køn cha.

¹⁵Mutøgucha nun kørebiibe tru managatig øsig kømigwan tøgagønrrai. Tiuswei undag købig maya misagweyasig

¹⁶’Tiusbe yu pirau misagwan truba truba isua undag køptø, nui kandø Nusrkawanguen tranig køn cha, møikkøben nun kørebiibe kaigyu kebeña pinab pinømøtø, masken managatig øsig kømigwan tøgagønrrain cha.

¹⁷Kaguende Tiusbe nui Nusrkawan yu piraumay ørøppe, yu pirau misagwan kaigyu pønrrønrrai pønsrønrrab kømøtø, masken nøgurri yu pirau misaameran kaigyugurri wesranrrai ørig køn cha.

¹⁸’Tiuswei Nusrkawan kørebigwane kaigyu pasrønrrai pasrimíig køben, trune nui Nusrkawan køremíigwane manaweinguen kaigyu pasrønrrai pasrikken køn cha, kaguende Tiuswei kandø Nusrkawei munchiwan køremuikkurri.

¹⁹Inchen tru kaigyu pønrrønrrai pønsrøppe, treekkurrin køn cha: tru tørbe piraumay arruben, misaamerabe tørwan kømø, løstiigwangøba undaarabelø køn cha, kaguen nømui mariiløbe tabig kømø, kailø kuikkurri.

²⁰Mutøgucha kaig marøbiibe tørwane ashig kømub, tsalø kuinchib, tøryumaybe kemallmøn cha, nømui kaig mariilø kenamisrtraitamab kørig køptø.

²¹Inchen møikkøben tru ciertonig maig køben, treeg uñibiibe tøryumay kemalan cha, nui mariiløbe Tius maig kønrrain køben treeg mariilø kuin kui tørgandø kenamisrtrai.— Juan Bautista katøyug Jesúsweimburab waminchib

²²Tru øyeelø chab puraiben, Jesúsbe nui kusrenanøb pera uniiløba Judea pirausrømay ya, truyu maya yana køsrøn nømba misagwan piu umbu ulsrøb uñibig køn.

²³Inchen Juangucha treetøwei marøb uñibig køn, Enon taisrø, Salim pulu, kaguende truyube truba pi køben. Misaamerabe nørrø amrrua, piu umbu ulsrailø købig køn.

²⁴Øyeeg pureppe, Juanwan kailan keeri yau pasrmøwatø kuig køn.

²⁵Inchen møiløgøsrøn Juanwei mendig amøñibeløbe kan judíoba payiyab aleguiyab mendabelø køn, tru kaig marigwan chish maramig køn taigweimburab.

²⁶Inchabe Juanweimay amrruabe, trenchibelø køn: —Kusrennøbig, tru møg Jordán pi ambøgatømaysrø ñiba uñibig, tru ñi namun wamindi møøbe, møimbe misaameran piu umbu ulsrøb uñen, mayeeløba nuimaygøba amban— cha.

²⁷Inchene Juanbe trenchibig køn: —Mugucha chi utønrrab kaimanrrun cha, srømbalasrøngurri tranmubene.

²⁸Na øyeeg taigwane pøs ñimdøweinguen mørar køn: “Nabe Cristo kømøtø, nui merrab attrai karua ørig kur” taigwan.

²⁹Tru srai misrtrabigwan pera pasrabiibe keg misrtrabig truig pera pasran cha. Inchen tru keg misrtrabigwei trendø trag linchibiibe truyu mørøb pasrøwa, nui wamwan mørabe, truba truba kasraaran cha. Pøs øyeetøwei, nai kasrag købiibe møimbe neig køn cha.

³⁰Nøbe purø nuig misrøb yamigwein køben, trune nabe chigucha kømíig misrøb yamig køn— cha. Palagurri arrubiibe mayeelaim pala pasran

³¹Palagurri arrubiibe kerrigu mayeelaim pala pasran. Inchen piraugurri arrubiibe, pirauig kua, waminchippe, pirauigwan wamindan. Inchen srømbalasrøngurri arrubiibe kerrigu mayeelaim pala pasran.

³²Incha nøbe tru maig asigwan, maig mørigwan treeg køn chib waminchene, tru nø treeg køn taigwane mugucha utag kømui indan.

³³Inchen møikkøben tru nø trendaigwan utabiibe, Tiusbe ciertonig køn cha, treeg kørrømara pasran.

³⁴Kaguende Tius karua øriibe Tiuswei wamwan wamindan, pøs Tiusbe nui Espíritun tøgagømburab tøgagønrrai tranøbig kua.

³⁵Møskaimbe Nusrkawane undaguig kua, chiwandøgucha nø ashchai nui tasku pønsraig køn.

³⁶Nusrkawan kørebiibe, managatig øsig kømigwan tøgagønrrun. Trune Nusrkawan kaashibiibe srøig øsig kømigwan ashmønrrun. Inchen Tiuswei purø trømbøig namig købiibe nuim pala pasran.