Read Namrrik Juan 4 Bible Online

Juan 4 - Namrrik bible

Juan 4

¹Fariseosmerabe wammørin købig køn Jesúsbe Juan lataguen kømø, mendig amøñibelø mas tøgagømba, piu umbu ulsrailø mas tøgagømba indin kui.

²(Inchendø piu umbu ulsrøppe, Jesús nøashib kømøtø, nui kusrenanøb pera uniilø marøbelø køn.)

³Treeg wammøra kuin kui Jesúsbe trunun wammøra, Judea piraugurri webibig køn, katø Galilea pirausrømay inrrab.

⁴Incha nø pureb yamibe Samaria pirauwan pureb yamig nebunrrab købig køn.

⁵Treekkurri Samariasrø kan Sicar taig puebloyu pubig køn, merrabsrø Jacob nui nusrkai Joséwan tranig pirø pulu.

⁶Truyube kan pisu, “Jacobwein køn” taig waben, Jesúsbe muraaraig arrua, tru pisu pulu wamisrøbig køn, yandø kwaløm tøbøtag misrøb køben.

⁷Inchen kan ishug samariasriibe pi wesrunrrab arruben, Jesúsbe trenchiptinchibig køn: —Nan pi srøttra— cha.

⁸(Pøs nui kusrenanøb pera uniiløbe mamig penønrrab pueblosrømay ambin køben.)

⁹Inchene tru ishug samariasriig løtappe, trenchibig køn: —Ñibe judío købendø, na ya samariasriigwan: “Pi srøttra” taibe— cha. (Kaguende judíosmerabe samaritanosmerababe linchimeelø købig køn.)

¹⁰Inchene Jesúsbe trenchibig køn: —Tius tranamigwan ñi nebua ashib, katø tru: “Pi srøttra” chibigwan ñi mu kui ashib indimbe, ñibe nun miabsruinrrun cha. Inchen managuen kølømø piwan srørrøbsruinrrun— cha.

¹¹Inchene ishuube trenchibig køn: —Au, kasuku, ñibe piwan chitøga wesramig chigaig wan cha. Katø pisube purø umbu wan cha. ¿Trube, ñibe tru kølømø piwane chugurri wesranrragu? cha.

¹²¿Tru merrabsrø namui kølli misag Jacob, nø muchib, nui ureemera muchib, nui animalmera muchib indim piwan namun keta kørrømarøbig lataguen kømø, kabe ñigan mas nuig køtirru?— cha.

¹³Inchene Jesúsbe trencha løtabig køn: —Møikkøben i piwan muchibiibe katøyug pimulgwai inchun cha.

¹⁴Trune tru na tranim piwan muchibiibe managuen pimulgwai inchimønrrun cha. Kaguende tru na tranim pibe nuinuube kan pigab pørsrab weguchib lataig kønrrun cha, tru managatig øsig kømigweyasig.—

¹⁵Inchene ishuube trenchibig køn: —Trube, kasuku, tru piwan srøttra cha, nagucha pimulgwai mørmøwei, katø mas yusrø wesranrrab arrumøwei inchab— cha.

¹⁶Inchene Jesúsbe trenchibig køn: —Ñui kewan wamønrrab ya, katø amø— cha.

¹⁷Inchen ishuube trenchibig køn: —Nabe kekkaig kur— cha. Inchene Jesúsbe trenchiptinchibig køn: —“Kekkaig kur” chippe, ñibe sølwein tan cha.

¹⁸Kaguende ñibe trattrøgatø kelø tøgaig købig køn cha. Inchen møi ya tøgagúibe ñui keg kømøn cha. Isømø, ñibe sølwein tan— cha.

¹⁹Iigwan mørøppe, ishuube trenchibig køn: —Au, kasuku, ñibe Tius maig karuigwan eshkabig treeg møg kømmørgø cha.

²⁰Namui merrabsreelø samaritanosmerabe i tunyu Tiuswan køriibala tabig waminchibelø køben, trune ñim judíosmerabe Tiuswan Jerusalénsrø treeg martrab ambamig køn chibelø køn— cha.

²¹Inchene Jesúsbe trencha løtabig køn: —Ñiguen ishug, iigwan kørerra cha. Møskawan køriibala tabig waminchib maramig ura punrrab kui, i tunyu amrrua kømøwei, kabe Jerusalénsrø amba kømøweingue.

²²Ñim samaritanomerabe chigúi ashmubendø køriibala tabig waminchibelø køn cha. Inchen nambe køriibala tabig waminchippe, chigúi asha marøbelø ker cha. Kaguende kaigyugurri wesraig kømibe judíosmerai misagugurri arrubig køn cha.

²³Pøs treeg maram kwalømbe punrrun cha; Inchen truibe møiweinguen pubguen indan cha, tru cierton køriibala tabig waminchibelø Møskawan køriibala tabig wamindamig espíritutøga, cierton isua. Pøs Møskaimbe køriibala tabig waminchibelø øyamay marøbelan lan cha.

²⁴Tiusbe Espíritu køben, køriibala tabig waminchibeløbe, espíritutøga, cierton isua wamindamig køn— cha.

²⁵Inchen ishuube trenchibig køn: —Mesías attrab kui, nabe asha kur cha (tru Cristo taig). Truig arruppe, namune maig kuigwan kerriguba tørgandø eshkanrrun— cha.

²⁶Inchene Jesúsbe trenchiptinchibig køn: —Truibe nawein kur cha, tru ñiba waminchib wabig.— Jesús kusrenanøb pera uniilø katø nuimay amrrub

²⁷Inchen waminchib pasramnetø nui kusrenanøb pera uniiløbe katø amrruabe, truba kwaarøbelø køn, Jesús kan ishuuba waminchib pasrain kui ashippe. Inchendø nømbe møikkucha chigucha payrrab inchimeelø køn: “¿Chi palai inchigu?” cha. Kabe: “¿Nøbabe chi waminchigu?” cha.

²⁸Inchene ishuube nui pi mutingøtsøn pasrøb, pueblosrømay ya, misagwan trenchib eshkabig køn:

²⁹—Kan møwan ashchab amrruy cha. Na maig mariilan kerriguh eshkatan cha. ¿Inchippa Cristo køppeendi?— chib.

³⁰Inchen puebloyueløbe webamba, Jesúsweisrømay ambubelø køn.

³¹Trunetø nui kusrenanøb pera uniiløbe Jesúswan truba inchib trenchibelø køn: —Kusrennøbig, maytøguen manrraurren— cha.

³²Inchen nøbe trenchibig køn: —Nabe mamig tøgagur cha, ñim asiimíig.—

³³Inchen nui kusrenanøb pera uniiløbe nømasiitø trenchibelø køn: —¿Mugøben kabe mamig srua amrrua srørra chindah?— cha.

³⁴Inchen Jesúsbe trenchibig køn: —Nai mamibe, tru nan Karua Ørøbig maig kønrrain køben, trunun marøb, katø nui maramigwan patsamnegatig marøb indamig, truig køn cha.

³⁵Ñimbe trenchibelø kømøtirru chibig køn: “Tirigun paramibe pib pøl palan” cha. Trune nabe ñimun trendamønrrun cha: ¡Ñimguen kabwan larrøbicha tab asay cha, ellmarig warabelan! Kaguende yandø chab øskøraikken waran cha, paramdø palabelø.

³⁶Parøb, tulishib megabiibe tru parøb megaimburø pagaraig an uta, tru ellmarig misrigwane managatig øsig kømigweyasig tulisan cha, tru tsurøb ellmarøbig lata, parøb tulishibig lata kanguetøtø kasrag purramig kønrrai.

³⁷Kaguende misaamera øyan chippe, sølwein tan cha: “Kane tsurøb ellmaren, katøgane parøb tulisan” cha.

³⁸Nabe ñimune parøb tulishinrrai ørar cha, ñim chigucha chi mariimønug. Murig maramigwan marøb kwallibeløbe kanelø køben, truilø kwaligwane ñim tulishinrrab pønrramisrin køn— cha, trenchibig køn Jesúsbe.

³⁹Samaria puebloyu warabelø truba yamelø Jesúswan kørebelø køn, maig kuigwan tru ishug eshkaikkurri: “Na maig marig købigwan kerriguh eshkatan” chib.

⁴⁰Inchen samariasreeløbe amrruabe, Jesúswan nømba kørrømisr chib truba rugaben, truyu nøbe pa kwaløm nømba kørrømisrøbig køn.

⁴¹Inchen nø wamindigwan mørabe, masken yamelø kørebelø køn.

⁴²Inchabe ishuwane trenchibelø køn: —Møimbe ñi trendaigwan trunun ka møratø kørewa pønrrømøtø, møimbe yandø nambe namashib nun møra, isa kømø, i møøbe yu pirau misagwan Kaigyugurri Wesrabig kuin kui aser— cha. Kan kusreb møwei nusrkawan Jesús kwanrrøwan tamarøb

⁴³Tru pa kwaløm puraiben Jesúsbe Samariagurri Galilea pirausrømay ibig køn,

⁴⁴kaguende Jesús nøtøweinguen trendaig købig køn: “Tius maig karuigwan eshkab møwane nuim piraueløtøweimbe chi tab indimíig køn” cha.

⁴⁵Incha Galilea pubene, truyueløbe truba tab utabelø køn, kaguende Jerusalén Pascua Fiestayu nømgucha amønaig kua, Jesús tru chine mariilan nømbe ashagurri.

⁴⁶Incha Jesúsbe Galilea pirau Canásrømay katø arrubig køn, tru piwan vino kønrrai mariisrømay. Inchen truyube reyweyasig marøb wab møøbe nui nusrkawan kwanrrø trarra købig køn, Capernaumsrø.

⁴⁷Inchen tru møøbe Jesús Judeagurri Galileasrø pun taig wammørabe, nui nusrkawan tamartrab nui yamay ‘tiusmanda kørraarrubsrumugu’ chinrrab ashchab ibig køn, kaguende yandø ke patsønrraptiig tsuben.

⁴⁸Inchene Jesúsbe trenchibig køn: —Chigøben Tius naba pasrain kui asamig mari ashmøwei, katø purø nørreelø mariilø ashmøwei inchabe, ñimbe managuen kørenrraamøn— cha.

⁴⁹Inchen tru reyweyasig marøb wab møøbe trenchibig køn: —Señor, petø amun cha, nai unø pinømøwatø.—

⁵⁰Inchen Jesúsbe trenchibig køn: —Inrrø cha, ñui nusrkaimbe kwanrraamøn— cha. Inchen tru møøbe Jesús trendaigwan kørewa ib menda,

⁵¹nui yausrø pub ibene, nui karuindiig melabeløbe katønrrab werruabe, trenchiptinchibelø køn: —Ñui nusrkaimbe ka øsig tsun— cha.

⁵²Inchen møøbe nømun payibig køn: —¿Chu uraskurri tammisrøb ya?— cha. Inchene nømbe trenchibelø køn: —Pachiibe marig kwaløm la una weetan— cha.

⁵³Inchene møskaimbe tre uraswei Jesús øyah taig kømømab isubig køn, tru: “Ñui nusrkaimbe kwanrraamøn” taigwan. Incha nøba, nui yauelø kerrigueløba Jesúswan kørebelø køn.

⁵⁴Iig køn, tru srøsrø marigwei wendau katøgan Tius nøba pasrain kui asamig kønrrai mara eshkaig Jesús Judeagurri Galileasrømay arrua.