Read Namrrik Juan 5 Bible Online

Juan 5 - Namrrik bible

Juan 5

¹Yandø øyeelø chab puraiben, Jesúsbe Jerusalénsrømay nebibig køn judíosmerai fiestayumay.

²Inchen Jerusalén ciudayu tru Ubishamerai Yaskab cha, wamim pulube, kan pisu wabig køn, pøtøgatan ya-ureezheelø trattrøgatø wambiiteelø tøgaig, hebreomaybe Betesda taig.

³Truiløyube kwanrreelø truba nu warabig køn, kabgar køben, cojosmera køben, kønønrrab kaimabelø købengue piwan kønøgamne munig.

⁴Kaguende kanmay kanmay kan ángel pisuyu kørraarrua, piwan kønøgøben, møikkøben nømerrig tru piyu kebibiibe chi kwanrrø tøgaitøgucha tammisrig kørrømisrøbig køn.

⁵Inchen kan møg treinta y ocho años ørøba kwanrrø megabig, truyu pirau tsubig køn.

⁶Inchen Jesúsbe truyu tsui ashabe, øyeetø truba yana kwanrrø tsubig kuin kui ashabe, trenchibig køn: —¿Tammisrøg køtah?— cha.

⁷Inchene tru kwanrriibe trenchibig køn: —Kasuku, nane muguen srua ya, pisuyu kertrabig kaatan cha, tru piwan kønøgøben. Na kebinrrainchib megamne, katøganguen kebiptø kebibig køn— cha.

⁸Inchene Jesúsbe trenchibig køn: —¡Kurrø! cha. ¡Ñui tsigalwan mutab, punab inrrø!— cha.

⁹Inchen tru urastø tru møøbe tabig kørrømisra, nui tsigalwan muta, punab ib mendabig køn. Inchen tru kwalømbe isrin kwaløm købig køn.

¹⁰Treekkurri judíosmerabe tru tamarinabigwane trenchibelø køn: —Møin kwalømbe isrin kwaløm køben, tru maig maramigwan martrai Moisés pøriibe ñui kaya tsuigwan muta inrrain kømø merabig køn— cha.

¹¹Inchene tru møøbe trenchibig køn: —Tru nan tamarøbiitøwei trenchitan cha: “Ñui kaya tsuigwan kusrua muta, inrrø”— cha.

¹²Inchene nømbe: —“Ñui kayigwan tulisha, muta, inrrø” chippe, ñune ¿mu møg trenchita?— chibelø køn.

¹³Inchen tru tamarinab møøbe mu kuinguen mørmíig køn, kaguende Jesúsbe truyugurri tarømisrin køben, katø truyube purø nu misag pasrøben.

¹⁴Inchen yanayu Jesúsbe tru tamarig møwan Tiuswei yau ashabe, trenchibig køn: —Au, ñi møi yandø tabig kørrømisrabe, møingurrimbe katø mas kaig martrab kømø cha, katøbe ñun masken trømbøig nebumønrraimbe.—

¹⁵Inchene tru møøbe ya, judíosmeran eshkabig køn: —Tru nan tamarøbiibe Jesús kuin køn— cha.

¹⁶Incha treekkurri judíosmerabe Jesúswan kaig martrab wendautø llirab mendabelø køn, kaguende øyeelan isrin kwaløm maren.

¹⁷Inchen Jesúsbe trenchibig køn: —Nai Møskaima chu uraskucha nui maramigwane møin kwalømgatig marøb wabig køben, nagucha marøbig kur— cha.

¹⁸Trenchibene, judíosmerabe masken inchibelø køn Jesúswan kwetchab, kaguende isrin kwalømbe chi maramig kømøn cha, mera pasrigwandø kalø marmøtø, Tiuswangucha: “Nai trag Møskain køn” chib, Tiusba lataig misren. Jesús nun mu chi tamgaig martrai tranigwan waminchib

¹⁹Inchen Jesúsbe nømun løtappe, trenchibig køn: —Nabe ñimun isa kømø, cierton trendamønrrun cha: Tiuswei Nusrkaimbe ka nuimburaptøbe chigucha marmøn cha. Møskai chi mari asha, trunundø maran cha. Møskai chi marin kuindø Nusrkaingucha treetøwei maran cha.

²⁰Kaguende Møskaimbe Nusrkawan undaguig kua, nø chi mariilan kerrigu kenamaran cha. Incha treetø kømøtø, mas purø nørreelø marig kenamartrun cha, ñim kwaara asha kørrømisramnegatig.

²¹Kaguende Møskaima kwailan øsiirana øsig kømigwan traniibe, treetøwei Nusrkaingucha tru øsig kømigwan møilan tranamdiig asønaben, tranan cha.

²²Katø Møskaimbe maig maramigwan mungucha nø asha marøb wamøtø, tru maig maramigwane Nusrkai nø asha martrai tranig køn cha,

²³mayeeløba Nusrkawangucha purø tab inchai Møskawan purø tab inchib lataitøwei. Nusrkawan tab inchimíibe, Møskai karua ørøbigwangucha chi tabig inchimøn cha.

²⁴’Nabe ñimun isa kømø, cierton trendamønrrun: Møikkøben na wamindigwan mørøb, nan Karua Ørøbigwan køreb inchibiibe managatig øsig kømigwan tøgagønrrun cha. Incha truigwane kaigyu pasrønrrai pasrig kømønrrun cha, kaguende kwamigugurri øsig kømigumay yandø puraya pasramisrikkurri.

²⁵Nabe ñimun isa kømø, cierton trendamønrrun: Treeg maramig urabe punrrun cha. Inchen truibe møindøweinguen pubguen indan cha, tru kwabelø Tiuswei Nusrkawei wamwan møramig. Inchen tru mørøbeløbe øsig kønrrun cha.

²⁶Kaguende Møskaimbe nøashib øsig kømigwan tøgaig kua, Nusrkawangucha treetøwei nøashib øsig kømigwan tøgagønrrai tranan cha.

²⁷Katø Møskaimbe Nusrkawan maig kørrømisrtrabigwan mu mandamgaig maramigwangucha tranan cha, kaguende nøbe Møg Misra Arrubig kuimba.

²⁸Iig na trendaigwan maig kønrrermab isub kwarmøtay cha, kaguende treeg kømig urabe punrrun cha, mayan kwabelø søriilø purrabelø nui wamwan møra,

²⁹truyugurri webambamig. Inchen tru tabig marøbeløbe katøyug øsiirawa kurrappe, srøig øsig kømigwan tøgagønrrab kurrøbene, trune kaig marøbeløbe katøyug øsiirawa kurrappe, kaigyu pønrrønrrai pønsrailø kønrrab kurrønrrun cha. Jesúsweingatø waminchib

³⁰’Nabe ka naimburaptøbe chigucha chi marmíig kur cha. Nabe maig kønrrabigwan na asha marøppe, tru nai Møskai maig taig mørigwandø asha maren, tru maig kønrrabigwan na asha mariibe sølgandø marig køn cha. Kaguende nan treeg marøg kuimba treeg marmøtø, nan karua ørøbig maig martrain køben, trunun marar cha.

³¹Na naasiitø maig kuigwan ka naimburaptø wamindiibe, trube, tru na wamindiibe ka wamindiitø købsruinrrun cha.

³²Inchen naimburab maig kuigwan eshkabiibe katøgan køn cha. Inchen nø tru naimburab eshkab wamindiibe isa kømø, maig kuigwan wamindig kui nabe asha kur cha.

³³Ñimbe Juanweisrø payrrai øren, nøbe tru newan cierton maig kuigwan eshkabwei indig køn cha.

³⁴Pøs nabe kan møg naimburab ‘øyeeg køn’ cha wamindiitøga pasrømíig kur cha. Inchendø nø trendaigwan na trenchippe, ñim kaigyugurri wesrailø kønrrain trenchar cha.

³⁵’Juanbe kan lámpara naarab pilabig lataig kuig køn cha. Inchen kan maya yanatø ñimbe tru nui tøryu kasraaramig tab kui mørig købig køn cha.

³⁶Inchendø naimburab Juan wamindi lataitøguen kømø, mas nuig tøgagur cha. Kaguende nai Møskai nan martrai traniilø, truiløtøwei naimburab na maig kuigwan eshkan cha, nane nai Møskai karua ørig kuin kui.

³⁷Katø nai Møskai nan karua ørøbikkucha naimburab na maig kuigwan eshkan cha. Ñimbe managuen nui wamwan mørmøwei, nui maløwan ashmøwei indan cha.

³⁸Katø ñimbe nui wamindigwan ñimui manrrau chigar køn cha, kaguende nø karua ørigwan ñim køremuikkurri.

³⁹Ñimbe Tiuswei wamwan pørigwan ashippe, maig køtashchab truba tab ashib labelø køn cha, kaguende managatig øsig kømigwan truyu wetørranrrab isubelø kua. Inchen tru pøriiløbe nan mu kui ashchai naimburab waminchibelø køn cha.

⁴⁰Inchendø ñimbe naimay amrrug kømuindan cha, tru srøig øsig kømigwan tøgagønrrab.

⁴¹’Nabe misaamera nan maya nuguen tab inchib taiwane utømíig kur cha.

⁴²Inchagucha nabe ñimune mailø kui ashib, Tiuswei undag købigwan ñimuinug chigar kui ashar cha.

⁴³Nabe nai Møskawei munchiyu ørig arruben, ñimbe nane utømøtan cha. Inchen katøgan ka nuimburab nui munchiyutø arrubigwane si, trube, ñimbe utønrrun cha.

⁴⁴¿Ñim mandø incha nan kørenrrague? cha, kangurrin kangurri maya nuguen tab indig kømigwangøba ñim labeløbe, Tius kandø wabigweinukkurri maya nuguen tab indig arrubigwan lamøtø.

⁴⁵Nai Møskawei merrab na ñimun ‘øyeeg kailø kuig køn’ chinrraitamab isumøtay. Moisés, ñim ke trunundø isua melaig, nui pøriiløtøgatøwei ñimune ‘øyeeg kaig marøbelø kømøtirru’ chinrrun.

⁴⁶Kaguende Moisés maig taigwan ñim køreig kuimbe, nan kørebsruig kuinrrun cha. Kaguende Moisésbe naimburabweim pørig køn cha.

⁴⁷Tru nø pørigwanma ñim køremeeløbe, na wamindigwangucha chincha kørenrrague— cha, trenchibig køn Jesúsbe.