Read Namrrik Juan 6 Bible Online

Juan 6 - Namrrik bible

Juan 6

¹Incha Jesúsbe Galilea pisu ambøgatøsrømay ibig køn, tru Tiberias pisu taisrømay.

²Inchen truba nu misag Jesúswan mendig ambubelø køn, kaguende Tius nøba pasrain kui asamig kønrrai kwanrreelan tamaren asha kua.

³Inchen Jesúsbe kan tun palasrø nebya, nui kusrenanøb pera uniiløba truyu wamisrøbig køn.

⁴Inchen yandø judíosmerai Pascua Fiestabe lutau købig køn.

⁵Incha Jesúsbe kurraasha, truba nu misag mendig amrruin kui ashabe, Felipene trenchibig køn: —¿Yeeg nu misagweimbe nambe mamig pirrimbe chu penønrrab?— cha.

⁶Trenchippe, Felipe ka manchitamørtraptø trenchibig køn, Jesúsbe maig maramigwan asha købendø.

⁷Inchene Felipebe trenchibig køn: —Ni kan møg doscientos días ørøba marøb megawa an pagaraig utiitøga pirrim pena, piti piti srørramikken nebunrraamøn— cha.

⁸Inchen kusrenanøb pera uniilai utuig Andrés, Simón Pedroi nuneebe trenchibig køn:

⁹—Yube kan matsinø-unø trattrøgatø cebada pirrimbah pagatø peskaubatø sruaig pasran cha. Inchendø kan yandiibe ya nu misagweimbe mayanguen kømøn— cha.

¹⁰Inchen Jesúsbe trenchiptinchibig køn: —Mayeelanba purramisringaruy— cha. Truyube pu truba tsitsig køben, møguelø trattrø milburab purramisrøbelø køn.

¹¹Inchen Jesúsbe tru pirrimeran muta, Tiuswan ‘mayanguen pay’ chabe, maya misag truyu purrabelan pirishabe, katø treetøwei peskaumerangucha maya mag kui inchen srørrøbig køn.

¹²Inchen yandø øska maben, Jesúsbe nui kusrenanøb pera uniilan trenchibig køn: —Pitis unchibelane pirau ka petig warømønrrai, pitiswane tulisay— cha.

¹³Inchen tru trattrøgatø cebada pirri pirisaigwan maben, yandø tru undailan tulishiben, tasinmera doce netsabig køn.

¹⁴Inchen misaamerabe Tius maramburab marigwan Jesús mari ashabe, trenchibelø køn: —Tru Tius maig karuigwan eshkab møg tru yu piraumay attrabig køn taibe, isa kømø, iigwein køn— cha.

¹⁵Inchen Jesúsbe misaamera nun rey martrab ke merrarrawa sruamrrab amrrunrrab kui wetøbeñippe, nøbe katøyug tunbalasrømay inrrab nøtø tarømisrøptinchibig køn. Jesús pisu palawan ib

¹⁶Yandø pillirab arruben Jesúswei kusrenanøb pera uniiløbe pisuyu kørrørruabe,

¹⁷kan barcoyu kebamba, Capernaumsrø larramrrab ambub mendabelø køn. Inchen yandø chab pilliraben, Jesúsbe katøgucha nømuimay arrumø srø køben,

¹⁸yandø truba mur isig ichibig webarruben, pi welarmera kurrab mendabig køn.

¹⁹Incha yandø kan trattrø kilómetros, kabe kan seis køsrøn remab ambabe, Jesúswane barco pulusrømay pi palawan arri ashiptinchibelø køn. Inchabe truba kørig kui inchen, Jesúsbe:

²⁰—¡Na kur cha. Kørmøtay!— chibig køn.

²¹Inchen nømbe barcoyu Jesúswan truba tab kui wamab uta, petøzhiitø tru pum pirausrø pubguen inchibelø køn.

²²Katø kwaløm tru nu misag søtø tru pisu igatømay kørrømisrøbeløbe truyu barco kandøzhiitø pasrabigu Jesúswei kusrenanøb pera uniiløbe tru barcoyu amben, Jesúsbe nømba tøga imuin kui ashibelø køn.

²³Inchendøgucha Tiberias ciudasrøngurrimbe katøgan barcomera pua pønrrabelø køn, Señor pirriwan ‘mayanguen pay’ chiben, tru maim pulusrø.

²⁴Incha tru nu misaabe Jesús truyu mu kawei, nui kusrenanøb pera uniilø mu kawein kui ashippe, tru barcomerayu kebamba, Capernaumsrø Jesúswan lanrrab chab ambubelø køn. Jesús tru øsig kømigwan tranøb pirri

²⁵Incha pisu ambøgatøsrø chab pua, Jesúswan wetørrawabe, trenchibelø køn: —Kusrennøbig, ¿yusrømbe ñibe mana pugu?— cha.

²⁶Inchene Jesúsbe trenchiptinchibig køn: —Nabe ñimun isa kømø, cierton trendamønrrun cha: Ñimbe nane lappe, Tius naba pasrain kui asha kønrrai mariilan asha kømøtø, tru pirrimeran øska mamne maig kua, trugurrinrre lan cha.

²⁷Ñim marøppe, mamig ka petø patsønrrabigwandø isua marmøtø, managatig øsig køm mamigwan isua maray chibig køn. Truigwane tru Møg Misra Arrubig ñimun tranrrun cha. Kaguende treeg maramigwan tranig kui asig kønrrai Tius Møskaimbe nui sellon nuinug pasrig køn— cha.

²⁸Inchene nømbe trenchibelø køn: —¿Tiuswei maramelan marøb pølbasrtrappe, nambe chi maramig palerah?— cha.

²⁹Inchene Jesúsbe trenchibig køn: —Tiuswei maramibe iig køn cha, Tius tru nø karua ørigwan køremig.—

³⁰Inchene nømbe trencha payibelø køn: —¿Tius ñiba pasrain kui nam ashib, ñun køreb inchaimbe, chi martragu? cha. Trube, ¿chi marøbig kugu? cha.

³¹Namui merrabsrø kølli misaamerabe mu misag warab waraimønug maná taigwan maig købig køn cha, Tiuswei wam maig pørigu trendaim pala: “Nøbe nømune srømbalasrø pirriwan manrrai tranig køn”— cha.

³²Inchene Jesúsbe trenchibig køn: —Nabe ñimun isa kømø, cierton trendamønrrun cha: Srømbalasrøngurri arrub pirri ciertonigwan nømun tranøbiibe, Moisés kømuig køn cha. Treeg kømøtø, tru cierton pirri srømbalagurri arrubigwan ñimun tranøppe, nai Møskai, nø tranig køn cha.

³³Kaguende Tiuswei pirrimbe tru srømbalasrøngurri yu piraumay kørraarrua, katø misaameran srøig øsig kømigwan tøgagønrrai tranøbig, truig køn— cha.

³⁴Inchene nømbe trenchibelø køn: —Señor, chu uragucha tru pirriwan srøttra— cha.

³⁵Inchene Jesúsbe trenchibig køn: —Tru øsig køm pirrimbe na kur cha. Naimay arrubiibe managuen parøgwai mørmøwei, katø nan kørebiibe managucha pimulgwai mørmøwei inchun cha.

³⁶Inchendø na ñimun trendaim pala ñimbe nan ashippe, ashendø, nane køremøn cha.

³⁷Møitøgucha Møskai nan traniibe naimay attrun cha. Inchen naimay arrubigwane nabe managuen wambig weguchimumønrrun cha.

³⁸Pøs, nabe srømbalasrøngurri kørraarruppe, nan maig maramdiig køben treeg martrab arrumøtø, nai Møskai nan karua ørøbig na maig martrain køben, treeg martrab kørraarrig køn cha.

³⁹Inchen nan karua ørøbig martrai isuibe iig køn cha: Nø nan traniilane ni kanguen trubishimø, srabe kwaløm katøyug na nømun øsiirangarunrrain køn cha.

⁴⁰Nai Møskai martrai isuibe øyeeg køn cha: mutøgucha Nusrkawan nebua asha, nun kørebiibe managatig øsig kømigwan tøgagønrrain køn cha. Inchen nabe srabe kwaløm nun katøyug øsiirangarunrrain køn— cha.

⁴¹Inchen judíosmerabe namig nømdø nilø chigøben chib mullib mendabelø køn, tru: “Pirri srømbalasrøngurri kørraarrubiibe na kur” taikkurri.

⁴²Incha trenchibelø køn: —¿Øibe tru Jesús Joséwei nusrkain kømuitarru? cha. Nambe usri møskawan ashibelø ker cha. ¿Møimbe mandøgurri nøbe øyeeg tah cha: “Nabe srømbalasrøngurri kørraarrig køn” cha, trenchippe?—

⁴³Inchene Jesúsbe trenchibig køn: —Ñimguen ñimdø mas namig mulla mørmøtay cha.

⁴⁴Mugucha naimaybe attraamøn cha, Møskai nan karua ørøbig naimay attrai inchimubene. Inchen naimay arrubigwane nabe srabe kwaløm katø øsiirangarumønrrun cha.

⁴⁵Tru Tius maig karuigwan eshkabelø pørigube treeg chibig pørig pasran cha: “Mayeelanba Tius nø kusrenaniilø kønrrun” chibig. Inchawei mayeeløba Møskawan mørøb, nuiwan kusreb inchibeløbe naimay amrrunrrun cha.

⁴⁶’Pøs Møskawane mugucha asiibe kaagøn cha. Tiusweinukkurri arrubig, truitøwei Møskawan ashibwei indan cha.

⁴⁷Nabe ñimun isa kømø, cierton trendamønrrun cha: Nan kørebiibe managatig øsig kømigwan tøgagøn cha.

⁴⁸Tru øsig køm pirrimbe na kur cha.

⁴⁹Ñimui merrabsrø kølli misaamerabe mu misag warab waraimønug tru maná taigwan mabendø, kwaig købig køn cha.

⁵⁰Trune tru srømbalasrøngurri kørraarrub pirrimbe yu pasran cha, møikkøben tru pirriwan mabiibe, kwamønrrai.

⁵¹Tru srømbalasrøngurri øsig køm pirrimbe na kur cha. Møikkøben i pirriwan mabiibe managatig øsig wanrrun cha. Inchen yu pirau tru maya misagwan srøig øsig kønrrai tru na tranam pirrimbe nai asrtøwein køn— chibig køn, Jesúsbe.

⁵²Inchene judíosmerabe nømasiyaitø namig trenchib mendabelø køn: —¿I møøbe nui asrwandøwei manrraimbe namune mandø trannrrab indah?— cha.

⁵³Inchene Jesúsbe trenchibig køn: —Nabe ñimun isa kømø, cierton trendamønrrun cha: Tru Møg Misra Arrubigwei asrwan mab, katø nui aniwan muchib inchimeeløbe srøig øsig kømigwan ñimuinug tøgagønrraamøn cha.

⁵⁴Møikkøben nai asrwan mab, nai aniwan muchib inchibiibe managatig øsig kømigwan tøgagøben, nabe srabe kwaløm nune katø øsiirangarumønrrun cha.

⁵⁵Kaguende nai asrbe si, cierton mamig køben, katø nai animbe si, mutsamig ciertonig køn cha.

⁵⁶Nai asrwan mab, nai aniwan muchib inchibiibe nainug pasrabig pasrøben, katø nagurringucha nuinug pasramønrrun cha.

⁵⁷Nan karua ørøbig Øsig Wab Møskaingurri tru øsig kømigwan na tøgagøb lataitøwei, nagurri nøgucha tru øsig kømigwan tøgagønrrun cha tru nai asrwan mabiibe.

⁵⁸Iibeguende tru srømbalasrøngurri kørraarrub pirrin køn cha, tru ñimui merrabsrø kølli misaamera maig lataig kømøtø, nømbe mappe, mabendø, kwaig købig køn cha. Trune i srømbalasrøngurrim pirriwan mabiibe managatig øsig kønrrun— chibig køn.

⁵⁹Jesús øyeelan kusrenanøppe, judíosmera tulundzuni yau Capernaumsrø kusrenanig køn. Møiløgøben Jesúswei mendig amba katøyug llirab

⁶⁰Møiløgøben Jesúswei mendig amøñibelø i kusrenanigwan mørabe, trenchibelø køn: —Nø øyeeg kusrenaniibe maramga menrra murig køn cha. ¿Mu kui møriasamø?— cha.

⁶¹Inchen Jesúsbe nømdø chigøben chib mullib kui ashabe, trenchibig køn: —¿Ñimun øyeeg chibene pusrkwatah? cha.

⁶²Tru Møg Misra Arrubig tru nø srøsrø waisrøndøwei katøle nebiben asimbe, trube, ¿maig købsruerah? cha.

⁶³Øsig kømigwan tranøbiibe Espíritu køben, asrbe truburappe chigucha chi purugumíig køn cha. Na ñimun wamindiibe Espíritu køb, øsig kømig køb køn cha.

⁶⁴Inchendø katøgucha ñimui utu møiløbe køremeelø køn— cha, trenchibig køn. Kaguende Jesúsbe manawei srøsrøgurri asig købig køn, mumeratø nun køremeelø kuigwan, katø tru nun ashig kømui inchibelan trannrrabiibe møig kuigwan.

⁶⁵Incha katø Jesúsbe trenchibig køn: —Inchawei treekkurri nabe ñimune trenchar cha: Mugucha naimaybe amrrunrraamøn cha, nai Møskai amrrunrrai inchimubene.—

⁶⁶Inchen yandø trugurrimbe møiløgøben nui mendig amøñibeløbe chab llirawa, yandø Jesúsba amøñimeelø køn.

⁶⁷Inchen Jesúsbe nui doceelan trenchibig køn: —¿Kabe ñimgucha treetøwei llirawa ambug køtah?— cha.

⁶⁸Inchen Simón Pedrobe trencha løtabig køn: —¿Señor, nambe muimay kui ambamø? cha. Tru managatig øsig køm wamwane ñitøwein tøgaig køben,

⁶⁹nambe ñun køreb, katø tru Tiuswei Newan Tabiibe ñi kui ashib inder— cha.

⁷⁰Inchene Jesúsbe trenchibig køn: —¿Yamba, na ñimun doce lawa wesrab mørgøppeh? cha. Treeg kuindøgucha ñimui utu kane kwaimandzig køn— cha.

⁷¹Øyah chippe, Simón Iscariotei nusrkai, Judaswan waminchibig køn. Kaguende tru doceelai utuig kuatøgucha, tru Jesúswan ashig kømui inchibelan nø trannrrab pasrøben.