Read Namrrik Juan 9 Bible Online

Juan 9 - Namrrik bible

Juan 9

¹Jesús kanbalø pureb pasrøwabe, kan møg srøsrøgurri kerrigu ashmíig kal-laweigwan ashibig køn.

²Inchen nui kusrenanøb pera uniiløbe trenchibelø køn: —Kusrennøbig, ¿ø møg ashchab kaimabig kal-lanrraimbe, møig kaig marig kerah? cha. ¿Møskalø kaig marikkurrin køh? Kabe: ¿nøasiitøwei kaig marikkurrin kø, chinderah?— cha.

³Inchene Jesúsbe trencha løtabig køn: —Nø kaig marikkurrin kømøwei, kabe møskalø kaig marikkurrin kømøwein køn cha. Treeg kømøtø, Tiusbe nui maramburab mariilø tru ashmíigweinug kenamisrtrain kuig køn cha.

⁴Kwaløm købenbatø nan karua ørøbigwei maramigwan nambe marmø kømø, maramigwein køn cha; kaguende yembe attrun cha, mugucha maramgaikke.

⁵Na yu pirau uñippe, pirauelai tør kur— cha.

⁶Incha Jesúsbe øyah chib pasrøwabe, pirau illimbi tucha, tru illimbitøga kaizhig chillig marabe, trutøga ashmíigwein kabyu srøløbig køn.

⁷Inchabe trenchibig køn: —Siloé pisusrø maløwan kwallchab inrrø— cha. (“Siloé” chippe, “karua ørig” chib.) Inchen tru ashmíibe ya, maløwan kwalla, katø arruppe, ashibig arruptinchibig køn.

⁸Inchen nui ya pulueløba, katø tru ‘chigøben kettra’ cha, miab wabigwan ashibelø købeløbabe trenchibelø køn: —¿Tru ‘chigøben kettra’ chib, miab wabiibe øigwein kømuitarru?— cha.

⁹Inchen kaneløbe trenchibelø køn: —Nøwein køn— cha. Inchen katøganeløbe trenchibelø køn: —Truig lataig asønabendø, nø kømøn— cha. Inchen nøbe nøashib trenchiptinchibig køn: —Nawein kur— cha.

¹⁰Inchene nømbe trenchib payibelø køn: —¿Chincha ashibig misrku?— cha.

¹¹Inchene nøbe trenchibig køn: —Kan møg, munchibe Jesús taig, chillig mara, nan kabmerayu srølabe, trenchitan cha: “Siloé pisusrømay ya, maløwan kwallchig” cha. Inchen nabe ya, maløwan kwallene, nai kabmerabe ashibig misrøptinndan— cha.

¹²Inchen nune trencha payibelø køn: —¿Tru møøbe chu yah?— cha. Inchen nøbe: —Chindindø— chibig køn. Fariseosmera tru ashmíig købigwan truba payib srua køb

¹³Incha tru kerrigu ashmíig købigwan fariseosmerai merrab pera ambubelø køn.

¹⁴Kaguende tru Jesús chillig mara, ashmíigwan tamarin kwalømbe isrin kwaløm købig køn.

¹⁵Incha fariseosmeragucha tru møwan katøyug payibelø køn: —¿Mandø incha, ashibig misrku?— cha. Inchene nøbe trenchibig køn: —Kappala nane chillig srøldan cha. Inchen nabe maløwan kwaliitø, ashibig misrinatan— cha.

¹⁶Inchen møiløgøben fariseosmerabe trenchibelø køn: —Kan øyeeg marøb møøbe Tiuswein kømuinrrun cha. Kaguende isrin kwalømwan ke isrin kwaløm kømui lataig marøbig køn— cha. Trune katøganeløbe trenchibelø køn: —¿Kan kaig marøb møøbe øyeeg Tius nøba pasrain kui asha kømig mariilø mana martrab kø?— cha. Incha yandø nømdø ke nøørøtø misrøbelø køn.

¹⁷Inchawei tru ashmíig købigwane katøle payibelø køn: —Ñibe, ¿tru møweimburab manchinrragu cha, tru ñui kabmeran tamarig købene?— Inchen nøbe løtappe trenchibig køn: —Nabe Tius maig karuigwan kan eshkab møg køn tamønrrun— cha.

¹⁸Inchen katøgucha judíosmerabe kørenrrab inchimeelø køn ke ashmíig købig kua, katøle ashibig misritamappe. Incha tru tamarinabigwei møskalanguen amrrunrrai wama,

¹⁹nømune trenchib payibelø køn: —¿Iig tru ñimui nusrkain kuitarru cha, tru ñim kerrigu ashmíig kal-lan? taig. ¿Trube, møimbe mandø incha ashibig misrah?— cha.

²⁰Inchene møskaløbe trenchibelø køn: —Namui nusrkaiwein køn cha, tru kerrigu ashmíig kal-labig.

²¹Inchendø ashibig misrtrappe, mandø indigwane nambe trunune ashmer cha. Katø ya ashibig misrtraimbe kabmerane mu tamarin kui namgucha ashmer cha. Ñimbe nunashib payay chibelø køn, yandø kølig køn cha, nøashib maig kuigwan eshkanrrun— cha.

²²Møskalø øyeeg chippe, judíosmeran kørig køptørre øyeeg chibelø køn, kaguende judíosmerabe møikkøben: “Jesúswan Cristo køn” chibigwane nømui tulundzuni yaugurri wegutchab waminchaguen køben.

²³Incha treekkurri møskaløbe trendaig købig køn: —Nunashib payay cha, yandø kølig køn— cha.

²⁴Incha judíosmerabe tru ashmíig køb møwane katøle wama, trenchibelø køn: —Tiuswane maya nuguen tabig waminchi cha. Nambe tru møøbe kaig marøbig kui asha ker— cha.

²⁵Inchene nøbe trenchibig køn: —¿Kaig marøbig køh? Kabe: ¿Kaig marmíig kø, chindi? Nabe trunune ashmur cha. Nabe kerrigu ashmíig købig kuig, møimbe yandø na ashibig misrigwan nabe trunune isua pasrar— cha.

²⁶Inchen katøyug payibelø køn: —¿Chi marta? cha. ¿Ashibig misrtraimbe mandinda?— cha.

²⁷Inchene nøbe løtappe, trenchibig køn: —Yamba chab eshkaben, ¿mørmeelø kø chindah? cha. ¿Chindimbarre katøyug møramig palaingøgue? cha. ¿Ñimgucha kabe nui mendig amøñibelø misrøg køtah?— cha.

²⁸Inchene nømbe nun trømbøig tsalø wamabe, trenchibelø køn: —Ñibeguende tru møwei mendig pasran cha. Trune namuimburappe, nambe Moisés maig chiben treegwan pønrrabelø ker cha.

²⁹Moiséswane Tius wamindig kui nambe ashibelø ker cha. Trune tru møwane chuig kuinguen nambe ashmeelø ker— cha.

³⁰Inchen tru møøbe trencha løtabig køn: —Pøs, kan øyeegweinrre mandø kuinguen møramgaig, ke kwaara asamdiig tabig køn cha. Ñimbe chugurri arringuen ashmuben, trune nane kabmeran ashibig martan cha.

³¹Nambe trendø ashibelø ker cha, kaig marøbelane Tiusbe mørmíig kuin kui, trune møikkøben nun køriibala tabig waminchibigwane nøbe mørøbig kui.

³²Managuen kan kal-lainukkurri ashmíig kal-labigwan mu tamaran taig manasrøngurri mugucha wammøra kømøn cha.

³³Tru møg Tiusweinukkurri arrubig kømuimbe, chigucha martrab kaimain kømbala— chibig køn.

³⁴Inchene nømbe trenchibelø køn: —Ñi, yeeg kaig mariitø netsaig kal-lawaig købendø ¿namungan ñibe kusrenanrrab indirru?— cha. Incha nømbe nune judíosmera tulundzuni yaugurri weguchibelø køn. Tiusweiwan ashibelø ker chibendø, ashmeelø

³⁵Inchen Jesúsbe tru ashmíig købigwan judíosmera tulundzuni yaugurri wegutsin køn taig wammøra, nun katabe, trenchibig køn: —¿Ñigan tru Møg Misra Arrubigwan køretirru?— cha.

³⁶Inchene tru møøbe trencha løtabig køn: —Au, Kasuku, ¿truibe mu køh? cha, na nun kørenrrab— cha.

³⁷Inchene Jesúsbe trenchiptinchibig køn: —Ñibe ashibguen indan cha. Ñiba waminchib pasrabig, nabe truig kur— cha.

³⁸Inchene tru møøbe trenchibig køn: —¡Señor, nabe ñun kører!— cha. Incha nun køriibala tabig waminchibig køn.

³⁹Inchen Jesúsbe trenchibig køn: —Nabe yu piraumay arruppe, maig kønrrabigwan asha martrab arrig køn cha, ashmeeløbe ashibelø misrtrai; Inchen ashibeløbe ashmeelø misrtrain— cha.

⁴⁰Inchen møiløgøsrøn fariseosmera Jesúsba pønrrabelø tru trendaigwan mørabe, trenchibelø køn: —¿Kabe namgucha kabgar ashmeelø købra chindah?— cha.

⁴¹Inchene Jesúsbe løtappe trenchiptinchibig køn: —Ñim ashmeelø kuig kuimbe, ñim kaig marig chigar købsruinrrun cha. Inchendø møimbe ñim ‘ashibelø ker’ chib pønrraikkurri ñimui kaig mariiløbe ñimuinug pasrabwei indan cha.