Read Namrrik Hechos 1 Bible Online

Hechos 1 - Namrrik bible

Hechos 1

¹Nai Teófilo, nai srøsrø pørigube maig purayaigwan eshkab pørig kuig køn, Jesús tru chigurrimbunø marøb pølbasriilanba kusrenaniilanba.

²Katø nøashib karua øramelø lawa wesruilan Espíritu Santogurri chitø maramelan martrai karua pønsra, srømbaløsrømay srua yain kwalømgatig købigwan pørig køn.

³Incha nøbe kwaig tsua, øsiirawa, nømune øsiguig kenamisrøbig køn, nø kuin kui asamdiig kønrrai chine marøb. Incha nøbe kwalømmera cuarenta nemisramne nømun kenamisrøb uña, Tius nø karub waigweimburabigwan waminchibig køn.

⁴Incha Jesúsbe nømba trubalatø purrøwabe: —Jerusalénsrømaybe ammønrrigay cha karubig køn, nai Møskai trannrrab misra kørrømisrigwan treeg pumnegatig munugunrrain cha,

⁵tru ñim nan øyah taig mørig købigwan. Pøs Juanbe isa kømøtø, pitøga pinøbuliilø kønrrai ulsrain køn cha. Trune ñimbe mam kwalømyutø Espíritu Santotøga pinøbuliilø kønrrun— chibig køn. Jesús srømbalasrømay ib

⁶Jesúsba truyu tulaamba purrøwabe, trencha payibelø køn: —¿Señor, Israel misaamera merrabsrø nøm ashib karub tøgagúig købigwan katøle treetøwei nøm karub tøgagømig punrrai møi yan tamara pasrtraindirru?— cha.

⁷Inchene Jesúsbe trencha løtabig køn: —Treeg maramibe mana punrrabigwanba, Møskai nøashib nui maram purab mariitøgatøwei chi kwaløm treeg punrrai mara kørrømaramigwanbabe, ñimbe wammøra kømig chi palømøn cha.

⁸Inchendø Espíritu Santo yandø ñimuim pala arrubeneguende maramburab maramigwan ñim uta, Jerusalénsrø, Judea pirau kerrigu, Samaria pirausrø, pirø muba kuimburab purø yabsrønguen naimburab maig kuigwan waminchab webamrrun— chibig køn.

⁹Incha yandø iigwan chab waminchene, nøm ashib pønrramne, Jesúswane pala kusruben, kan wañi arrua, nun pinøbulen, yandø mas ashchab kaimabelø køn.

¹⁰Inchen Jesús iben, nøm srømbalaneb neeshib pønrramnetø, møimbe pagatø møguelø puløzheelø kewar nømuim pulu kenamisrabe,

¹¹trenchibelø køn: —¿Galileasrø møguelø, chindimba srømbalaneb neeshib kørrømisrke? cha. I Jesústøwei ñimui utugurri srømbalasrømay srua yainabiibe, ñim maig yai asig katø nøbe treetøweih attrun— chibelø køn. Judasweimburø purøbasramig Matíaswan lawa wesrab

¹²Inchen tru nøashib karua øriiløbe tru Olivos taig tunsrøngurri Jerusaléngatig katø ambubelø køn, tru maig maramigwan martrai Moisés pørigu isrin kwalømbe maya yabgatig amrrain chibig køben, treezhiitø.

¹³Jerusalén ciudayu puabe, tru nøm pui yau, pala pisusrø nebambubelø køn, truyube Pedro køben, Juan køben, Jacobo køben, Andrés køben, Felipe køben, Tomás køben, Bartolomé køben, Mateo køben, Alfeowei nusrkai Jacobo køben, Simón Zelote køben, Jacoboi nusrkai Judas køben, tru iilø ya peba warainug.

¹⁴Truiløbe Tiusba wamindamigwane søtøba kandø isua, maikken elachimø marøbelø købig køn, Jesúswei usri María køben, nui nunelø køben, katøgan ishumburmera køben kanbalatø misra.

¹⁵Inchen tru kwalømmerawan Jesucristo kusrenanigwan marøbelø kan ciento veinte køsrøn tulundzuna køben, Pedrobe truilai utu pasramisra trenchibig køn:

¹⁶—Nai nunelø, Tiuswei wamwan pørigu maig taig, truibe nebumig palaig kuig køn cha. Tru pørigube Espíritu Santobe David wamindigu kanmaytø Judasweimburab treeg nebunrrun cha wamindig kuig køn. Jesúswan kemøra, sruamrrabelan mandø indamigwan eshkab pasrabigwan.

¹⁷Pøs Judasbe namui utuitøwei, katø namui marameløyu maramig tøgaig købig køn cha.

¹⁸(Indiibe tru nø kaig marimburø an utiitøga kan tul penig køn cha. Inchabe ippa, turmay peñippe, patsøwan srurram peñen, pøitsimerabe kerrigu webølabig køn cha.

¹⁹Inchen Jerusalén mayeelø warabelø wammørabe, tru pirøwane, “Acéldama” cha wamabelø køn, nømuin trikkabe, “Ani Lusin Tul” chibig.)

²⁰Kaguende Salmosyube trenchibig pørig pasran:“Nui yabe mugucha waraimíig kutsi ya kørrømisren, katø truyube muguen tsunrrabig kaanrrain” cha. Katø:“Nø chi marøb pasraig købigwane katøgan peg utønrrain” cha.

²¹’Inchawei øyeeg købene, tru namui utu Jesús trendø namba lincha llirab uñen,

²²tru Juan Jesúswan piu umbu nun ulsraikkurrimbunø, katø nun namuinukkurri kusraben, nun srømbalasrø utig kømnegatig namba managucha tin lincha amøñibelø yu møguelø køn cha. Incha kan treeg lincha uñibigwan, tru Jesús kwawa, katøle øsiiraigwan treeg køn chib waminchib, namba tøgatø pasrønrrai maramibe ke søldøwein køn— chibig køn.

²³Incha pailan wesrawa pønsrøbelø køn: Matíaswanba, Joséwandøwei Barsabás cha wamab (katø Justo cha wamab indi) møwanba.

²⁴Inchabe øyeeg chib Tiusba waminchibelø køn: —Señor, ñibe mayeelai manrrømeran ashibiibe, i pailan ñi mønun lawa wesrua tøga pasraigwan eshkarra chib,

²⁵Cristo nøashib karua ørigwei maramigwan uta pasramisra martrabiibe mu kuin kui. Kaguende Judasbe nui yamsrømay inrrab, tru maramigugurrimbe tarømisra pella, peg maywan yaig køn— cha.

²⁶Inchawei møigweim pala pendashchab suerte kuchene, Matíasweim pala peñen, truibe yandø tru Cristo once nøashib karua øriilai utuig kørrømisrig køn.