Read Namrrik Hechos 11 Bible Online

Hechos 11 - Namrrik bible

Hechos 11

¹Cristo nøashib karua øriiløba, nunelø Judeasrø warabeløba tru judíos kømø misaameragucha Tiuswei wamwan utin kui wammørøbelø køn.

²Incha Pedro Jerusalénsrø katø nebibene, tru asru circuncidawar kørewarbe nune øyeebe maig marøb pasrøgu chib,

³trenchibelø køn: —¡Kan ñibe judíos kømø misaamera tru circuncidameelai yau kebya, truiløba lincha main køn!— cha.

⁴Inchen Pedrobe lutøgurri maig purayaigwan eshkab, trenchibig køn:

⁵—Na Jope ciudasrø tsua, na Tiusba waminchib wabene, kan piab lataigu na øyeeg kenamisri ashibig kur cha. Truyube kan nu llensu lataig pib tsøbmerayu litsig srømbalasrøngurri kørraarrub arrua, naim pulugatig kørraarrubig køn cha.

⁶Inchen umbu chi tøgaig køtashchab na tab ashene, animalmera pib srøb tøgailø køben, namiguelø køben, pirau srala ambubelø køben, pala amøñib illimera køben tøgaig asinabig køn cha.

⁷Katø kan wamgucha trendai mørinabig køn cha: “Pedro, kurrab kweecha, ma” cha.

⁸Inchene nabe trenchibig kur cha: “¡Señor, paare, kan treekkucha mana maramø! cha. Kan nabe managuen nai trigube mamønrrai merigwanba, chish mariimíigwanbabe mugabguen muga kømur” cha.

⁹Inchen srømbalasrøngurrimbe wambe nane katøle løtab trenchibig køn cha: “Tius tabig chishig mara kørrømarigwane ñibe mamgaig trømbøig kønmab asha tøgagømøta” cha.

¹⁰Truibe pønmay treetø treetø incha, katø kerriguba srømbalasrømay nebibig køn cha.

¹¹’Inchen trunetø pøn møguelø Cesareasrøngurri nan lanrrab øriilø nam purrai yau puptinchibelø køn cha.

¹²Inchen Espíritu Santobe nane: “Mandø inchab kømab isuptø pasrømøtø, nømba inrrø” chiben, katø i seiselø nuneløgucha naba lincha amrruig købig køn cha. Incha nambe søtøba Cornelioi yausrø kebambubelø ker cha.

¹³Inchen nøbe nui yau kan ángel pasramisra, tru nun øyah chib pasraig asigwan namun eshkabig køn cha: “Jopesrømay ør cha, Simónwan, trunundøwei katø Pedrogucha taigwan attrai wamønrrab.

¹⁴Truibe ñiba, ñui yauelanba kaigyugurri mandø incha ñimun wesrailø køm wammeran waminchun” chitan, chibig køn.

¹⁵’Inchen na pua, truyu waminchib mendøbene, tru srøsrøzhiitø Espíritu Santo namuim pala kørraarrub lataitøwei nømuim pala kørraarruptinchibig køn cha.

¹⁶Inchene nane Señor øyah taigwan isuptinchibig køn cha: “Juanbe piu ulsra pitøga pinøbulingaruben, trune ñimbe Espíritu Santotøga pinøbuliilø kønrrun” taigwan.

¹⁷Nam judíosmera Señor Jesucriston kørebelan Tius keta tranigwan nøm judíos kømeelangucha trunundøwei keta tranene, ¿Tiuswan treeg marmøta chib pasrønrrappe, nabe mu købrai køh?— chibig køn.

¹⁸Inchen Tiuswei misaamera jerusalénsreelø iilan mørabe, yandø chi chimøtø, Tiuswan truba tabig waminchib trenchibelø køn: —Trube, Tiusbe judíos kømø misaamerangucha øsig kømigwan nebua tøgagønrrai kaig marigwan isua møra, nuimay lliranrrai marin køn— chib. Siria pirau Antioquíasrø Tiuswei ureemera

¹⁹Inchen tru Estebanwan kweechen isumdiig kaig pub mendøben trugurri, ke kan ørøtømisra chab ambubeløbe, Feniciasrøn køben, Chipresrøn køben, Antioquíasrøn køben øyasrøngatig ambig købig køn, mungucha mendailane Tiuswei wamwan waminchimøtø, judíosmerandø waminchib.

²⁰Inchendø nømui utuelø møiløgøsrøn, chipresreeløba, cirenesreeløba Antioquía ciudayu puabe, griegosmerangucha waminchibelø køn, Señor Jesúsweimburab eshkab kusrenanøb.

²¹Inchen Señorwei tasiibe nømba pasrøben, misaabe truba nu kørewa, Señorweimay llirabelø køn.

²²Inchen Jerusalénsrø iglesiayueløbe trunun wammøra, nømbe Bernabéwane Antioquíasrøngatig ørøbelø køn.

²³Inchen Bernabé trusrø puabe, Tius ka yandø tab indin kua asha, nøbe truba kasraarawa, Señorwei mayu pønrrappe nømui manrrau tab isua mur pønrrønrrai mayeelan waminchibig køn.

²⁴Kaguende Bernabébe tabig, Espíritu Santoba, nui isubigwan Cristoinug pasriiba truitø netsaig købig køn. Inchen Señorweyasig misaabe nørrø nemisrig købig køn.

²⁵Incha yandø Bernabébe Saulon lanrrab Tarsosrømay ya, yandø wetørrawabe, Antioquíasrømay pera ibig køn.

²⁶Incha nømbe trusrø pila ørøba iglesiayueløba tulundzunab kua, misagwan nørrø kusrenanøbelø køn. Tru Antioquíasrøn kuig køn, tru Jesucristoi kusrenanigwan marøb melabelan ke srøsrøzhiitø pølbasra “Cristoielø” cha munchi pasra wamig.

²⁷Inchen tru kwalømmerawan møiløgøsrøn Tius maig karuigwan eshkabelø Jerusaléngurri Antioquíamay kørrørrubelø køn.

²⁸Inchen kan tru ambubelai utuig Agabo taibe, Espíritu Santo nun maig tamigwan isunrrai inchen, trenchibig køn: —Pirau ørøba parø truba nuig attrab køn— cha. Indiibe treeg kønrrun taibe Claudio karubig køben treeg purayaig købig køn.

²⁹Inchawei Antioquíasrø Jesucristoi kusrenanigwan marøb melabeløbe nømun kanun kanun maig tranamdiig køben an treeg purugua trana, ørtrab chibelø køn, nunelø tru Judeasrø warabelayasig.

³⁰Incha treeg mara, Judeasrø Tiusweimburabelan pera marøb pønrrabelan trannrrai, Bernabéwanba, Saulonba tru ketamig tulisaigwan trana ørøbelø køn.