Read Namrrik Hechos 2 Bible Online

Hechos 2 - Namrrik bible

Hechos 2

¹Judíosmerai Pentecostés taig tru kwaløm yandø puben, nømbe mayeeløba kanbalatø tulundzuna købene,

²møimbe ¡katø! srømbalasrøngurrimbe wanrrabig kan truba mur isig ichibig lataig arrubig køn, tru purrainuube ¡katø! ya ørø tru wanrrabiitø kasramgue.

³Inchene nømun kanun kanun traniilø kan nagurømera latailø kenamisra, nømun kanuim pala, kanuim pala pønrramisrøbelø køn.

⁴Inchene nømbe mayeeløba Espíritu Santotø netsailø kørrømisra, peg, peg wammera waminchib mendabelø køn, Espíritu nømun maig wamindingaruben.

⁵Inchen Jerusalénsrømbe judíos misaamera warabelø køn, Tiusweimburabelan maizhikken elachimø marøbelø, chu pirausrøngurringuen palømíikke.

⁶Inchen tru misag søtøbe tru wanrrabigwan mørabe, tulundzunabelø køn. Inchabe ¡paare! kan øyeebe chi mandø kermab isubelø køn, kaguende nøm mørene, tru Jesucriston kørebeløbe møitøgucha peg wam peg wam tru nøm mørøb pønrrabelai wamwan, trunun, trunun waminchiptinchene.

⁷Inchen nømbe truba kørrø kwaariilø, kangurrin kangurri ¡paare! kan mandø kermab isub, trenchibelø køn: —¿I mayamba waminchib pønrrabeløbe Galileasrø misaamera kømuitarru? chib.

⁸Pøs kan namuin triimay, namuin triimay nam wamindi mørtrappe ¿mandø kerah? cha.

⁹Yube Parto pirausreelø køben, medosmera køben, elamsreelø køben, mesopotamiasreelø køben, judeasreelø køben, capadociasreelø køben, pontosreelø køben, Asia pirausreelø køben,

¹⁰frigiasreelø køben, panfiliasreelø køben, egiptosreelø køben, tru Cirene pirø pulu Libia pirausreelø køben, katø Romasrøngurri amrrubelø ka petø amrruarteelø judíosmera køben, judíos kømeelø Tiusweiwan judíosmera marigu pønrrønrrab purørruwarmera køben,

¹¹katø cretasreelø køben, arabiasreelø køben, treeg yam paløsreelø købendø, nambe mayeeløba Tius truba nørreelø mariilan namuin triimay, namuin triimay wamindi mører— chibelø køn.

¹²Incha mayeeløba nømbe kwariilø ¡kan paare! øyeebe mandø kermab isub kangurrin, kangurri trenchibelø køn: —¿Kan øyeebe chi kerah?— chib.

¹³Trune kaneløbe indzatø ashib trenchibelø køn: —Mutsiguelørre inchib waran— cha. Espíritu Santo kørraarruben, Pedro misagwan maig kønrrabigwan waminchib

¹⁴Inchen Pedrobe Cristo tru once karua øriiløba kurra pasramisra, nøbe mur waminchib trenchibig køn: —Judea møguelø køben, katø mayeelø yu Jerusalén warab misaamera køben, iigwan ñim chigúi nebua ashchain køn cha. Na wamindamigwan tab mørtrai chibig køn.

¹⁵Ya løtsø las nuevetø køben, i møguelan ñimbe mutsiguelø kønmab isuinrrun cha,

¹⁶treeg kømøtø, Tius maig karuigwan eshkabig Joelgurri Tius tru øyeeg taig købig, iibe tru køn cha:

¹⁷“Srabe kwalømmerawane treeg pub attrun cha, Tiusbe trendan chib,mu misagweim palatøgucha nai Espíritun uncha tøgagønrrai øramønrrun cha. Ñimui nusrkalø, ñimui nimbasrmerabeTius nømun chi eshkaigwan eshkaben, ñimui matsøreløbe kan piab lataigu chigøben ashen, ñimui kølleeløbe piailø tøgagønrrun cha.

¹⁸Tru kwalømmerawane katø ishumbur lata, møguelø lata, nai karuindiig melabelaim palanai Espíritun uncha tøgagønrrai tranen, nømbe na nømun chi eshkaigwan eshkanrrun cha.

¹⁹Inchen srømbalasrømbe nabe kwaara asha kønrrai mariilø marøb, katø yu piraube na maramburab mariilan asha kømig kenamaramønrrun cha,anin køben, nag køben, naguish kurrabig købengue.

²⁰Nøsiibe larrø løstiig misren, pølbe ani lataig misrtrun cha. Señor arrum kwaløm truba nuig purø tab kwaløm pumøwatø, treeg kønrrun cha.

²¹Inchen Señor Tiuswei munchiwan wamab, purugurra chib miab pasrabiibe, kaigyugurri wesraig kønrrun” cha, trendaig. Iibe tru køn, chibig køn.

²²’Ñim Israel misaamera, na wamindigwan møray chibig køn: Nazaretsrø Jesúsbe Tius nø karua øri møg kui ashchai, nø treeg trani møg købig køn cha, nøgurri ñimui merrab maramburab mariitøgaba, kwaara asha kønrrai mariitøgaba, Tius nøba pasrain kui asha kømig mariiløtøgaba. Pøs ñimdøweinguen ashibelø køn cha.

²³I møwandøwei Tiusbe merrabsrøngurri manawei nø maig martrab isuilane tøgaguen kua, ñimun tranen, ñimbe nune kurusyu mesra, ñim kweetsig køn cha, tru larrø kailai tasku purøøra.

²⁴Inchen nune kwailai utugurri Tiusbe kusraig køn cha, øyeeg purø trømbøig indinawa kwaig tsuigugurri. Kaguende tru kwab kwanrrai marøb pasrabiibe nune chinchagucha nø merrarrawa tøgagønrrab kaimaig køn cha.

²⁵Pøs merrabsrø rey Davidbe Jesúsweimburab waminchippe, trendaig købig køn cha:“Nabe Señorwane chu uragucha nai merrab wai ashibig kur cha. Kaguende nøbe nai kusrmay pasran cha,nan amburab, iburab sruagutsig mandøguen kømui pasramig chigaanrrai.

²⁶Treekkurri nai manrrøbe truba kasraaraben, nai niløbe truba truba tabig waminchib kasraaran cha.Inchen nai asrken, chi isumø muniiramigwan muniirab isrønrrun cha.

²⁷Kaguende ñi, Tiusbe, nan kwabelø pønrrainug pasrønrrain kønrrain kømøwei, katø ñui Newan Tabigwan trerab tsunrrain kønrrain kømøwei inchun cha.

²⁸Ñibe nan øsig køm maymeran nebua asingarua, ñi naba waikkurri nane truba truba kasraarangarunrrautan” taig køn cha, trenchibig køn.

²⁹’Nai misaamera, nabe maig kuigwan tørgandø kelarrab ñimun trendamønrrun: Merrabsrø namui kølli misag Davidbe kwaben, sørig køn cha. Inchen tru nui søriibe møin kwalømgatig namui utu pasran cha.

³⁰Inchendø Davidbe, Tius maig karuigwan eshkabig købig kua, tru kan nuinukkurri kurrab misagwan David nø wamisra karub wainug wanrrai wannamigwan, Tiusbe: “¡Katø! treeg marmø kømø, treeg kønrrai maramønrrun” cha, trendaigwan ashibig kuig køppe,

³¹Davidbe manawei Cristo øsiiramigwane chab asha kua, tru Cristo katøle øsiiramigwan trencha wamindig købig køn cha ‘kwabelø pønrrainug truyutø pasrønrrai kørrømarig kømøwei, katø nui asrbe treraig kømøwein kønrrai indig kønrrun’ cha.

³²Inchawei Tiusbe tru Jesúswandøwei katø øsiirangaruben, nambe mayeeløba tru øyeeg purayaigwane namashib asha pønrrer chibig køn.

³³Incha nune Tiusweim pulu kusrmay wanrrab attrai kusraben, Møskai trannrrab misra kørrømisrig tru Espíritu Santon uta, uncha tøgagønrrai trunun tranan chibig køn. Inchen ñim møi ashib, mørøb inchib kuibe, tru køn cha.

³⁴Kaguende Davidbe srømbalasrømaybe nebimuig køn cha. Inchendø Davidbe trendaig køn cha:“Señor Tiusbe nai Señorwane trendan cha: ‘Nai kusrmaygatø wamisr cha,ñun ashig kømui inchib tsalø inchibelan ñi ñui srøbmeran truilaim pala nebuna wamig kønrrai na pønsramnegatig.’ ”

³⁵

³⁶’Israel misaamera mayeeløba treeg kømuitamab asha pønrray cha, tru Jesús ñim kurusyu mesraigwandøwei Tiusbe nune Mayeelaim Pala Pasrabig kønrrai maramba, Cristo kønrrai maramba indin køn— chibig køn, Pedrobe.

³⁷Incha øyeeg tailan mørøppe, truba kullaarab isui inchibelø køn nømui manrrau kebachen. Inchabe Pedronba, trugurri Cristo nøashib karua ørig katøganelanba payibelø køn: —Ñim nai misaamera, ¿nambe chi maramig kønrrerah?— cha.

³⁸Inchen Pedrobe trenchibig køn: —Ñim møitøgucha nimui kaig mariilan isua møray cha. Incha Tiusweimay llirawa, Jesucristoi munchiyu piu umbu ulsrailø kuy chibig køn, ñimui kaig mariilan ulø payamig kømíig, pesannaig kørrømisrtraimbe. Inchen Tiusbe ñimune Espíritu Santon tranrrun cha.

³⁹Kaguende i tranamigwan nø trannrrab misra kørrømisriibe, ñimuyasig køb, ñimui ureemerayasig køb, katø mayeelø chu uras tsøndatøsrø kønrrabelayasig køb, katø mayeelø namui Tius nun mun wamag køben wamamelai, truilayasig køb køn— chibig køn.

⁴⁰Incha Pedrobe øyeelø wamindig kømnetø, katø srøitø waminchib, øyamay melamig køn chib trenchibig køn: —Yeeg larrø kaig marøb misaamerainukkurrimbe wemallib ambay— cha.

⁴¹Inchen tru nø wamindigwan møra utabelane piu umbu ulsrailø kørrømisren, tru kwalømbe Jesucriston kørewa pønrramisrøbeløbe kan pøn mil køsrøn nemisrig købig køn.

⁴²Incha nømbe mayeeløba Cristo nøashib karua øriilø kusrenanigwane tindøga marøb pønrrabelø køn, kanbalatø lincha kømigu lata, mamig pirisha kanbalatø mab kømigu lata, katø kanbalatø misra Tiusba waminchib kømigu lata. Jesucriston kørebelø srøsreelø mandø waraig

⁴³Inchen nømune mønundøgucha ka nøs nøstø købig køn, tru Cristo nøashib karua øriiløgurri kwaara asha kønrrai marøb, katø Tius nømba pasrain kui asha kønrrai truba truba marøb inchen.

⁴⁴Inchen mayeeløba Criston kørebeløbe kanbalatø lincha tulundzunab, katø chimerandøgucha ke kanguelarrøtø tøgagøb inchibelø køn.

⁴⁵Incha nømui pirømeran, yameran, katø chi tøgagúilan køben yana, søteelan pirishibelø køn, møitøgucha maig palain køben, treetø.

⁴⁶Incha kwalømmørig, kwalømmørig Tiuswei yau søteeløba tulundzunabelø køn. Incha mamigwan nømui yamørig truba truba kasrag, kanbalatø lata pirisha mabelø køn, tabig isua, ka treeg maranmab ashchaindø kømø,

⁴⁷manrraugurri tabig isub Tiuswan truba tabig waminchib, katø nømbe maya misaamera truba tabig wamindinabelø køn. Inchen Señorbe kaigyugurri wesraig kønrrabelan wesrawa, kwalømmørig nømuinuube srøitø, srøitø nemarøbig køn.