Read Namrrik Hechos 25 Bible Online

Hechos 25 - Namrrik bible

Hechos 25

¹Inchen tru pirau karub wanrrab uta kebyaig pøn kwaløm wendau, Festobe Cesareagurri Jerusalénmay nebiben,

²maya sacerdotesmeran karubeløba, katø judíosmeran ashib karubeløba Pabloimburab tru treeg puigwan katøle kønøgønrrab Festoimay ambubelø køn,

³Pablon tsalø køb, Jerusalénmay pegutcha chib. Kaguende nømbe Pablone mayu lara kwetchab isua tamarøb købelø køn.

⁴Inchen Festobe løtappe trenchibig køn: —Pablone Cesareasrø ashib tøgagúig wan cha. Naashib trusrømay menrra yana kømøwatø inrrab isur cha.

⁵Inchawei ñimui utu maig maramigwan ñim asha marøb pønrrabeløbe Cesareasrømay naba kørrørruy chibig køn. I møweinug chigøben kalø marig pønrrøbene, trube øyeeg mara pasran chib truyu waminchab.—

⁶Incha Festobe Jerusalénsrø trune køh, kabe trune y pa kwaløm kø chigøsrøn nømba kørrømisra, Cesareasrømay katø ya, katø kwalømbe tru maig maramigwan asha marøbelø purrainug wamisra, Pablon pera amrrunrrai karubig køn.

⁷Inchen Pablo trusrø pua kebarrubene, tru judíosmera Jerusalénsrøngurri amrrubeløbe tulsrua, nune chigøben truba truba trømbøig marøbig køn chibendø, chigucha ke treeg mariiløbe, wetørranrrab kaimabelø køn.

⁸Inchen Pablobe nøbe ‘treeg mara pasrømur’ chib, trenchib waminchibig køn: —Nabe i tru maig maramigwan martrai Moisés pørig judíosmeraimburabigwan lata, Jerusalén Tiuswei yaweimburab lata, katø Romasrø maya misagweim pala ashib wabig Césarweimburab lata chi kalø mara pasrømur— cha.

⁹Inchendø Festobe judíosmeraba ka tab kørrømisrøg køptø, Pablone trencha payibig køn: —¿Jerusalénmay attragu? cha, tru øyeeg wamindiilan ñuimburabigwan maig kønrrabigwan trusrø ashchab— cha.

¹⁰Inchene Pablobe trenchibig køn: —Roma maya misagweim pala ashib wabig César maig maramigwan asha marøb wainug nabe truyuweim pasrar cha, tru maig kønrrabigwan nan asha maramnug. Pøs judíosmeran chigucha chi kalø mariibe chigagøn cha, ñiguen tab asiinrrun cha.

¹¹Kabe na chigøben kalø mara pasrain kui, ñim nan kwanrrai maramdiig na treekkatig kaig mara pasrøbene, nabe kwanrraptøweim pasrar cha. Inchendø nøm øyeeg mara pasrømøtirru chib kuig ka isiitø webibene, mugucha nane truilane trannrrappe kaimanrrun cha. Nabe Romasrø tru maya misagweim pala ashib karub wabig César maig maramigwan nø asha martrai miamønrrun— chibig køn.

¹²Inchen Festobe tru maig maramigwan nun isum purugub purrabeløba chab waminchabe, trenchibig køn: —Ñi maya misagwan ashib karub wabig César nø asha martrai miaig kuig købene, trube, Césarweimay inrrig— cha. Pablo rey Agripai merrab

¹³Inchen yandø mam kwaløm køsrøn puraiben, rey Agripaba, Bereniceba Feston ‘ka uñgu’ chib tabig wamab punrrab, Cesareasrømay ambubelø køn.

¹⁴Inchen trusrø nøm truba yam kwaløm waraig køppe, Festobe tru Pablon øyeeg nebuigwan reywan trenchib eshkabig køn: —Yube kan møg wan cha, kailan keeri yau Félix kørrømara wannig.

¹⁵Na Jerusalénsrømay ya wabene, truigweimburappe sacerdotesmeran karubeløba, judíosmeran karubelø kølli misaameraba, ke chinetø køn chib nan eshkab amrrubelø køn cha, Pablon truyu møra pasrønrrai kørrømara pasramdiig køn chib.

¹⁶Inchen nabe nømune trencha løtig købig køn cha: “Tru ‘øyeeg kaig mara pasran’ tainabig; tru ‘ñi øyeeg maraweim pasrømøtirru’ chibelø nui malaugue trenchib amrruben, ‘øyeeg kømuig køn’ chib; ‘øyeeg mara pasrømur’ chib nøashib waminchimøwatøbe, romanosmerabe mu møwangucha mana treebe marmeelø køn” cha.

¹⁷Incha truilø nøm yusrømay naba amrruben, chi srarrømøtø, katø kwalømdø, nabe tru maig maramigwan asha marøb wainug wamisra, tru møwan pera amrrunrrai karuig køn cha.

¹⁸Inchendø tru ‘øyeeg mara pasrømøtirru’ chibeløbe amrrubendø, chigøben trømbøig kalø mariilø tre latailøbe marig wesrumeelø køn cha, pøs nabe nø treeg trømbøig mara pasraindøweinrre inditamab isubene.

¹⁹Treeg kømøtø, tru nuimburab waminchib kuibe, tru Tiusweimburabigwan nø marøb unigwan truikkurrin chabah, katø kan møg, Jesús taig, kwaig købigwan, Pablobe trunun kwaig kømøtø, ka øsig wan cha, trenchibrre inchen, trugurrimbatørre inchib kuin køn chibig køn.

²⁰Inchen nabe øyeeg maramigwane mandø maram kui mørmøwa, Jerusalénsrømay inrra kuh chibig kur, tru maig kønrrabigwan trusrø asha marig kønrrig cha.

²¹Inchendø Pablobe tru maig kønrrabigwan Augusto César asha marig kønrrab cha, ka ashib tøgagúig wanrrab cha nø miaig købene, treekkurri Césarweisrømay na øramnegatig nune tab ashib tøgagønrrai karuig købig køn— cha.

²²Inchene Agripabe Feston trenchibig køn: —Nangucha tru møwan mørinrrabna køtan— cha. Inchene Festobe trenchibig køn: —Srøna wamindi mørtrabguen— cha.

²³Indiibe katø kwaløm Agripaba, Bereniceba puppe, purø tabig tamarar ke kan chull asamdiig amrruabe, tru chigøben waminchappa, katø wamindiilan mørtrappa tru tulundzuniisrø kebambambubelø køn, tru suldaumeran karubelø nørreelø køben, katø nørreelø ashib karubelø ciudayuelø købengue. Inchen Festobe Pablon pera amrrungaruben, pera pubelø køn.

²⁴Inchabe Festobe trenchibig køn: —Rey Agripaba køben, ñim maya møguelø yu namba purrabelø køben, i møwan asay cha. I møweimburappe maya judíosmera søteeløba Jerusalénsrø lata, yu Cesarea lata ‘yeegwane øsig uñbasamgaig køn’ chib, trashib amrrubelø køn cha.

²⁵Inchendø nabe nun kwanrrai maramdiig chigucha chi kaig marmuin kui wetørrab, katø tru maig kønrrabigwan asha marig kømigwan Augusto nø asha martrai nøtøwei miaig kuig købene, trusrømay nabe ørtrab isuig køn cha.

²⁶Inchendø tru Pabloimburabigwan treeg treeg køn chib nai ashib karub wabig Augusto purø nuigwan na pøra øramig kan chiguen wetørramur cha. Incha treekkurri ñimuinuumay pera arrur cha, ñi nai tab rey Agripa. Maig kønrrabigwan tab asha kørrømarene, na maitøguen Auguston eshkab pøramig kønrrautan chibig køn.

²⁷Pøs kan kailan keeri yau keerig wabigwan chiburøgurri ‘øyeeg kuig køn’ chib kuigwan chi cha eshkamubendø, na øramibe ke kan ka wainguenig marig lataig punrrautan— chibig køn Festobe.