Read Namrrik Hechos 8 Bible Online

Hechos 8 - Namrrik bible

Hechos 8

¹Inchen Saulobe Estebanwan kweechen, kan øyeeg maramigweim palaig kuig kømømab isub pasrabig køn. Inchen tru kwalømdøwei Jerusalénsrømbe iglesiayuelan purø trømbøig martrab yandø kønab kurrab mendøben mayeeløba Judea pirausrømay køben, Samaria pirausrømay køben, ke kan ørøtø chab ambubelø køn, Cristo nøashib karua øriiløtøh ammø Jerusalén ka kørrømisrøbelø køn.

²Inchen mø møguelø køsrøn Tiusweimburabelan maizhikken elachimø marøbelø Estebanwan isub truba kishib sørabelø køn.

³Inchen Saulobe iglesiayuelan purø trømbøig inchib, pinishinrrab inchib, yamørig kebya, ishumburwan lata, møguelan lata kemøra, unchib warambatø srua webya, kailan keeri yausrø pønsrøbig køn. Tiuswei wam Samariasrø larrøbitsig

⁴Inchen tru Jerusaléngurri webamba ke kan ørøtø chab ambubeløbe chu ambatøgucha Tiuswei tabig srø wamwan eshkab kusrenanøbelø køn.

⁵Inchen tru utuig Felipe Samaria ciudasrømay ya, trusrø Cristoimburabigwan eshkab kusrennøbig køn.

⁶Inchen misaamerabe tulundzuna, Felipe maig wamindigwan mørøb, Tius nøba pasrain kui ashchai Felipe tru mariilan ashib, mørøb inchabe, mayeeløba ke kandø isub, Felipe wamindigwane truba truba tab mørøbelø køn.

⁷Kaguende truba yam misaamerainukkurri trømbøig maringarub kwaimandziimera purø trømbøig trashib webamben, katø truba yam kønønrrab kaima warabelø køben, cojosmera køben, tamariilø købig køn.

⁸Trugurri misaabe tru ciudayube truba truba kasraarabelø køn.

⁹Inchen manasrøngurri kan møg Simón taig tru ciudayube tsubig køn, kaig libron kusrewa, kwaimandzigweimburabigwan marøbig. Samaria misaameran chine mariiløtøga chull asøskøb, nøbe purø nuig misrøb tsubig køn.

¹⁰Inchen nune mu amrrubiitøgucha, kusrebelø lata, chi treeg kømeelø lata nø chi martashchab ke nundø ashibelø kua, trenchibelø køn: —I møøbeguende Tiuswei tru maramburab marig truig køn cha, tru “Purø Nuig”, kui asig.—

¹¹Incha nune ke chi martashchab ashib melabelø køn, kaguende tru nø magia kusrewa mariiløtøga manasrøngurri nømune keerøba, kwaara ashib kønrrai mara srua køben.

¹²Inchen Tius nø ashib karub wainuguig tru tabig srø wamwanba, Jesucristoi munchiwanba Felipebe eshkab kusrennen, trunun kørewabe, ishumbur lata, møguelø lata piu umbu ulsrøbelø køn.

¹³Inchen tru Simóndøweinguen trunun køreb, piu umbu ulsraig køb incha, Felipeba lincha, uñibig køn. Tius nøba pasrain kui ashchai Felipe mariilanba, katø nø maramburab truba nørreelø mariilanba ashabe, Simónbe truba kwaarøb uñibig køn.

¹⁴Inchen Cristo nøashib karua øriilø Jerusalénsrø warabelø tru samariasreelø Tiuswei wamwan uta pønrramisrin køn tai wammørabe, Juanwanba, Pedronba trusrømay ørøbelø køn.

¹⁵Inchen nømbe trusrø puabe, tru kørebelø Espíritu Santon utønrrai, Tiusba waminchibelø køn.

¹⁶Kaguende møigwandøgucha nømuim palabe Espíritu Santo kørraarrumø srø køben, Señor Jesúswei munchiyutø piu umbu ulsrailø købig køn.

¹⁷Incha Pedroba, Juanba truilaim pala tasigwan estsaren, Espíritu Santon utabelø køn.

¹⁸Inchen Cristo nøashib karua øriilø tasigwan truilaim pala estsara, Espíritu Santon kanelan trani ashabe, Simónbe ‘an pagararruah’ chibig køn:

¹⁹—Nangucha øyeeg maramburab maramigwan trannrra cha, nagucha møigweim pala køben nai tasigwan estsarene, truibe Espíritu Santon utønrrain— chib.

²⁰Inchene Pedrobe trenchibig køn: —Ñui anbe ñiba tøgatø pinøbash cha. Kaguende Tius keta tranigwane ñibe andøga pena tøgagømdiig kuitamab indan cha.

²¹Ñibe namui utube chi asamig kawei, chi marøb unamig kawein køn cha. Kaguende ñui manrrøbe Tiuswein kabyube chi sølgandø tabig kømøn cha.

²²Inchawei iig øyeeg trømbøig isuigwan isua møra, Tiusweimay llirau cha. Incha ñui manrrau øyeeg isuigwan Tius ñun ulø payiimíig kønrrai treeg mara kørrømartashchab Tiuswan miau chibig køn.

²³Kaguende ñibe purø trømbøig kan køndzø srurri lataig møbgøliitø netsaig kui ashib, katø kaig maramigugurrimbe webinrraingaig pasrig kui ashib inchar— cha.

²⁴Inchene Simónbe trencha løtabig køn: —Señorwan nayasig ñim miarray cha. Ñi møi øyeeg chib pasrailøbe møikken nan treeg nebumønrrain— cha.

²⁵Incha nømbe maig købigwan eshkab, katø Tiuswei wamwan eshkab waminchib kuabe, Jerusalénmay katø amrrubelø køn tru Cristo nøashib karua øriiløbe. Incha Samariasrø truba yambalø misaamera tsitsø warabsrø, tru tabig srø wamwan eshkab kusrenanøbelø køn. Felipeba, kan Etiopíasrø møøba

²⁶Inchen Felipeimburappe kan Señorwei ángel Felipene trenchib waminchibig køn: —Kurra, Jerusaléngurri Gazamay kørreb maywan tru pørr pineppurab inrrø— cha. Truibe tru mu misag warab waraimø may køn.

²⁷Inchene Felipebe kurrab ibene, mayube kan Etiopía pirausrø kan møg eunuco katabig køn. Truibe, Etiopíasrø reina Candacei kan møg karubig nui reinai anwan kerriguba nø esegabig købig køn. Nøbe Jerusalénsrø Tiuswan køriibala tabig waminchab ya,

²⁸trusrøngurri katøle arrub pasrappe, kaullimera sruin karruyu Tius maig karuigwan eshkabig Isaíaswei pørigwan leb arrub pasrabig køn.

²⁹Inchen Espíritu Santobe Felipene trenchibig køn: —Wetøga ø karruyu kemalla linchi— cha.

³⁰Inchen Felipebe luløb ya, wetøgabe, Tius maig karuigwan eshkabig Isaías pørigwan leb arri mørøbig køn. Inchabe Felipebe trenchibig køn —¿Ñi leb arrigwan chi taig mørtirru?— cha.

³¹Inchene nøbe trenchibig køn: —¿Kan nan mu ‘øyeeg køn’ cha eshkamubene, nabe mandø kui møramø?— cha. Incha nøbe Felipen: —Tiusmanda naim pulu wanrrab nebamø— chibig køn.

³²Tru Tiuswei wam pørigwan nø leb arriibe iig købig køn:“Kan ubishawan latawei kwetchab srua ambig køn cha. Inchen isig parøb kømne,kan ubisha-unø niløtø tsub lataitøwei, nøgucha manchibgucha inchimuig køn cha.

³³Incha nømui merrab israbig luchimubashtø niløtø megaben, tru sølgandø tabigwan nune treeg asha martrab inchimøtø, kagøbashiptindig køn cha.Nuinukkurri katø srøig misag karrab kurrønrrun tamibe kaanrrun cha. Kaguende nui øsig kuigwane yu piraube kerraig købig køn” taigwan.

³⁴Incha tru eunucobe Felipen payibig køn: —Tiusmanda eshkarra cha, ¿Tius maig karuigwan eshkabig nøasiitøwein trenda chindah, kabe mu katøganun trenda chindah?— cha.

³⁵Inchen Felipebe tru nø Tiuswei wam pørigwan leb yaigwan truyugurri pølbasra, Jesúswei tabig srø wamwan eshkab kusrenanøbig køn.

³⁶Incha maywan ambub kua kan pi wabnug puabe, tru møøbe trenchibig køn: —Yube pi wan cha. ¿Na piu umbu ulsraig købsrutah?— cha.

³⁷Inchen Felipebe trenchibig køn: —Ñi ñui manrrau newan kørebene, treeg marig kønrrun— cha: —Inchen møøbe trenchibig køn Jesucristobe Tiuswei Nusrkain kui isua pasrar— cha.

³⁸Incha nøm ambub kuin karrun Felipebe tru møwan pasramisringaru chibig køn. Incha pailøba piumay pinaamba, Felipebe nun piu umbu ulsrøbig køn.

³⁹Incha piugurri webambene, Señorwei Espíritube møi møi Felipen kusrua, srua iben, tru møøbe Felipen mas ashippe ashmubendø, nui maywan kasrag inrraibig køn.

⁴⁰Incha Felipebe Azoto ciudasrø pasraptindinaben, trusrø Jesucristoi tabig srø wamwan ciudamørig eshkab kusrenanøb pureb ya, Cesarea ciudasrø pubig køn.