Read Namrrik Romanos 12 Bible Online

Romanos 12 - Namrrik bible

Romanos 12

¹Inchawei nai nunelø, Tiuswei lastima asiitøga nabe ñimun tiusmanda trenchinrrab inchar, ñim møitøgucha ñimui asrmeran kan øsiguig keta tranøb lataig Tiuswan keta tranay cha, Tiusweindø kønrrai tarømarig, nuin kabyu truba tab kui asig, treekke. Iig køn, tru ñim øsig amønaigu Tiusweimburab køriibala tabig maramibe.

²Møin kwaløm pirau maig pub arrubigu ñimgucha trumay ambub pønrrønrrab kømøtø pønrray. Treeg kømøtø, Cristogurri ñimui srøig peemay isuitøga ñimui amønamigwan yunømariilø kuy. Treeg marabe, Tiuswei isuigube ñim maramig nø møigwan maramig palaiwein kui ñimbe nebua ashchabguen, tru purø tabigwanba, nuinug truba tab kui asigwanba, newan tabigwanba.

³Tius nui ka yandø tab indigwan nan traniitøga nabe ñim mayeelan trendamønrrun: Møitøgucha ñim mayangatig kuigugurrimbe mas nuig kurmab inchib pasrønrrab kømø cha. Masken treeg kømøtø, tab isua pasramig køn cha, Tius møigwandøgucha pirisha ketig, tru isubigwan Cristoinug maya pasra tøgagúi maig køben, treetøh kuy cha.

⁴Pøs nambe møitøgucha asrbe kandø købendø, namui asrube chine pønrran. Inchendø truiløbe chi maramigwan mayambabe truigwandøwei marøbelø kømøn.

⁵Øyeetøwei namgucha truba nu købendø, Cristoinuube nambe kan asrtø misra, nambe mayeeløba nøørø kønrrab kømøtø, kangurrin kangurri kanbalatø misra pønrrer.

⁶Tiusbe namun chigøben peg peg marøbelø kønrrai keta tranøppe, nui ka yandø tab indig maig køben, treeg tranig køn. Pøs trube, Tius maig eshkangaruigwan wamindamigwan ketig uta tøgaibe nui isubigwan Cristoinug maya pasra tøgagúig maig køben, treetø waminchi.

⁷Katøganelan purugub megamigwan ketig uta tøgaibe purugumigu purugu. Kusrenanøbig kømigwan ketig uta tøgaibe kusrenanamigwan kusrenan.

⁸Katøganelan øyamay maramdiig køn chib waminchibig kømigwan uta tøgaibe, øyamay maramdiig køn chib waminchi. Chigøben palai melabelan tranøbiibe, merøbala kømø, treeg tranøb; chi maramigwan nø pera marøb pasramigwan uta tøgaibe, trunun martrab isua pera marøb; lastima ashibig kømigwan uta tøgaibe, larrø tab kui kasraatø marøb; treeg maramig køn. Tiuswei ureemerabe øyamay marøb kømigwan waminchibig

⁹Ñimui undag købiibe ka palatø kømø, cierton kømig køn. Kaig maramigwane trømbøig kui mørøb, tabig maramigwane si, merrarrawa maray.

¹⁰Ñimbe kangurrin kangurri trag nunelø lataig undaarayay. Nayasig tab kønrrain kømø, katøganelayasig tab kønrrai, ñimbe treeg marøbelø kuy, ambugurri igurri maig købash kømø.

¹¹Ñui chi maramigwane marig kørrømisrtrai marøb, pøilø kømumig køn, Señorweiwane martrurmab isua marøb.

¹²Cristoba purø tabig tørbilabigu pønrramigwan ñim isua munig melaigu kasrag pønrrab, chigøben isumdiig murig pub arrubigu tammay melabig melab, Tiusba wamindamigwane elachimø, marøbig marøb inday.

¹³Tiuswei misaameran chigøben palabig arrubigu purugub, møiløgøben ñimui yau pubelane tabig wamab, treeg maramig køn ñimbe.

¹⁴Ñimun kaig marøbelane ‘chigøben trømbøig nebubash’ chib, treeg inchimøtø; ‘mayanguen tabig nebunrrun’ chib, treeg indamig køn.

¹⁵Kasraatø purrøbene, tru kasraatø purrabeløba lata kasraarab; kishib purrøbene, tru kishib purrabeløba lata kishib inday.

¹⁶Ambugurri, igurri lata tabig lincha warab, truba nørreelø kømmørø inchimøtø, chigucha kømø misaazheeløba chi pesriig kui mørmø linchibelø kømig køn. Ñim ñimuinetø truba kusrebelø kermab isumøtay.

¹⁷Ñimun mugøben kaig maren, truburø ñimgucha treetøwei marøb kønrrab kømøtø, ñimbe maya misaamerai merrab tabigwan marøbelø kønrrab inday.

¹⁸Ñimuimburappe, ñimun mayangatig tabig waramdiig køben mu misaamerabatøgucha ambugurri, igurri tabig warønrrab inday.

¹⁹Ñim, nai undaarailø, kaig marimburø ñimashib treetøwei pagaranrrab inchimøtø, Tiuswei namig købigwan nømuim pala arrubasay. Kaguende Tiuswei wamyube øyeeg chibig pørig pasran: “Kaig marimburø pagaramibe nain køn cha. Truburøbe na asha maramig køn” cha, Señorbe trendan.

²⁰Masken treeg inchimøtø:“Ñun ashig kømui inchibig chugurri mamig kaagúin købene, manrrai tranøb, pi mulgwai inchene, mutchai pi srørrøb indamig køn cha.Treeg marabe, tru ñun kalø marimburø nune nuba køriimarøb may parra kørrømartrabguen” cha.

²¹Tru chigurrimbunø kaibe ñun nø kananrrain kømøtø, tru chigurrimbunø kaigwane tabiitøga kanamig køn ñibe.