Read Namrrik Romanos 15 Bible Online

Romanos 15 - Namrrik bible

Romanos 15

¹Inchawei nam Señorweimburabigu tabig mur pønrrabeløbe tru Señorweimburabigu kullaateelan nambe purugumig køn, nam namasiitøwei tab kui mørøb pønrrømøtø.

²Nambe møitøgucha namui nuneg kullaatiigwan tab kui mørtrai maramig køn nuimburab tab kønrrai, Señorweimburabigu nurab inrrai marøb.

³Kaguende Cristo købenguen nøasiitøwei tab kui mørøb pasramigwan lamøtø, Tiuswei wamwan pørigu Cristo maig taimbala kuig køn: “Tru tsalø wamabelø ñi Tiuswan tsalø wamiiløbe naim palatø arrig køn” taig.

⁴Kaguende kerrigu tru merrabsrø Tiuswei wamyu pøriibe namun kusrenanrrab pørig købig køn, tru nam tammay melabig melaikkurrimba, tru Tiuswei wam pørig namun tabig purugub wamgurrimba, nam Tiuswei tørguegwalmabigu nam Cristoba kanbalatø pønrramigwan isua muniiramig tøgagønrrai.

⁵Inchen tru namun tammay melabig melamigwan tranøb, katø tru namun tabig purugub Tiusbe ñim kanikkurri kanikkurri kandø isua pønrramigwan trannrraimab isur, Cristo Jesús nø maig isuig køben, treetøwei,

⁶ñim mayeeløba kandø isua, kan wamdø misra namui Señor Jesucristoi Møskai Tiuswan truba tabig wamindamig kønrrai. Tiuswei tabig srø wambe mu misaameraindøgucha køn

⁷Inchawei ñimbe ambugurri, igurri wamab utay, Cristo ñimun utab lataitøweingue Tiusweyasig tørguegwalmabig kønrrai.

⁸Pøs nabe ñimun trendamønrrun: Cristobe judíosmera, tru circuncidawarmeran purugub meganrrab arrig køn cha, tru Tiuswan mørøbelø merrabsrø kølli misaameran nø maig martrab kørrømisrig købigwan treeg marig kørrømisrtrai, øyamay Cristobe kenamartrab indig køn, Tiusbe nø maig martrab taigwane treeg marøbig kui ashchai.

⁹Incha katø trutø kømøtø, Cristobe arruppe, tru judíos kømø misaamera nømun Tius lastima asimburø Tiuswan maya nuguen tab indig kønrrai arrig køn. Tiuswei wamwan pørigu maig taimbala:“Øyeekkurri nabe judíos kømø misaamerai utu ñi, Tiuswan tabig waminchib, ñui munchiwan cantab indamønrrun” cha, trendaig.

¹⁰Katø katøganbaløsrø trenchibig køn:“Ñim, judíos kømø misaamera, Tiuswei misaameraba truba kasraaray” cha.

¹¹Incha katøganbaløsrø katø trenchibig køn:“Mayeelø judíos kømø misaamera Señorwan purø tabig waminchib, mu misaameratøgucha nun purø tabig waminday” cha.

¹²Katø Isaíaskucha øyeeg taig køn:“Isaíweinukkurri arrubig kan tusrwan srøldø pasram parig lataigugurri srøig kal-lab lataitøwei katøgan srøig kurra,judíos kømø misaameran ashib karub pasrønrrab pasramisren, truiløbe nøm isua muniirab melaigwan ke nuinuutø pasra tøgagønrrun” cha.

¹³Pøs tru nam isua muniirab melamigwan tranøb Tiusbe tru ñim nun køreikkurri maya nu kømburab kasrag købigwanba, chi isumgaig tab købigwanba ñimun netsøganrrai isur, tru isua munig melaig, truitø tøgagømburab tøgagønrrai Espíritu Santoi maramburab mariitøga. Jesucristo maig karuilan Pablo mariilø

¹⁴Pøs, nai nunelø, nabe ñimuimburab øyeeg kuin kui asha pasrar, tab inchibelø kømitø netsailø, chigurrimbunø nebua asamig truitø netsailø, ambugurri igurri maig maramigwan waminchib eshkab pønrrønrrapteelø, ñimbe treelø kui.

¹⁵Inchendø nabe ñimun iigwan pørøppe, kanmaytø murtø trencha pørar, tru chimerayube maig kømigwan ñimun katøle isunanrrab isua, nui ka yandø tab indigwan Tius nan tranikkurri,

¹⁶tru na Cristo Jesúsweiwan judíos kømø misaamerayasig na marøb meganrrai. Pøs, na Tiuswei tru tabig srø wamwangøba eshkab kusrenanøbig kur, kan sacerdote Tiuswan keta tranøb latawei tru judíos kømø misaameran na Tiuswan keta tranen, nø ka utamdeelø kønrrai, nuyasiitø tarømariilø Espíritu Santogurri.

¹⁷Inchawei nabe Cristo Jesúsweinuube truba tab kui mørøb pasramig tøga pasrar, na mariilø Tiusweimburabeløyu.

¹⁸Pøs nabe katøgan chi pegwan waminchab inchimøtø, na waminchippe, tru judíos kømø misaamera Tiuswan møra marøbelø kønrrai, tru nagurri Cristo chi mariilandø wamindamønrrun. Iigwane nabe marøppe, wamindiiløtøgaba, mariiløtøgaba,

¹⁹Tius naba pasrain kui asamig nørreelø mariiløtøgaba, kwaara asha kønrrai mariiløtøgaba, iilai tru maramburab mariitøga marøb, katø Tiuswei Espíritui tru maramburab mariitøga marøb indiilan, nabe trunundø wamindamønrrun. Øyamay Jerusalénsrøngurri chutøgucha Ilírico pirausrøngatig kerrigu chigucha palømíig na Cristoi tabig srø wamwan eshkab kusrenanig købig køn.

²⁰Pøs nabe Criston tru mana wamindi møriimøsrø, treegu tru tabig srø wamwan eshkab kusrenanøb pasramigwan mas isua martrab inchibig kur, Cristoi tabig srø wamwan møikkøben eshkab kusrennøbig pølbasra marinug srøig itø marøb kebimønrrab.

²¹Masken Tiuswei wamwan pørig maig taimbala:“Managuen nuimburabigwan mu wammørøsraimeelø købelø nun nebua ashib, wamindigwan mana mørmeelø købelø chigúi nebua mørøb inchun” taig. Pablo Romasrømay inrrab isub

²²Inchawei øyeekkurri nabe katø katø ñimun ashchab attrab inchen, arrumønrrai marinab pasrabig kur.

²³Inchendø møimbe yu na tsuim pirausrømbe naimbe yandø chu maramig kawein køben, katø merrab pilamerawansrøngurri ñimun ashchab truba arrug kui megaig køppe,

²⁴Españasrømay na inrrab arrua, pua purainrrab inchar. Kaguende nabe ñimun asha purainrrab isur, tru petø purainrrab arrua, kan maya yana ñimba lindigu truba kasraatø puraya, na trusrømay yamigwan ñim nan purugunrrai.

²⁵Inchendø møimbe nabe Jerusalénsrømay inrrab yar Tiuswei misaameran an purugúigwan trannrrab.

²⁶Kaguende macedoniasreeløba, acayasreeløbabe tru Jerusalénsrø Tiuswei misaamerai utu waachameran purugumig an tulisamig nømune tabig asønaig køn.

²⁷Pøs nømbe tabig martrab isua marig køn. Inchagucha nømbe judíosmerane uløweim pønrran. Kaguende tru judíos kømø misaamerama Tiusweimburabig purø tabig tru judíosmeraiwan nøm tøga utab pønrraibe, nømgurringucha nøm chi tøgagúiløtøga judíosmeran tranøb pirisamig ulø pønrran.

²⁸Incha i maramigwan nabe yandø chab mara, tru kan mamig misrizhig latawei tru an purugúigwan nømun purøørabe, Españasrømay inrrab arrua, ñimun ashchab arrumønrrun.

²⁹Incha na ñimuisrømay arruppe, Cristoi mayanguen tabigwan ñimun pirishinrrab tøgagømburab tøga arrum kui nabe asha pasrar.

³⁰Inchendø nabe, nai nunelan, namui Señor Jesucristogurrimba, Espíritu Santoi undag købikkurrimba, naimburab ñim Tiusba truba rugab wamindigu, tiusmanda naba kanbalatø misrtrai chinrrab, Tiuswan truba truba miab melamigu.

³¹Pøs tru Judea pirau Jesucriston chi kørenrrab inchimø misaamerai tasku na kebeñmønrraimba, katø tru Jerusalénsrø Tiuswei misaamera tru an purugúig srua yaigwan tabig kui ashib utønrraimba Tiuswan miarrunrrigay,

³²pøs Tius treeg kønrrain købene, na ñimuisrø arruppe, truba truba kasrag pua, ñimba kanbalatø pishindø tab wamig kønrrai.

³³Inchen Tius tru chi isumgaig tab købiibe ñim mayeeløba pasrønrrai isur. Treeg kønrrun.