Read Namrrik Romanos 8 Bible Online

Romanos 8 - Namrrik bible

Romanos 8

¹Inchawei møimbe Cristo Jesúsba kanbalatø pønrrabelaimbe møra melønrrai maramibe yandø chigaagøn.

²Kaguende Espíritu tru martrai karua pasrig øsig kømig Cristo Jesúsweinug pasrabiibe, tru kaig marøbig kønrrai indamba, kwamig kønrrai indamba tru martrai karua pasrig treeg inchibigugurri nane wesruig køn.

³Kaguende tru maig maramigwan martrai Moisés pøriibe truburab martrab kaimaigwan Tiusbe marig køn, pøs tru pøriibe yandø truburab martrabgaig køben, tru namui trendø kaig kuinaigu truikkurri. Inchen Tiusbe nui trag Nusrkai managuen kaig marmíigwan kan kaig marøb møg kui lataig, kaig mariilaimburø kwanrrai øra, øyamay tru kaig marøb kømig namuinug maringarub pasrabigwane chinchaingaig kørrømara pasran,

⁴tru maig maramigwan martrai pørigu sølgandø maig marøb kømigwan karuilø namuinug marig kørrømisrtrai, tru namui trendø kaig kuinaigu marøb amønainug kømøtø, tru Espíritu Santo maig kønrrain køben marøb amøñibelainug.

⁵Tru trendø kaig kuinaigu treegwan marøb amøñibeløbe, ka truburabigwandø isuben, trune tru Espíritu Santo maig amøñinrrai inchen treegwan marøb amøñibeløbe, Espíritu Santoimburabigwan isubelø køn.

⁶Inchen tru trendø kaig kuinaigu isub pasraibe Tiuswan tarømisra, kwaig lataig pasraig, treeg køben, trune Espíritu Santo maig kønrrain køben treegwan isub pasraibe srøig øsig kømiba, Tiusba chi isumgaig tab kømiba, treeg køn.

⁷Pøs tru trendø kaig kuinaigu treeg isub tøga pasraibe Tiuswan tsalø isub pasran, kaguende Tiuswei tru maig maramigwan martrai karuilan møra martrab inchimøwei, katø truilan martrab kaimabwei indig kua.

⁸Incha tru trendø kaig kuinaigu isubig maig karuben treegwan møra marøb amøñibeløbe, Tiuswane tab kui wanrrai martrab kaiman.

⁹Inchen ñimbe tru ñimui trendø kaig kuinaigu isubig maig karuben treegwan møra marøb amøñibelø kømøtø, Espíritu Santo maig amøñinrrain karuben treeg amøñibelø køn. Treetøgucha Tiuswei Espíritu ñimuinug pasrøbene kønrrun. Pøs møikkøben Cristoi Espíritun chigaibe, Cristoin kømøn.

¹⁰Inchendø Cristo ñimuinug pasraikkurrimbe asrbe kaig mariiløgurri kwamig kuindøgucha, Tius nøba ñimun kaig marmeelø lataig tabig kørrømara pønsraikkurri, ñimui espíritube øsig pasran.

¹¹Inchen Tiuswei Espíritu Jesúswan kwailai utugurri katøle øsiirangarubig ñimuinug pasrøbene, Criston kwailai utugurri tru katøle kusrubiibe ñimui ka pinønrrab asrmerangucha tru nui Espíritu Santo ñimuinug pasrabiitøga øsig kømigwan tranrrun.

¹²Inchawei, nai nunelø, nambe uløbe pønrrøbendø, tru trendø kaig kuinaigu tru kaig maramigwan uløgucha pønrrømer, truig maig marøg kuinchen marøb pønrrønrrab,

¹³kaguende tru trendø kaig kuinaigu isubig maig karuben treegwan marøb amøñabe, ñimbe kwanrrun Tius malø asamikkaig. Inchendø tru ñim asru kaig marøb tøga pønrraigwan Espíritu Santotøga kwai lataig kønrrai kørrømarabe, ñimbe managatig Tiusba øsig kønrrun.

¹⁴Mayeeløba Tiuswei Espíritu maig amøñinrrain køben truwan ambubeløbe Tiuswei ureemera køn.

¹⁵Pøs ñim Espíritu Santon utiibe ke larrø kwaarøsra srua kuilø lataig kørig kuindø katøle treeg melønrrai marøbigwan uta pønrrømøtø, kan trag ureemera lataig kønrrai marøb Espíritu Santon utig køn. Incha nambe nøgurri Tiuswan: “Abba, nai Møskain” chib wamabelø ker.

¹⁶Inchen tru Espíritu Santotøwei namui espíritune eshkabig køn, nambe Tiuswei ureemera kui.

¹⁷Trube, nam nui ureemera kuig køppe, nø keta tranamig tøgagúigwangucha utønrrabelø ker, Tius tru keta tranamigwan nam utønrrabelø køb, katø Cristo utigwan namgucha kanguelarrøtø utønrrabelø købgue. Pøs ka yandø kømø, cierton nun chine nebuinab megaigwan namgucha chine puraambub meløwabe køn, nøba kanbalatø tørguegwalmabiisrø purramig kønrraimbe. Tru purø tabig wendøsrø attrabig

¹⁸Pøs møin kwaløm nam chine kaig nebuinab melaibe tru tørguegwalmabig namun kenamarig kønrrabiibabe, ni kan ‘øyeeg køn’ cha waminchibguen wamindamgaig purø nuig køn.

¹⁹Tius chigurrimbunø mara pønsrailøbe truba truba ashig kui muniirab køn Tiuswei ureemera tørguegwalmabelø kenamisramigwan.

²⁰Kaguende tru chigurrimbunø mara pønsrailøbe øyeeg mumayguen tab pumuig pønrramig kønrrain kuig køn, nøm treeg pønrrønrrab indikkurrin kømøtø, Tius nø trendø treeg kønrrai marikkurri. Inchendø treetø kørrømisrtrain kømøtø muniiramigwan tøgaig marig kua,

²¹tru chigurrimbunø mara pønsrailøtøweinguen minchib trerab inrrai marigugurri mas treramønrrai wesrailø kønrrun, tru Tiuswei ureemera purø nuig purø tabigu webamba pønrraigu truiløgucha pønsrailø kønrrab.

²²Pøs tru chigurrimbunø mara pønsrailøbe møin kwalømgatig kan ishuumisag unø tammisrtrab truba truba mullib pusrkwai inchib lataig indi aser.

²³Pøs tru treeg tab kømui pønrrappe, tru chigurrimbunø mara pønsrailø truiløtø kømøtø, Espíritu Santon namun pølbasra tranigwan uta tøgarmera namdøweinguen namui umbu truba truba mullib pusrkwai inchib lataitøweim pønrrer, Tius tru namun nui trag ureg lataig mariilø kømigwan truba truba muniirab, tru namui pirau asrmeran kaigyugurri wesruilø kømigwan.

²⁴Kaguende treeg kønrraitamab isua muniirab melaigu kaigyugurri wesrailø pønrrer. Pøs tru nam muniirab melaigwan nam chab ashaguen pønrraimbe, trube, tru muniirab melamigwane chinchab muniiramubsruinrrun. ¿Kaguen yandø chab ashaguen pønrraigwane chiwan muniiraiasamørra?

²⁵Inchen nam chi nebua asiimíigwan ke tøgagønrrurmab isua muniirab meløwabe, munig melabiitø munig meler.

²⁶Katø treetøwei Espíritu Santobe namui kullag kuigu purugubig køn. Pøs nambe Tiusba wamindigu chi wamindam kuinguen mørmuben, Espíritube namuimburø nø purøbasramisra miappe, wamdøgabe ni mandø chibguen miamgailan truba truba nu israb miabig køn.

²⁷Inchen Tius namui manrrømeran maig køtashchab umbusrøngue tab ashibiibe, Espíritu Santo nø maig isua pasraigwan ashibig køn. Kaguende Espíritube Tius maig kønrrain køben, trumay Tiuswei misaamerai purøwaminchib miabig køn. Tius namun kaigyugurri wesranrrab øyeeg marig

²⁸Tiuswan undaguelaimbe chitøgucha pub arrubiibe tabguen kønrrai Tiusbe treeg marøbig kui nambe ashibelø ker, tru nø martrab isua tøgagúig truig maig køben trumay treeg wamiilaimbe.

²⁹Tius tru manasrøwei nø asiilane manasrøwei kanmaytø lawa wesrabgucha wesraig kuig køn, nui Nusrkai maig køben, treeløtøwei misrtrai, Nusrkaimbe truba nørrø nunelø mayeelai utu nømerrig kønrrai.

³⁰Incha tru manasrøwei kanmaytø treelø kønrrai lawa wesrailane katø nøbe nui misaamera misrtrai wama, katø tru nø wamiilane chi kaig kømeelø lataig tabig pønrrønrrai mara, tru treeg tabelø kønrrai kørrømariilane nui tørguegwalmabigugucha tøgatø pønrrønrrai marig køn.

³¹¿Trube, iibe øyeeg købene, nambe mandø chinrrab køh? Tiusbe namuingatø pasrøbene ¿namune mugøben søtøbasramisrøb kurringucha, chigúin kønrrautah?

³²Tiusbe nui trag Nusrkawanguen namun tranmønrrab inchimøtø, nam mayeelayasig kwanrraima traniibe, ¿chigurrimbunø tranamburab namun tranamigwangucha tranmønrraitarru, Nusrkaimba kegøtø?

³³¿Tius nø lawa wesruilane mu kui ‘øyeeg, øyeeg kaig marøbelø køn’ chinrrautah? Pøs, chi kaig kømeelø lataig tabig pønsrøbiibe, Tius, nø køn.

³⁴Trube, ¿kaigyu pønrrønrrai, mu pønsrønrraitama chindah? Pøs Cristo Jesúsbe mana treeg martrab kø. Kaguende nøbe kwawa, katø trutø kømøtø, nøbe katøle øsiirawa, Tiuswei kusrmaygatø wan, katø namuyasig purøwaminchib.

³⁵¿Cristoi undag købigugurri namune mu kui tarømartrab kø? ¿Chine isui melamig pub arrubiiteh, kabe chigøben murig pui melamig arrubiiteh, kabe kaig indinab melamig arrubiiteh, kabe mamig kaagøbig parø arrubiiteh, kabe asru kemig chigucha kaagøb arrubiiteh, kabe chigøben kørig kømdiig pub arrubiiteh, kabe kweecha petiilø kømig arrubiiteh?

³⁶Pøs Tiuswei wamwan pøriguma trenchibig køn:“Nambe ñigurri chu urastøgucha kwaitø, kwaitø meler cha. Namune ubishameran kweetsamsrømay srua ambamig kui lataig mara tøgagúilø ker” cha.

³⁷Inchendø chigurrimbunø øyeeg pub arrubigu chinchaingaig kanawa webamba pønrrer, tru namun undaarabikkurri.

³⁸Pøs Tiuswei undag købigwane ni chigucha tarømartrab kaimanrrab kui nabe asha pasrar, kwamig lata, øsig kømig lata, ángelesmera lata, nøm asha karub pønrrabelø lata, møin kwalømig lata, katø wendø attrabig lata, katø maramburab marøb pønrrabelø lata,

³⁹purø palasriig lata, purø umbusriig lata, chigurrimbunø Tius mara pønsrailøyu købeløbe møikkucha namune chinchagucha tarømartrab kaimanrrun tru Tiuswei undag købig namui Señor Cristo Jesúsweinug pasrabigugurrimbe.