Read Namrrik 1 Corintios 16 Bible Online

1 Corintios 16 - Namrrik bible

1 Corintios 16

¹Tru Jerusalénsrø Tiuswei misaamerayasig an purugúig utamigweimburappe, tru Galacia pirausrø iglesiameran na mandø martrai karua pønsraig køben, ñimgucha treetøwei martrigay.

²Ñim møitøgucha an maya tulishabe, truyugurri tarømara, esegab amrrigay truaalømmørig, na trusrø puben, ñim ke møin tulishib mendaptindamig kømønrrai.

³Incha ñim møilan karua øramdeelø kui asha kørrømariilan, na trusrø puabe, tru Jerusalénsrømay trana øramig ñim an ketigwan nømun trana ørøppe, kan kilga pøra, tøga trana øramønrrun, tru i karua øriiløbe chi isumga møguelø kui nøm ashchai.

⁴Inchen naimburab nagucha yamig søl kønrraptiig købene, trube, na iben, nømbe naba amrrunrrun. Pablo nui lincha amrrabeløba mandø ambamigwan wamindig

⁵Nabe Macedonia pirauwansrø pureb arrua, yandø ñimuisrø pumønrrun, kaguende nabe Macedoniawansrø pureb yamig kua.

⁶Inchippa kan maya yanagatig kørrømisrisruandøbe, ñimba ka kørrømisramønrrun, kabe tru pishim pølmera chab purayamnegatikken, nan chumay yamig nebuben, nai yamigu ñim purugumig kønrrai.

⁷Kaguende møimbe ñimun ke ka petø asha purainrraptø arrug kømøtan. Pøs Señor nan treeg kønrrain købene, kan maya yanagatig ñimba kørrømisrtrab attrab isur.

⁸Inchendø Pentecostés kwaløm pumnegatig nabe yu Efeso kørrømisrtrab kur.

⁹Kaguende yube kan yaskab purø nuig nayasig kurin køn, Tiusweiwan wamindig nu larrøbichaptiikke. Inchendø marmønrrai nan søtølulrrabelø truba truba køn.

¹⁰Inchippa Timoteo trusrø pubene, ñimui utu chi kørig kui inchimønrrai inchigay. Kaguende nøgucha Señorwei marameløyu na lataitøwei marøb megabig køn.

¹¹Inchawei nune møitøgucha palabinøtø inchib kønrrab kømø, masken chi isumø inrrai purugua ørtrigay, naimay katø attrai. Kaguende nabe namui nunelanba, nunba munig megar.

¹²Inchen namui nuneg Apolosweimburappe, tru nunelø ñimuisrømay amrrabeløba nungucha na tiusmanda maya lincha irra taingucha, møimbatøbe nøbe chi inrrab inchimøn. Inchendø nun chu uras yamig pubene, inrrab kuinrrun. Maig amønamigwan treeg melønrrai wamindiiløba, ‘ka amøñigueh’ tailøba

¹³Tab ashiptø pønrray. Pesan amøñimøtø, isubigwan Cristoinug tøga pasra pønrraigu mur pønrrab, chishkandø møgueløsun pønrrabelø køb, trurrigu murelø kuy.

¹⁴Incha chiwandøgucha ñim marøppe, undag købiitøga maramig køn.

¹⁵Nai nunelø, ñimbe ashibelø køn tru Acaya pirausrø Estéfanaswei yaueløbe ke srøsrøzhiitø nømmerrig Tiuswan nebua ashibelø misra, Tiuswei misaameran nømbe purugunrrab pønrramisrigwan.

¹⁶Inchawei nabe ñimun øyeeg melørrunrrigay chinrrab inchar, tru øyeeg melabelane nøm maig chiben mørøb melønrrigay cha, katø tru mayeelø i maramigwan purugub marøb melabelan treetøweingue.

¹⁷Nane truba kasrag køtan Estéfanas køben, Fortunato køben, Acaico køben amrruin køben. Kaguende ñim mu kaagua, purugunrrab kaimaigwan nømbe nan purugua,

¹⁸pøs truiløbe nai isubigu lata, ñimui isubigu lata chi isumikkaig, tab kønrrai marig køn. Øyeeg møgueløbe mayanguen tab indig kønrrabelø køn. ‘Ka amøñigueh’ taiba, ‘ungwa’ taiba

¹⁹Tru Asia pirausrø iglesiamera ñim corintosreelan ‘ka amøñigueh’ cha øran. Aquilaba, Priscilaba, katø iglesia nømui yau tulundzunabelø, truilø chigucha Señorwei munchiyu ‘mayanguen tab ka amøñigueh’ cha øran.

²⁰Katø mayeelø nuneløgucha ñimun ‘ka amøñigueh’ cha øran. Ñimbe kangurrin kangurri ‘ka amøñigueh’ chib, Tiuswei undag købiitøga tasig traniyay.

²¹I ‘ka amøñigueh’ taigwan na Pablo ñimun naashib nai taska pørar.

²²Møikkøben Señørwan undaguig kømíigwane Tiuswei namig købig nuim pala købash. ¡Namui Señor Jesucristo amø!

²³Señør Jesúswei tru ka yandø tab indiibe ñimba pasrønrrai inchar.

²⁴Cristo Jesúsweinug nai undag købiibe ñim mayeeløba pasrønrrun. Treeg kønrrun.