Read Namrrik 2 Corintios 2 Bible Online

2 Corintios 2 - Namrrik bible

2 Corintios 2

¹Inchawei na katøle ñimuisrømay arruppe, nabe ñimun truba truba isui inchain kømøtø, attrab isuig kuig køn.

²Kaguende na ñimun isui inchai marene, trube, ¿nane mu kasraaraniasamø? ¿Tru na isui inchai mariiløtøwei kasraaranmønrraitarru?

³Inchawei nabe øyeekkurri tru merrab kilgawan na pørøppe, tru nanguen kasraaranrrabelø na trusrø puben, nan isui indingarumønrraim pørig køn. Pøs na kasrag pasrøbene, ñimgucha chiguen kømøtø, mayeeløba treetøwei pønrrønrraimab isuague.

⁴Kaguende nabe ñimun pørøppe, truba truba isui pørig kuig køn, nai manrraube purø tab kømui, truba kappin kørrøgøb. Kabe na ñimun truba truba isui inchai martrab kømøtø, nabe ñimun truba truba undaguig kui ashchai indig købig køn. Kalø marøbigwan Pablo truburø ulø paymub

⁵Tru øyeeg isuim pasrønrrai møikkøben treeg marøbiibe, nandø kømøtø, kan mayangatig ñim mayeelanba isui inchai mara pasran tamønrrun, ke menrra inchimønrraptø.

⁶Inchawei tru møwan ñim mayeelø lutauelø misra, nui kalø marigwan øl martrab ñim asha mariibe yandø tsabø køn.

⁷Truigwane yandø ulø payib kømø, pesannab, masken kuñab purugumig køn, isubiitø yandø kerriguwan mandøguen kømui inchimønrrai.

⁸Inchawei nabe ñimun tru møweimburab ñimui undag købigwan katøle tiusmanda kenamaray tamønrrun, ñim undaguelø kui nø ashchai.

⁹Kaguende na ñimun pørøppe, øyeegwan isua pørig køn, chiyutøgucha maig taigwan ñim mørøbelø køtashchab ashchab isua.

¹⁰Inchawei chigøben kalø marøbigwan ñim chi ulø paymø pesannanrrab isua kørrømarene, nagucha nune treetøwei ulø paymø kørrømisramønrrun. Pøs chi kalø marigwan na ulø paymø, pesannappe, (ulø paymumig chi pønrraig kuig køh chindindøbe køben) ñimgurri treegwan marig køn, Señor Jesucristoi merrab,

¹¹namun Satanás kegørrøsrkøb nø kanailø kømønrrab. Kaguende nambe tsabø ashibelø ker nøbe chitø martrab inchibig kuigwan. Cristotøgabe kanawa puraamba pønrramig

¹²Na Troas ciudasrø, Cristoi tabig srø wamwan eshkab kusrenanrrab pubene, Señorweimburabelan maramig yaskappe tabig kurøppe kurendø,

¹³nai nuneg Tito trusrø mu kaagøptinchene, nane nai isubigube ni mumayguen kømuben, nabe trusrøngurri nømun ungwa chippa, Macedoniasrømay ibig kur. Tiuswan ‘ungwa, ungwa’ taig

¹⁴Inchendø Tiuswan ‘mayanguen ungwa, ungwa’ chinrrab, Cristoinuube nam kaigwan kanawa ¡katø! luchimíig tsimaytø puraambub ambamig kønrrai marøb, katø tru Cristoimburab nebua asiiløbe purø may irrabzhig lataig chutøgucha namgurri larrøbitchai marøb Tiuswan.

¹⁵Kaguende Tiusweimbe nambe Cristoi tru purø may irrabzhig latailø ker, kaigyugurri wesraig pønrrabelai lata, tru managatig pinab pinamsrømay amrrab pønrrabelai lata.

¹⁶Incha møilø tru pinab pinamsrømay amrrabelaimbe tru irrabiibe kwaitø irrøben, katøganelø kaigyugurri wesrailaimbe tru may irrabiibe øsig kømigwan irrabig køn. ¿Inchen øyeegwan marøb pasrønrraptiibe mu kø chinderah?

¹⁷Katøganelø misaamera truba nørrø tru Tiuswei wamwan kan chigucha kømíig kui lataig an marøb srua llirabelø latawei, nambe treetøwei marøb pønrrømeelø ker. Treeg kømøtø, Tiuswei merrab waminchippe, maig wamindamigwan søra kømø, sølwan waminchib, Tius øriilø kermab isua, Cristogurri waminchibelø ker.