Read Namrrik 2 Corintios 3 Bible Online

2 Corintios 3 - Namrrik bible

2 Corintios 3

¹¿Kabe nambe katøguen namashib chi isumgaig ‘tabelø ker’ chib waminchib pønrrabra chindah? ¿Kabe nambe katøganelø latawei chi isumgaig tabelø kui ashchai, kilga pøriilø ñimun tranamig, kabe ñimgurri kilga pøriilø namun tranamig palaim pønrrabra chindah?

²Nam mailø kuigwan treeg asønanrrabelø tru namuyasig kilga pørig latailøbe ñimwein køn, tru ñim purø tabig amønaig, tru namui manrrømerayu pørig pasrabig, mu misaameratøgucha ñimun mumera køtashib, mailø køtashib ashib tøgagúilø.

³Ñimbe tørgandø asamdeelø køn, kan kilgayu Jesucristo nøashib pøri latailø, tru namui maramigwan marøb pønrrailøyugurri ñim srøig kurrabelø, tintatøga pørig kømøtø, øsig wab Tiuswei Espíritutøga pøriilø. Kabe srug tambalmerayu pøriilø kømøtø, misaamerai manrrømerayu pøriilø køn.

⁴Nambe iigwane Cristogurri Tiuswei merrab treeg kuitamab isua pønrrer.

⁵Kabe nam namashib øyeegwan martrapteelø namdø tsabø marøbelø kua, chi arrubiibe namuinukkurri arrubig kui lataig inchib pønrrømøtø, nam øyangatig tsabøtø marøb pønrramig arrubiibe Tiusweinukkurri arrubig køn.

⁶Incha Tius nøtøwei namune tru srøig acuerdo marigwan nam sølgandø marøbelø kønrrai mara pønsraig køn, tru acuerdo merrabsriig maig maramigwan martraim pørigwan kømøtø, tru Espíritu Santoiwan. Kaguende tru maig maramigwan martrai pørigwan mørmíigweimbe kwamigwan srua arruben, trune Espíritu Santobe tru srøig øsig kømigwan tranøbig køn.

⁷Inchen tru maig maramigu marøptøga pønrraig kwamigwan srua arrubig, srug tambalmerayu pørikken tørguegwalmabig køptø, Israel misaamerabe Moiséswan malauguen ashchab kaimaig købig køn, nui malø tørguegwalmabig køben, tru tørguegwalmabiibe kwab yaindøgucha.

⁸Inchen tru øsig kømigwan srua arrubigwan marøb pønrraig tru Espíritu Santoimbe, ¿kan treetøguen kønrrab kømø, maig tørguegwalmabig kuaasamø?

⁹Inchen tru maig maramigwan marøptøga pønrraig misagwan kaigyu pønrrønrrai kørrømara pasrøbikken treeg tørguegwalmabig kuibe, tru marøptøga pønrraig misagwan Tiuswei merrab chi kaig kømeelø lataig tabig kønrrai marøbiibe, ¡kan treetøguen kønrrab kømø, mas purø tørig tørguegwalmabig køn!

¹⁰Kaguende truig tørguegwalmabig lataig kuikken tru iig purø tørguegwalmabiibamara ashene, truibe chi tørguegwalmabig kømøn.

¹¹Inchawei tru tørguegwalmabig kwab ibikken kan treeg tørguegwalmabig tøgaig arriibe, tru mana pinømø pasrabig pasrønrrabiibe ¡mas maig tørguegwalmabig kuaasamørra!

¹²Inchawei tru tøgagønrrurmab isuigwan nam tøgaguen pønrraig køppe, nambe chi kørmø maig tamigwan tørgandø waminchibelø ker.

¹³Kabe tru Moisés lataig inchib pønrrømer, tru Israel misaamera nui malau tørguegwalmabig kwab arrubig yandø patsi ashmønrrai, malø kasraitøga kasrøb lataig.

¹⁴Inchendø nømui turmerayube yandø chi wamindikken kebyainameelø murig misriilø kua, møin kwalømgatig tru merrabsrø Tius acuerdon marig købigwan leben, chi tainguen mørmeelø køn, tru malø pinøgasrøb pasrabiitøwei pasrabig pasraikkurri. Kaguende tru pinøgasrøbigwane Cristotøwei kerranrrun.

¹⁵Incha møin kwalømgatig tru maig maramigwan martrai Moisés pøriilan asiimørig, tru maløwan pinøgasrøbig lataig pasrabiibe nømui manrrømerayube kasrain pasran.

¹⁶Inchendø møikkøben Señorweimay llirawa pasramisrene, tru pinøgasrøbig lataig pasrabiibe nuinukkurrimbe kerraig kønrrun.

¹⁷Kaguende Señorbe tru Espíritu kua, Señorwei Espíritu chu pasrøbene, Tiuswei merrab kemalamig truyube chigucha iløsrkønrrabiibe chi kaagøn.

¹⁸Inchawei nambe mayeeløba maløwan chi kasra kømø lataig ashib pønrrabeløbe, kan espejo latailø ker, Señorwei tru tørguegwalmabigwan kegurnabelø, nø maig køben nam treeløtøwei misrøb, katøguchinguen, katøguchinguen tørelø misrøb amber. Treebe Señorweinukkurri arrubig køn, tru nø Espírituinug.