Read Namrrik 2 Corintios 5 Bible Online

2 Corintios 5 - Namrrik bible

2 Corintios 5

¹Pøs nambe yandø ashibelø ker, yu pirau nam øsig pønrraig tru namui asr ka petøweindiig kan rancho-unø mara pasrindø lataig, yandø minchib patsindøgucha, katøgan srø asr purø tab ya lataig, mu møguelø taska mari ya kømøtø, srømbalasrø managuen patsønrrabig kømíig Tius tranig tøgagømigwan.

²Inchawei nambe yu pønrrappe, tru srømbalasrø kewa purramitøga pinøbuliilø kømigwan, mana kønrrermab truba truba nuisrab isubelø ker.

³Treebe namune srø asrtøga kenanen, nambe yandeelø asr chigar kømø, tøgar kømønrrun.

⁴Inchawei i asr kan carpa ya lataigu nam øsig pønrrabeløbe larrø tab kømui, truba truba nuisrab isuig melabelø ker. Pøs namune kwamuinrrabna køtan nam tøga pønrraig asrwan trubalatø srøig itøguenniilø kømøwatøbe, tru yandø pinab patsønrrabigwane tru srøig øsig kømibe yandø nøtø kerriguwan pinabgasra pasramisrtrai.

⁵Inchen namun øyeeg pønrramig kønrrai marøbiibe Tius nø køn, tru treeg kønrrai Espíritu Santon katsig pasra namun tranøbguen inchibig, tru trannrrab kørrømisrigwan kutøguewan trannrrab kui asamig kønrrai.

⁶Inchawei nambe chu urastøgucha chi isumø pønrrer, tru namui asru øsig amøñippatøbe, Señorweim pulu kømøtø, nambe yabsrøndø pønrrabelø kui nebua asha.

⁷Kaguende nambe amøñippe, namui isubigwan Cristoinug pasriitøgatø amøner, namui kabrrawa nebua ashagurrin kømøtø.

⁸Inchendø nambe treeg kønrraitamab chi isumø pønrrer, masken namune asrugurri tarømisra ambinrrabna køtan, Señorba kanbalatø purrønrrab amrrab.

⁹Inchawei namui asru øsig pønrrøwa lata, asrugurri tarømisra amba lata Señor nø tab kui mørøb wanrrai marøbelø kømig namuimbe truig køn.

¹⁰Kaguende nambe tru maig maramigwan Cristo asha marøb wainug mayeeløba kemalamig køn, namui asru amøña tabig marig kuin kui, kaig marig kuin kui maig marigwan nam møitøgucha truburø utønrrab. Tiusba katøle tab kørrømisramig

¹¹Inchawei Señorwan mandø kørig tøga pønrramigwan nam ashibelø kuig køppe, misaamera Señorwan kørenrrai inchib melabelø ker. Pøs Tiuswei merrabma nam mailø kuigwan tørgandø kenagúibe, katø ñimui isub kebachib pasrabigugucha treetøwei tørgandø kenagønrraimab isur.

¹²Kabe nambe namasiitø katøguen ñimui merrab ‘truba tabelø ker’ chib pønrrømøtø, ñim namgurri tab kui mørøb kasrag pønrramigwan tøgagønrrai treeg isua inchib pønrrer, ñim tru mandø løtamigwan tøgagønrrai, tru manrraugurri isua kømøtø, ka palatø treeg maranmab ashchaindø møg inchib chib pønrrabelan.

¹³Namun ‘locos køn’ tainab pønrraibe, Tiusweyasig køn. Inchen maig pønrramigwan chugúi møra pønrraibe, ñimuyasig køn.

¹⁴Kaguende Cristoi undag købiibe namune martrai trawaguchibig køn. Pøs iigwan nam isua ashene: Cristoma kwappe, mayeelaimburø kwaig købene, treekkurri mayeeløba kwaig køn.

¹⁵Inchen Cristobe kwappe, mayeelayasig kwaig køn, tru øsig amøñibeløbe ka nømuyasiitøwei øsig amøñimøtø, nuyasig amøñibelø kønrrai, tru kwawa, katøle nømuyasig øsiirabigwei.

¹⁶Inchawei nambe yandø møingurrimbunøbe mundøgucha yu pirauelø isuimay ka treetø isua ashib pønrrømeelø ker. Pøs nambe merrappe Cristone yu pirauelø isua asimay ashibelø kuatøgucha, møimbe yandø treetø nebua asha tøga pønrrømer.

¹⁷Inchawei møikkøben Cristoinug pasrabiibe, yandø nøbe kerrigu srøig køn; merrabiibe yandø chab puraiben, møimbe yandø kerrigu srøig marig peemayig køn.

¹⁸Inchen kerriguba øyeeg arrubiibe Tiusweinukkurrin køn. Pøs nam kailø kua nøbatøwei tab kørrømisramigwan Cristo Jesúskurri treeg kønrrai mara, kailø kua, Tiusba tru tab kørrømisram wamwan nam marøb pønrrønrrai, nø tranig køn.

¹⁹Tru wambe iig køn: Tiusbe nøbatøwei Cristogurri pirau maya misaameraba kailø kua, tab kørrømisramigwan marøb pasraig, nømui chi kaig mariilan ulø payrrab isua ashmøtø. Tru øyeeg nøba tab kørrømisram wamwane namun waminchai trana pønsraig køn.

²⁰Nambe Cristoi munchiyu, misag utu Cristo nø waminchib pasrab lataitøwei nui wamwan waminchib pønrrønrrai pønsrailø ker. Namgurri Tius nøashib treeg maray chib pasrab lataitøwei, nambe Cristoi munchiyu ñimun tiusmanda øyeeg martrunrrigay tamønrrun: ¡Tiusba tab kørrømisramigwan maray! cha.

²¹Cristobe chigucha chi kaig marig chigaigwan, Tiusbe namuimburø nune kaig marøbig kui lataig treeg mara pasrig køn, nam kaig marmua lataig pønrramig kønrrai Cristogurri treeg martrab.