Read Namrrik 2 Corintios 7 Bible Online

2 Corintios 7 - Namrrik bible

2 Corintios 7

¹Inchawei ñim, nai undaarailø, tru Tius trannrrab misra kørrømisriilan tøgarbe, namui asru lata, namui espírituyu lata, kaig marig køsøngønrrapteelan kerriguwan chish misrkun, Tiuswan køriibala pønrraigu kerriguwan nuindø newan tabelø kønrrab. corintosreelø yandø mas kaig marmønrrab isua mørøb

²Namun ñimui manrraugurri isua utørray chinrrab inchar. Nambe møigwangucha ñimun sølwan marmø kalø mara pønrrømøwei, kaig marøb ñimun møigwangucha mindisha kørrømarmøwei, kabe nam ñimgurri nam tøgamisrmøwei indig køn.

³Nabe iigwan ñimun øyeeg chippe, ñimbe øyeeg kailø køn chinrrab kømøtø inchar. Nabe yamba trendaig kuig køn, nambe ñimune namui manrrau tøga pønrrer cha, øsig amøña lata, kwamig kui lata ñimun namui manrrau tøgagønrrab.

⁴Nabe ñimune chi isumgailø kui isua pasrab, chiburø køben ñimgurri na truba tab kui mørøb pasramigwan tøgagøb inchar. Nan truba tab kønrrai mari pasrar, chine isui pønrramig puindøgucha, kasrag købigwan tøgagømburab tøga.

⁵Nam Macedoniasrø puabe, namui asrwane kan pishindø tabguen israb tøgagømig nebumíig køn. Treeg kømøtø, chiyutøgucha ka isui melamitø, isui melamitø arrubig køn namune, namuim pøtøgatanbe chinetø indinab melamig arruben, namui manrraube kørig isub melamig.

⁶Inchendø Tius tru larrø kullaarai isui melabelan isui inchimønrrai marøbiibe, Tito arriitøga namune truba tab kui melønrrai marig køn.

⁷Katø Tito arrikkurrindø kømøtø, nøgucha ñimgurri truba tab kui mørøb pasramigwan utikkurrimba køn. Nøbe namun wammørøsrkøtan, ñimbe nan truba ashig kui melaigwanba, ñim tru merrab kalø marig købigwan isua møra kappin kørrøgaigwanba, ñim naimburab truba truba isub melaigwanba. Treekkurri nane katøguchinguen kasraaranrrai martan.

⁸Pøs na ñimun tru kilga pøra øriitøga ñimun truba isuilø kørrømisrtrai marig købigwane nane chi isumøtan. Pøs tru urasbe nane isubwei indig køn, kaguende tru na kilga pøra øriibe kan maya yanagatiitøbe ñimun isui melønrrai marøbwei inchen.

⁹Møimbe nane kasrag køppe, tru ñim truba isui melaigwan, trunun isua kasrag kømøtø, tru ñim truba isui indiibe ñimui kaig mariilan isua møra, Tiusweimay lliranrrai marikkurri nane kasrag køtan. Pøs ñim truba isui inchib pønrrappe, Tius trendø treeg kønrrain køben kuig kua, nambe ñimune chigucha chi kalø punrraimbe marmuig køn.

¹⁰Tius maig palain køben nam trumay isui inchib pønrraibe ñimui kaig mariilan isua møra, Tiusweimay lliranrrai marøbig køn, kaigyugurri wesrailø kømigweyasig trembe kaabashmøtømab isumig chigaikke. Trune isui inchib pønrramig arrubig yu pirauibe, kwamibe tøgaig arrubig køn.

¹¹Tius maig palai inchen, ñim trumay isui inchib pønrraigwan ñimguen asay: ñimuinug truba marøg kui inchib pønrramig arrub, øyeekkølig kalø marøbrain køn chib tør marøb pønrramig arrub, kalø maren namig isub pønrramig arrub, køriibala pønrramig arrub, truba truba asinrrabna kui inchib pønrramig arrub, tabigweimburab ke chinsraatø inchib pønrramig arrub, kaig marøbigwane møra meganrrai marøb pønrramig arrub, treeg arrin køn. Inchawei kerrigu øyeeg purayaigu ñimbe chi kalø mara pønrrømuin kui kenamarøb pønrran.

¹²Inchawei tru kilgawan pørøppe, tru sølwan marmø kaig marøbigwan isua, truikkurrim pørmøwei, kabe tru kalø marinabigwan isua, truikkurrim pørmøwei indig køn. Treeg kømøtø, tru ñim namuimburab truba isubelø kuigwan ñimui utu Tiuswei merrab nebua asig kønrrai indig kuig køn.

¹³Inchawei nambe chi isumø tab kui pønrramig kønrrai mariilø ker. Nam tru treeg tab kui pønrraig kømnetø, Titon truba truba tab kui pasrai ashabe, nambe larrø tab kui truba kasrag pønrrer. Kaguende Titone nui isubigu katøle truba tab kui mørøb pasrønrrai, ñim søteelømisra purugúin køn.

¹⁴Pøs ñim corintiosmeraimburab truba tab kuim pasrar chib Titon na waminchib pasraigwan, chi køriimisra kørrømisrmur. Nam ñimun kerriguba chigøben wamindiima chi isa wamindig kømuig køppe, ñimuimburab truba tab kui mørøb Titon nam waminchib pønrraikkucha treetøwei isa kømø wamindig webyan.

¹⁵Inchawei Titobe møimbe ñimune katøguchinguen undaguig køn, tru nø maig karuigwan ñim mayeeløba mørøb, nun utabgucha, køriibala ke itønab utig købigwan isua.

¹⁶Chiyutøgucha ñimbe chi isumgailø kuimba mayanguen nane tab køtan.