Read Namrrik Gálatas 1 Bible Online

Gálatas 1 - Namrrik bible

Gálatas 1

¹Na Pablo Jesucristo nøashib karua ørig, mu møguelø nømuimburab karua ørig kømøwei, mu katøgan inrraincha karua pasrig kømøwein kur. Treeg kømøtø, Jesucristoba, katø Tius Møskai Jesucriston kwailai utugurri øsiirangarubiiba karua ørig kur.

²Namui nunelø mayeelø naba warabeløba Galacia pirausrø iglesiameran i kilgawan na pørar.

³Namui Tius Møskaimba, Señor Jesucristoba nui ka yandø tab indigwan køben, chi isumgaig tab købigwan køben ñimun tranrrun.

⁴Truibe nam kaig mariilaimburab nøashib kwanrrab pasramisrig køn, nam warain kwaløm larrø kaig pasrabigugurri namun wesraig kønrrai, tru namui Tius Møskai maig kønrrain køben, trumay.

⁵Truigwan tørguegwalmabig kønrrun managatig. Treeg kønrrun. Kaigyugurri wesrab wam katøgan peebe chi kaagøn

⁶¡Paare! Kan øyeeg misaamerabe mailø kermab ashar, Tiuswei tabig srø wamwan peemay yunømara srua pønrrønrrab, tru Cristoi ka yandø tab indiitøga ñimun wamabig Tiuswan chabguen yandø yanayutø tarømisrøbguen ambin køben.

⁷Tabig srø wam katøgan peg kuimba kømøtø, møiløgøben ñimune ke ka iløsrkøb, Jesucristoi tabig srø wamwane ke kan mumaygucha kømíig kønrrai mindisha pønsrøg køb indan.

⁸Namdøwein kui lata, kabe kan ángel srømbalasriig kui lata, tru tabig srø wamwan nam ñimun eshkab kusrenani lataig kømøtø, katøgan peemaytø yunømara waminchibiibe, managatig trømbøig nebuig pasrønrrai pasrig købash.

⁹Nam ñimun eshkaigwan, møi katøle katø nabe eshkanrrab inchar: tru ñim uti lataig kømøtø, møikkøben tru tabig srø wamwan yunømara peemaytø eshkab kusrenanøbiibe, managatig trømbøig nebuig pasrønrrai pasrig købash cha.

¹⁰¿Nabe misaamera nan tab inchamab lab pasrabrah, kabe Tius tab inchai lab pasrabrah chindah? ¿Kabe misaamera tabzhig inchai lab pasrabra chindah? Pøs na katøgucha misaamera tab kui mørtrai na nømun tabzhig inchib pasrabig kuimbe, trube, nabe Cristoi marøb megabig kømubsrubrainrrun. Pablon Tius martrai karua pasrig

¹¹Iigwan ñim, nai nunelan, wammørøsrkønrrab inchar, tru tabig srø wamwan na eshkab kusrenaniibe møguelø nømdø isua wesruigwan wamindikkucha kømøn.

¹²Pøs nabe, kan møwan utig kømøwei, katø kan møg kusrenanig kømøwein kur. Treeg kømøtø, nan Jesucristo ashchai kenamaren, treeg utig købig køn.

¹³Kaguende ñimbe manawei nane wammørøbelø kuinrrun, judíosmera Tiusweyasig maig marameløyu, na trunun marøb uñib uras na merrabsrø maig inchib uñibig kuigwan: kan namig købiitø ¡katø! chindinrrabna kui inchib, Tiuswei iglesian kaig martrab wendautø llirab, nøm tru treeg marøb tøgagúigwan kerriguwan pinishinrrab truba truba inchib unig købigwan.

¹⁴Namui misag utu, naba ketøtø nørrørawarwei utu møilan køben nabe kanab kusrebig købig kur, judíosmera Tiusweyasig maig marameløyube, kaguende nabe merrabsrø namui kølli misaamera maig marøb amrruigwane maikken purøbuniimíig kønrrai inchibig købig kua.

¹⁵Inchendø Tiusbe nane nai usrai patsø umbu wabenbatøsrøwei nane tarømara, nui ka yandø tab indiitøgatø nane wamig køn. Incha nun tabig asønaben,

¹⁶nui Nusrkawan na nebua ashchai kenamarig køn, judíos kømø misaamerai utu nuimburabigwan na eshkab kusrenanamig kønrrai. Inchen nabe tru urastø mu møwan paya mørmøwei,

¹⁷katø naguen treeg kømøwatø Cristo nøashib karua øriilan payrrab Jerusalénsrømay nebimøwei indig køn. Treeg inchimøtø, Arabia pirausrømay ya, trugurrimbe katøle Damascosrømay arrig købig køn. Jesucristo nøashib karua øriilø katøganeløba Pablo lincha waminchib

¹⁸Indiibe yandø pøn pila puraiben, Jerusalénsrø nabe Pedroba waminchab ya, trusrø nøba parru kørrømisrøbig kur.

¹⁹Cristo nøashib karua øriilan nabe trusrømbe møigwangucha ashmur. Ashippe, Señorwei nuneg Jacobondøh ashar.

²⁰Na ñimun pøriibe, Tiuswei merrab isa kømøtø, treeg køn cha, treeg pørar.

²¹Incha trugurrimbe Siria pirausrømayba, Cilicia pirausrømayba ibig kur.

²²Nane Judea pirausrø Cristoi iglesiamerabe malauguebe ashmeelø srø købig køn.

²³Truiløbe øyeegwandøwei wammørøbelø køn: “Tru merrabsrø namun kaig marøb llirab uñibig købiibe, møimbe tru Jesucristoi tabig srø wamwan eshkab kusrenanøb unan taig, tru merrabsrømbe nø pinishinrrab inchib unig købigwan.”

²⁴Incha nagurri Tiuswan truba tabig waminchibelø køn.