Read Namrrik Efesios 1 Bible Online

Efesios 1 - Namrrik bible

Efesios 1

¹Na Pablo, Tius trendø øyeeg kønrrain kuikkurri Cristo Jesús nøashib karua ørig, Tiuswei misaamera, Cristo Jesúswan tarømisrmø pønrrabelø, Efesosrø warabelan, truilayasig i kilgawan pørar.

²Tius namui Møskaimba, namui Señor Jesucristoba tru ka yandø tab indigwan køben katø chi isumgaig tab købigwan køben, ñimun tranrrun. Tiusbe Cristogurri chigøben tabigwan tranøb

³Namui Tius Señor Jesucristoi Møskaimbe mayanguen tab indig kønrrun, srømbalasrø tru chigurrimbunø nuimburabelø tabig pønrrabiitøga Cristogurri namune trutøga mayanguen tab kuilø kønrrai marøbigwan.

⁴Pøs Tiusbe tru chigurrimbunø pønrrabigwan nø mara pønsrømøwatø manasrøwei namune Cristogurri tarømara wesraig købig køn, tabigweindø tarømariilø, kaig mariitøga chillig inchar kømeelø, nui merrab pønrramig kønrrai.

⁵Nøbe namune undag købiitø Jesucristogurri nui trag ureg kønrrai maramig manasrøwei nø treeg mara tøgagúig købig køn, tru nø trendø treeg martrab isua tøgagúig truig maig køben treekke,

⁶tru nui ka yandø tab indig purø nuig purø tabigwan maya nuguen tabig wamindamig kønrrai, tru nui truba undaaraig Nusrkaingurri namun ke ka yandø tab indig tranigwan.

⁷Nuinug nambe nui aningurri nuielø kønrrai kaigyugurri wesrailø ker, namui kaig mariilan ulø payimeelø, Tiuswei tru ka yandø tab indig tøgagømburab tøgagúig truig maig køben treeg.

⁸Tru ka yandø tab indigwan tranøppe, Tius namun tøgagømburab tøgagønrrai tranig køn, tru chiwandøgucha nam purø tab asha maram kusrebelø kømigwanba, katø tørgandø chigúi mørøbelø kømigwanba.

⁹Nøbe tru nø trendø treeg martrab isua tøgagúig tru muguen asiimíig pasrabigwan namun kenamarig køn, Cristoinug nø treeg maramig nun maya nuguen tabig asønaben tru treeg tøga waig købigwan,

¹⁰tru treeg maram kwalømmera pubene, trunun treeg maramig pasrønrrai: tru srømbalasrø chi pønrrabigwan lata, katø pirauigwan lata kanbalatø mara, maig maramigwan Cristo kerriguwan nø asha martrai pønsrønrrab.

¹¹Katø nambe tru namuimburabigwan nø ketig tranamig tøgagúigwane Cristoinuutøwei utig købig køn, manasrøwei namun treegwan utønrrain kønrrai marig købig kua, tru chiwandøgucha Tius nun maig maramdiig asønaben tru treeg kønrrai marøbig, maig martrab asig køben trumay treeg.

¹²Tru srøsrø ke nammerrig Criston muniirab melabelø kuikkurri, tru nui tørguegwalmabigwan namgurri maya nuguen tabig wamindig kønrrai.

¹³Katø treetøwei ñimbe nuinug tru wam newan ciertonig, tru tabig srø wam kaigyugurri wesrabigwan ñim møra, nun køreben, tru trannrrab misra kørrømisrig Espíritu Santotøga Tiusweyelø kuin kui asiilø kønrrai ñimbe sellailø kuig køn.

¹⁴Truibe tru namuimburabig kønrrabigwan ketig utamig kønrrai katsiibasra tranøbguen indig truig køn, tru Tius nuyasig tøgagønrrab wesrailan ke tab webamba pønrramnegatig, nui tørguegwalmabigwan maya nuguen tabig wamindamig kønrrai. Pablo Tiuswei ureemerayasig Tiuswan miab

¹⁵Inchawei treekkurri tru ñimui isubigwan Señor Jesucristoinug pasra tøgagúigwanba, katø Tiuswei misaameran mayeelanba ñim truba undaguelø køn taig na wammørabe,

¹⁶chu urastøgucha na Tiusba wamindigu tøgatø isub palømø, ñimuimburab ‘ungwa’ chibig kur.

¹⁷Nabe tru namui Señor Jesucristoi Tius tru tørguegwalmab Møskawan miabig kur, ñimun Espíritu Santogurri øyeegwan trannrrai, kusrebelø kømigwanba, katø nebua asiimíigwan tørgandø tab chigúi nebua ashchaimba, newan nun tab nebua asamig kønrrai.

¹⁸Katø chigúi mørøb nebua asamig ñimui isubigu tørgandø kebiliilø kua, tru ñim tøgagønrrurmab isua muniirab melønrrai ñimun wamigwan, øyeeg købig kuin kui nebua ashchaimba, tru nui misaameran keta trannrrab misrig chigucha palømíig purø nuig purø tabigwan øyeeg købig kuin kui nebua ashchaimba,

¹⁹katø tru nam nun kørebelainug maramburab marøbiibe, purø nuig købig kuin kui nebua ashchaimba, miabig kur. Inchen tru nui purø nuig maramburab marøb pasrabiibe,

²⁰Tius tru Criston kwailai utugurri katøle øsiirangarua, tru srømbalasrø nø wainug nui kusrmay wamisrtrai maramburab mariitøgatøwei marøb pasran.

²¹Mayeelaim pala nøm asha karubelaim pala køben, katø mugucha manchinrraingaig karubelaim pala køben, katø maramburab marøbelaim pala køben, katø maya misagwan nøm asha karubelaim pala køben, nørrø kusrebelø kuikkurri nørrø munchimera tøgagønrrai traniilaim pala køben, kerrigu iilaim pala nun wannig køn, møi i kwalømweindø kømøtø, katø wendøsrø attrabiguwein chigucha.

²²Incha Tiusbe tru chigurrimbunø købigwanguen Cristo nø maig kønrrain køben treeg pønrrønrrai pønsra, iglesiaimbe chiyutøgucha nø tur kønrrai pasrig køn.

²³Inchen truibe Cristoi asr køn, Cristo nøtøwei tru chigucha chi palømíig netsiig pasraig. Cristobe treetøwei chi købigu mumaytøgucha nøtø netsiig pasrabig køn.