Read Namrrik Filipenses 1 Bible Online

Filipenses 1 - Namrrik bible

Filipenses 1

¹Pabloba, Timoteoba Señor Cristo Jesúsweimburabigwan marøb melabelø Cristo Jesúskurri Tiuswei misaamera mayeelø Filipos ciudasrø warabelan pørar, tru Tiusweimburabelan ashib pera pønrrabelanba, Tiuswei yau purugunrrai wesrawa pønsrailanbañau.

²Namui Tius Møskaweimba, Señor Jesucristoimba tru ka yandø tab indigwanba, chi isumgaig tab købigwanba ñim tøgagønrrai inder. Pablo Tiuswei ureemerayasig Tiuswan ‘purugurra’ cha miab

³Na ñimun isuimørig nai Tiuswan ‘mayanguen ungwa, ungwa’ chib,

⁴chu uraskucha na Tiusba wamindimørig ñim mayeelaimburab kasraatø miabig kur,

⁵kaguende ñimbe tru Tiuswei tabig srø wam tabigweimburabigu srø pølbasrøb kwalømgurri møin kwalømgatig lincha marøb melabeløgurri.

⁶Nabe iigwan treegwein kønrrab kui asha indig køn: ñimuinug tabig marøb pølbasrøbiibe Jesucristo arrum kwalømgatig ñimune newanelø kønrrai tamarøb pasrønrrab kui.

⁷Ñim mayeelaimburab na øyamay isumig søl køn. Kaguende nabe ñimune nai manrraube tøga pasrabig kur. Na kailan keeri yau pasraigu lata, mui merraptøgucha Tiuswei tabig srø wamwan purømisrøb, maig kui ashchai ‘øyeeg køn’ chib, waminchib pasraigu lata, Tius tru ka yandø tab indigwane ñimbe naba tøgatø utab køn.

⁸Inchawei Tiusbe asha pasran, na ñimun mayeelan pesannamø, truba truba isubig kuigwan Señor Jesucristoi undag købiitøga.

⁹Inchawei na Tiusba waminchippe, ñimui undag købiibe katøguchinguen katøguchinguen nurab inrraimba, katø purø nu nebua ashib kusreb amrraimba, maig køb arrubigwan tørgandø nebua ashib amrraimba miabig kur.

¹⁰Chiwan mas tabig kui nebua ashibelø misra, kaig marig chigar chishelø ‘ñibe øyeeg kalø mara pasran’ tainab pønrramig chigar kønrrai, Jesucristo katø arrub kwaløm.

¹¹Jesucristoinukkurri arrubig tru tabig sølgandø marig, treeg ellmarig arrubiitø netsaim pønrrønrrai inchar, Tiusweyasig maya nuguen tab indig kønrraimba, purø tabig wamindig kønrraimba. Na øsig unamibe Cristo køn

¹²Nai nunelø, nan chi pub arrubiibe, Tiuswei tabig srø wamweimburappe masken purugubguen inchib arrin kui, ñim wammøra kønrrai inchar.

¹³Inchawei tru palacioyu suldaumera lata, katø maya misaamera lata, kailan keeri yau na pasrappe, Cristogurri keerim pasrai asha køn.

¹⁴Inchen nan treeg pasrønrrai keerikkurri, nai nuneløbe, kerrigu lutauba, chigucha kullaaramø pønrramisra, Tiuswei wamwan chigucha chi kørmø waminchibelø køn.

¹⁵Pøs ka isatø kømø, møiløbe Cristoimburabigwan eshkab waminchippe, pusrkwai ashib tsalø køppah, ka kwayam lag køppatø marøbelø køn. Trune kaneløbe tabig isua, marammay maran.

¹⁶Incha iiløbe Cristoimburab eshkab waminchippe, undaguelø isuar kua waminchibelø køn, Tiuswei tabig srø wamwan waminchib purømisrøb pasrønrrai, nan pasrig kui asha.

¹⁷Trune tru kaneløbe Cristoimburab eshkab waminchippe, ka kwayam lag køptø maran, tabigwan isua kømøtø, ka indzaashig køptørre marøbelø køn, kailan keeri yau na pasramnebe katøguchinguen isuim pasrønrrai martrab isua.

¹⁸¡Inchendø chigúin kønrrautah! Ka isatø inchib Cristoimburabigwan ka wamincha møri lata, kabe cierton wamindi lata, pøs mumaytøgucha Cristoiwan waminchib, kusrenanene, nane kasrag køtan. Incha nabe katøgucha kasraarabig kasraaramønrrun,

¹⁹ñim Tiuswan nayasig miab melaikkurrimba, Jesucristoi Espíritu nan purugúikkurrimba, øyeeg pub arrubiibe na øyeeg keerig pasraigugurri wesraig kømig punrrab kui, nabe asha pasrar.

²⁰Chiyugucha na chi kørig misrmø purayamuitamab isua pasraig, treeg punrrab kui, masken chi kullag isumøtø, møi lata, chu urastøgucha, Cristobe nai asru purø nuig marøb tabig wamindig kønrrun, na øsig pasrai lata, kabe na kwaimbala lata.

²¹Kaguende naimbe øsig unamibe Cristo køben, kwamibe maya nuguen tabig tøgaig køn.

²²Inchen na asru øsig uniibe, Tiuswei marameløyube tsabøtø truba nørrø kønrrai maramdiig kønrrautan. Trube, ¿nabe møigwan merrarrawa pasramisrtrab køh? Pøs mandøguen kømøtan.

²³Inchawei nabe mumay yam kuinguen mørmøwa pasrar. Nane yugurri webya, Cristoba wanrrab yainrrabna køtan. Kaguen trumaybe naimbe masken tab kønrrautan.

²⁴Inchendø na øsig pasramibe katøguchinguen tab kønrrab køn ñimuimburappe.

²⁵Inchawei øyeeg kønrrab kui ashabe, chiguen kømøtø, ñimba unamuitamab isur, ñim mayeeløba kørrømisrtrab, katøguchinguen katøguchinguen nebua asamigwan ñim nebua ashib, isubigwan Jesucristoinug pasra tøgagúigwan kasrag tøga pønrramig kønrrai.

²⁶Ñim naimburab Cristo Jesúsweinug maya nuguen tab kui pønrramig punrrai, na ñimui utu katøle arrua pasraikkurri. Jesucristoi srø wam tabig maig chibig køben treeg marøb amønamig køn

²⁷Jesucristoi srø wam tabig maig køben, trumay treeg amønamirre mas palan, na ñimun ashchab arri lata, ashchab arrumui lata, ñimbe masken kanbalatø ke tab pønrramisra, tru isubigwan Cristoinuutø tøga pasra pønrramig Tiuswei srø wam tabigweimburappe, ñimbe kanbalatø mayeeløba ke kandø isub truba truba marøb køn tai wammørinrrabna køtan.

²⁸Katø ñimun ashig kømui inchibelø ‘chigøben martrumøn’ cha, kwaarøsra tøgagúilø kømøweingue. Tru ñim truilø kwaarøsraimíig pønrraibe nømuyasiibe managatig pinønrrab ambamnuumay amrrab pønrrain kui asamig kenamisren, trune ñimbe truyugurri wesrailø pønrrain kui asamig kenamisran. Inchen iibe Tiusweinukkurri arrubig køn.

²⁹Pøs ñimune Cristogurri øyeekkatig tabig pønrrønrrai marøppe, nun ka kørewatø pønrrønrrai marmøtø, nuimburab chinetø nebuig melamig kønrraingucha marig kuig køn.

³⁰Nan maig kaig nebub arri asigutøwei ñimgucha melan. Katø møi ya nan øyeeg kaig puig pasraigwangucha ñimbe wammøra køn.