Read Namrrik Filipenses 2 Bible Online

Filipenses 2 - Namrrik bible

Filipenses 2

¹Inchawei ñim Cristoinug kanbalatø pønrraikkurri kuñab purugumig tøgagøb, nui undag købig chi isumig kaanrrai marøbig tøgagøb, Espíritu Santogurri kanguelarrøtø lincha pønrramig tøgagøb, ñim larrø tab inchibelø, trurrigu lastima ashibelø kømigwan ñim tøgagøb indig købene,

²trube, nai kasrag købig palabigwan ñim nemartrunrrigay, mayeeløba kandø isub, undag købigwan mayeeløba trunundøwei tøgagøb, kandø lataig pønrrab, kandø lataig isub tøgagøb indiitøga.

³Chiyutøgucha ke nøtø kønrrab inchimøwei, purø nuig kømmørø inchib marøb kønrrab kømøwein kømig køn. Masken treeg kømøtø, larrø tammayig, katøganelane ñim lataitøguen kømø, katøguchinguen nørreelø kønmab asha tøgagømig køn.

⁴Møitøgucha ke nømuimburabigwandø tab kønrrai marøb kebammøtø, katøganelayasikkucha tab kønrrai maramig køn. Cristobe managuen nuig misrmøtø, masken lamíig misrig

⁵Cristo Jesús maig isubig købig køben, ñimgucha treetøwei isubelø kømig køn:

⁶Nøbe trendø Tius købendø, nø treeg kuagucha, Tiusba lataig kønrrab inchimuig køn, treeg kurmaptø elachimønrrab.

⁷Masken treeg inchimøtø,nø treeg kuigwane mendamara pasrøb, kan karuindiig megabig lataig kønrrab treeg misra, møguelø mailø køben treetøwein kørrømisra,

⁸yandø møg lataitøwei misra pasrøwabe, nuig kurmab inchimøtø, nøasiitø chigucha kømíig lataig misra,maig taigwan mørøbig køptø, kwamnegatig maig taigwan marig køn,trurrigu kurusyu mesraig kwamig.

⁹Inchawei treekkurri Tiusbe nune purø nuig kønrrai mara, maya munchimeraim pala, nui munchiwane mu kui nebua asig kønrrai tranig køn,

¹⁰Jesúswei munchiwan wamindi møra, mutøgucha tømbønsramig kønrrai, srømbalasrøm pønrrabelø lata, yu pirauelø lata, pirø umbuelø lata.

¹¹Mu misaameratøgucha Jesucristobe Señor tru Mayeelaim Pala Nø Ashib Pasrabig køn chib waminchain kuig køn, Tius Møskawan maya nuguen tab indig kønrrai. Tiuswei ureemerabe yu pirau kan tør latailø kømig køn

¹²Inchawei ñim nai undaarailø, na ñimba pasrøben, chu uratøgucha mørøb melabelø, na møi ñimba pasrømubene, katøguchinguen mørøb melabeløbe, kaigyugurri wesruigwan ñim tøga pønrraigu nørrørabig nørrøranrrab marøb ambay, køriibala, purø isuptø.

¹³Kaguende Tius, nø køn, tru maramigwan martrab isunrraimba, katø marøbelø kønrrai ñimuinug tranøb inchibiibe, tru nø maig martrab isuigwan treeg marig kønrrai.

¹⁴Chiwandøgucha marøppe, ñimuinetø chinetø chib mulla mørmøwei, chinetø aleguiyab pønrrømøtø maray.

¹⁵Mugøben ñimun ‘ñibe øyeeg køn’ tainab pønrrømeelø, kørrøteelø, misaamera larrø minchar, purø kaig misaamerai utu, ñimbe Tiuswei ureemera chigucha kaig mara chillig inchar kømeelø, ñimbe truilai utube yu pirau pala pilab pønrrabelø latailø kuy,

¹⁶Tiuswei wam øsig kømig tranøbigwane elatchab kømø, tab tøga pønrrabelø. Treekkurrimbe Cristo katø arrub kwaløm truba truba tab kui pasramig kønrrautan nane, na larrø muraaraig pasrønrrab luløb lataitøwei, na truba muraaraig marøb megaibe ka yandiig kørrømisrmøwei inchen.

¹⁷Ñimui isubigwan ñim Jesucristoinuutø pasra tøgagúikkurri marøb kuibe kan animal kweecha Tiuswan keta tranøb lataig marøb tøgagúig køben, trubala na øsig kuigwan itølusig kønrrai tranamig nebuinguen mayanguen tab kuimørøb tranamønrrun, ñim mayeeløba mayanguen kasraarab.

¹⁸Inchawei ñimgucha treetøwei mayanguen tab kui mørøb, naba mayanguen kasraaray. Timoteoba, Epafroditoba

¹⁹Señor Jesús treeg kønrrain købene, Timoteowan petø ørtrab isur, ñimuisrøngurri wam srua arruben nagucha ñim maig waraigwan wammørabe, katøle tab kuimørøb wamig kønrrai.

²⁰Pøs katøgan munguen nø lataibe tøgagømur, ñimuimburab tab kønrrai inchib, treegwan martrab truba truba isubig, trurrigu ka isatø inchib pasrømíig.

²¹Kaguende mayeeløba nømuimburab tabig pub attraingøba labelø køn, Cristoimburab tab kønrrain kømøtø.

²²Pøs ñimbe Timoteowane yandø mu kui ashibelø køn, kan nusrkai møskawan lataitøwei Tiuswei tabig srø wamwan wamindamigu naba marøb pasrabig køn.

²³Inchawei yu naimburab chi pub arrubig maig kørrømisri ashabe, nun ørtrab isur.

²⁴Inchendø nagucha naashib ñimun ashchab peba arrumigwan isua tøga pasrar, Tius naba pasraikkurrimbe.

²⁵Treeg kuindøgucha namui nuneg Epafroditon ñimuimay katøle øramig truba palai ashar, maramigu nan purugub, kan suldau lataitøwei tru maramigu naba lincha megabig, katø ñimuisrøngurri naimay wam srua arrubig, na chi palai megaben nan ashchai ñim ørigwandøwei.

²⁶Nøbe ñimune asinrrabna kui truba isui inchib unig kuig køn, kaguende nø kwanrrø tsuin kui ñimbe wammøra kuimba trurrewei isub.

²⁷Isa kømøtø, yandø ke kwamdø palabig tsubwei indig kuig køn. Inchendø Tiusbe Epafroditon lastima asig køn. Katø nundø kømøtø, nangucha lastima asig køn, na yeeg isuig megamne, srøitø srøitø isuig megamig arrumønrrai.

²⁸Inchawei nabe nune mas peba ørtrab isur, ñim katøle Epafroditon ashabe truba kasraaraben, na chi isumø tab wamig kønrrai.

²⁹Señorgurri nune truba kasraatø utay. Katø Epafrodito lataitøwei melab møguelane truba tab inchib tøgagømig køn.

³⁰Kaguende Cristoi maramelan marøb megaikkurri nøbe yandø ke patsønrraptiig tsuig kuig køn, ñim ñimashib trugatig nan purugunrrab kaimailøyu kwam lab nøguen purugub.