Read Namrrik Colosenses 3 Bible Online

Colosenses 3 - Namrrik bible

Colosenses 3

¹Inchawei yandø ñimbe Cristoba øsiirawar kuig køppe, ñimbe srømbalasriigwan lamig køn, Cristo tru Tiuswei kusrmay waisreelan.

²Ñimbe isuppe, srømbalasreelan isuy, yu pirauelan kømøtø.

³Kaguende ñimbe yandø kwaig latailø kua, møimbe ñimui øsig kømibe Cristoba Tiusweinug søra tøgagúig pønrran.

⁴Inchen Cristo tru ñim øsig pønrraig kenamisrene, ñimgucha nøba tørguegwalmabigu tøgatø kenamisrtrun. Møin kwaløm amønaibe merrabsrø amønaig lataig kømøn

⁵Inchawei ñim trendø kaig marøb kuig yu pirauig ñimuinug pasrabigwane patsøga pasray: ishuuba, møøba trømbøig kaig maramelanba, køsøngønrraptiig maramelanba, ke chinsraatø inchib trømbøig marøg købigwanba, chigøben kaig maramig isumelanba, parø indamigwanba (tru parø indiibe tius mara tøgagúi lataig køn).

⁶Øyeelan marikkurriwei tru mørmeelaim pala arrubig køn Tiuswei namig købiibe.

⁷Ñimgucha merrabsrømbe øyeelandøwei marøb amøñibelø købig køn.

⁸Ñimbe møimbe iilane kerriguh elatsay: trømbøig namig købig pasrabigwanba, ke chab srurrab namig købigwanba, katøganun kaig maramigwangøba isumigwanba, trømbøig wamamelanba, chine møramguengaig trømbøig wamamelanba elatsamig køn.

⁹Ñimbe kanikkurri kanikkurri isa waminchimøtay. Tru køllig ñim trendø kaigwan tøga kal-laig ñimui umbu pasrabigwan treetø treetø marøb tøgagúilanbañau ñimbe wesrua kutsig køn.

¹⁰Incha ñimbe tru srøigwan kewa pønrran. Tius nø marøbig maig køben treetøwein kønrrai marigwan, tru srøibe kerriguwan tab nebua asamnegatig srøitø srøitø yunømarøb arrun.

¹¹Trube, møimbe, griego køn tamig kawei, judío køn tamig kawei, asru circuncidaweig køn tamig kawei, circuncidaimíig køn tamig kawei, peg pirausriig køn tamig kawei, escitasmera køn tamig kawei, karuindiig megabig køn tamig kawei, mu karuimíig nuimburab uñibig køn tamig kawein køn. Treeg kømøtø, Cristobe chiyutøgucha kerriguwan nøtø køb, katø mayeelainug nø pasran.

¹²Inchawei Tius lawa wesruilø, ñim newan tabig chishelø, trurrigu undaarailøbe iigwan kewa lataig pønrray: lastima ashibig kømigwan køben, larrø tab inchibelø kømigwan køben, kørrøteelø kømigwan køben, larrø tammayig kømigwan køben, maig køben kuingucha tammay megabig kømigwan køben,

¹³kanikkurri kanikkurri chigúingucha lata inchimumigwan køben, møikkøben ‘øig øyeeg inndan’ chib pønrramig tøgaguabe, kanikkurri kanikkurri chi ulø paymø, pesannab inchibelø kømigwan købengue. Señor ñimun ulø paymø, mandø pesannaig køben, ñimbe treetøwei maray.

¹⁴Inchen køben iilø kerrigu kømnetø tru palabe, undag købigwan itøguewa pønrramig køn, tru undag købiibe mumaytøgucha kanbalatø newan purø tabig pønrramig kønrrai marøbig køn.

¹⁵Inchen Cristo tru chi isumgaig tab købiibe ñimui manrrau maig maramigwan nø karub pasrønrrai inday. Kaguende ñim kan asrtø kuig køben, øyeegumay wamig køn. Ñimbe ‘mayanguen ungwa, ungwa’ chibelø kønrrigay.

¹⁶Cristoi wambe ñimuinuube maya nu pasramburab pasrønrrai inday, purø tab isua asha, kanikkurri kanikkurri kusrenanøb ‘øyeeg, øyeeg marøb melay’ chib waminchib. Tiuswan ñimui manrraugurri ‘mayanguen ungwa, ungwa’ chib nuyasig salmoswan, himnoswan, nuimburab cantailan cantab inchigay.

¹⁷Inchawei chigøben marøppe, wamindigu lata, chigøben mariiløyu lata, Señor Jesúswei munchiyu maray, nøgurri Tius Møskawan ‘ungwa, ungwa’ chib. Tiuswei ureemera nømui yau maig kømigwan waminchibig

¹⁸Sraløbe, kelø maig chiben treeg mørøb melamig køn, Señor nø maig martrai indig køben, trumay.

¹⁹Keløbe, ñimui sralane undaguelø kømig køn, namikkølig inchib tsag inchimøtø.

²⁰Ureemerabe, chiyutøgucha nømui møskalane maig chiben møramig køn. Kaguende øyeeg mariibe Señorwane truba tabig asønan.

²¹Møskaløbe, ñimui uregwane purø trømbøig inchib namig kui inchai marmøtay, chine isub kullaarai inchimønrrai.

²²Ñim karuindiig melabeløbe, yu pirauelø ñimun karub pera købelane chiyutøgucha møramig køn. Møgueløba ka tab kørrømisrtraptø marøbelø latawei nøm ñimun ashib pønrrøbendø martrab kømøtø, ñimui manrraugue tabigwan isua, Tiuswan køriibala maramig køn.

²³Chiwandøgucha marøppe, martrab isua maramig køn, møguelayasig kømøtø, Señorweyasig lataig marøb,

²⁴truburø ketig uta tøgagømigwan trannrrabiibe Señor nø trannrrab kui ashibeløbe. Kaguen ñim chi marøb pønrraibe Cristo tru Señorweiwan marøb pønrran.

²⁵Inchen møikkøben maig maramigwan marmøtø, kalø marøbigwane nui kalø marig maig køben truburø nøgucha treetøwei kaigwan utønrrun. Kaguende Tiusbe møigwane purømisrøb kandarøtø inchimíig køn.