Read Namrrik 2 Tesalonicenses 2 Bible Online

2 Tesalonicenses 2 - Namrrik bible

2 Tesalonicenses 2

¹Pøs trube, Señor Jesucristo katø arrumigweimburappa, katø nam nøba tulundzunamigweimburappa, ñim namui nunelan,

²tiusmanda ñim maig isua pønrraigwan ke møi møi peetø isub yunømarøb, ke chinsraatø inchib pønrrønrrai kwaarøsrainab pønrrønrrab kømø chinrrab inder. ‘Tru arrum kwalømbe yandø pun’ chib, ‘Tius treeg wamindingarutan’ chib wamindi lata, kabe ‘treeg køn’ chib eshkaig lata, kabe ‘treeg kønrrun’ chib ‘nam kilga pørig køn’ chib waminchib kui lata mørmønrrigay.

³Ñimbe mumaygucha kegørrøsrkainab pønrrønrrab kømø, melay. Kaguende tru Señor arrum kwaløm pumøwatø, misaamera Tiusweimburabelan elacha, yandø wendøbasrøb, katø tru newan larrø kaig, tru managatig pinisaig kønrrabigu pasrønrrai pasrig kenamisrmøwatøbe treeg pumønrrun.

⁴Tru møøbe tru chimerandøgucha ‘tius køn’ chib tøgagúilanba, katø chiwan køben køriibala tabig waminchib tøgagúilanba, ashig kømui inchib søtø pasramisrøb, purab nuig misrøb pasrønrrun. Incha treetø kønrrab kuindø, Tiuswei yauguen kebya wamisra, nøashibguen ‘Tius kur’ chib wanrrun.

⁵¿Na ñimba uñib uraswei na ñimun iigwan wamindigwan isumuitarru?

⁶Tru kaig martrab møg treeg maramig puben tru uras kenamisrtrai tru merrarrab søtø pasrabiibe chi søtø pasrain kui ñimbe ashibelø køn.

⁷Kaguende tru mu asiimíig purø kaig pasrabiibe chabguen marøbguen pasran. Inchendø tru treeg marmønrrai møi ya merrarrab søtø pasrabiibe, søtø katab pasrabig pasrønrrun tru utugurri wesramnegatig.

⁸Inchen yandø tru newan larrø kaibe kenamisrtrun. Inchen truigwan Señor Jesúsbe nui trigugurri urriitøgatø kweecha, tru nø tørguegwalmabig arriitøga pinishinrrun.

⁹Tru larrø kaig arrua mariibe, Satanás purugúitøga marøb attrun, marøppe, Satanás maramburab mariiløtøgaba, nø pasrain kui ashchai mariilan mariitøgaba, tabig kømíitøga kwaara asha kønrrai marøb pasrailøtøgaba.

¹⁰Incha tru kaigyu pønrramsrømay amrrabelan kegørrøsrkamig nøbe chigurrimbunø sølwan kømø, kaløwan marøb kaig martrai pønsrønrrun, kaguende tru kaigyugurri wesrailø kønrrab tru newan ciertonigwan undaaramø, kaashibeløgurri.

¹¹Inchawei Tiusbe tru peløsrkøb kegørrøsrkøbigwan maramburab martrai ørtrun, isa wamindiilan kørenrrai,

¹²katø tru newan ciertonigwan køremøtø, sølgandø tabigwan mariimeeløyu truba tab kui inchib marøb pønrrabelane mayeelanba kaigyu pønrrønrrai pønsramig kønrrai. Kaigyugurri wesrailø kønrrai lawa wesrailø

¹³Inchendø nambe chu uraskucha Tiuswan ñimuimburab ‘ungwa, ungwa’ chib kømig køtan, Señor undaaraig nunelø. Kaguende srøsrøgurri kaigyugurri wesrailø kømig kønrrai Tiusbe ñimune lawa wesraig købig køn, Espíritu Santogurri tabig chishmarikkurrimba, katø ñimui isubigwan newan ciertonigu pasra tøgagúikkurrimba.

¹⁴Tru øyeeg kønrrai isuawei, Tiusbe ñimun wamig køn, tru tabig srø wamwan nam eshkab wamindiitøga, tru namui Señor Jesucristoi tørguegwalmabigwan ñimgucha nebua tøgagønrrai.

¹⁵Treeg købene, namui nunelø, maig pønrrabeløbe truyutø tarømisrmø melay, namashib pønrrøwa kusrenaniilan lata, kabe kilgayu pørigwan kusrenaniilan lata truigwane elatchab kømø, tab tøga pønrray.

¹⁶Namui Señor Jesucristo nøtøwei, namui Tius Møskaimba tru nø namun undaarawa, tru nui ka yandø tab indiitøga managatig chi isumig kaanrraimba, munig melamig truba tabigwan tranøbiibe,

¹⁷ñimui manrrømerayu purø tab kui pønrrønrraimab isub, ñimui chigurrimbunø tabig marigu lata, tabig wamindigu lata tabig marig kørrømisrtrai treeg martrun.