Read Namrrik 2 Tesalonicenses 3 Bible Online

2 Tesalonicenses 3 - Namrrik bible

2 Tesalonicenses 3

¹Pøs treeg købene, yandø møimbe, namui nunelø, namuyasig Tiuswan miab melørrunrrigay chinrrab, Señorwei wam petø truørø larrøbichib inrrai, trurrigu tru wambe maya nuguen tabig kui mørøb utig kønrrai, tru ñimui utusrø puben, utab lataitøweingue.

²Katø trømbøig marøptø yandø mindiilø, larrø kaig møguelai tasku nam kegørrab melamig kømønrrai tøga miarrunrrigay. Kaguende isubigwan Jesucristoinug pasra tøgagømigwane mayeeløbabe tøgagømøn.

³Inchendø Señorbe chu uraskucha tarømisrmíig kua, nøbe ñimun kørrømø, mur pønrrønrrai purugub, Satanás, tru larrø kaigwei tasku kegørrømønrrai ashib tøga pasrønrrun.

⁴Nambe Señortøgabe treeg kuitamab isua pønrrer, martrai nam karua pønsraigwan ñim møi ya marøb melaigwan lata, katø maramigwan ñimbe marøbig martrab kui.

⁵Tiuswei undag købigwanba, maig kuingucha yaandø, yaandø melamig Cristo tøgagúigwanba, Señorbe ñimui manrrømeran trunun nebua tøgagønrrai martraimab isur. Maramigwane martrai waminchib

⁶Namui nunelø, maramigwan treeg marøb melønrrigay chib, Señor Jesucristoi munchiyu, marmø kømø, treeg martrai ñimun karumønrrun, tru Cristogurri ñimui nunelø møikkøben ke chigucha chi marmø, ka uñchabgøba inchib, nam ñimun maig kusrenanig køben treegwan møra marmíibabe linchimøtay cha.

⁷Pøs ñimbe yandø ashibelø køn, nam mandø waraig købigwan ñimgucha treetøwei waramig kønrrai. Nambe ñimui utu warappe, chi marmø ka warønrrabgøba inchimøwei,

⁸kabe namma møigweiwan køben mappe, chi marmø ka purrøwatø mamøwei indig køn. Masken treeg kømøtø, namma maramigwane isua møra, muraara muraara yem kwaløm marøbelø ker, ñimun møilan køben kagatø ka tranrraindø munig purrømønrrappe.

⁹Nambe mu mandamgaig maramig chigar kuagurri ñimun ‘purugurra’ chinrrab kaima pønrrømøtø, ñimguen namun asha kusrenrrai isua, øyeeg muraara marig købig køn.

¹⁰Nambe ñimba amøñib urassrøweinguen øyeeg kønrrain cha iigwan karua pasrig købig køn: møikkøben maramigwan chi marøg kømui inchibiibe, trube, mabgucha mamumig køn cha.

¹¹Nambe wammøra ker, møiløgøben ñimui utuelø ke chigucha chi marmø ka amøñinrrabgøba inchibelø kuin kui, nømuimburab kømubendø, mendailaisrø ke ka neesha mørøb.

¹²Treeg inchib misaamerane nambe Señor Jesucristoi munchiyu marmø kømø, martrai karua pasrer, maig maramigwan treeg marøb melønrrain cha, nambe nømun waminder: warappe, nømuiwan marøb wasrøndaa marøb kuy cha; mappe, nømuiwan manrrab.

¹³Inchen ñim, namui nuneløbe, chigøben tabig maramigwane muraarab melønrrab kømø, maray.

¹⁴Møikkøben tru i kilgayu maig martrain cha trendaigwan mørmíigwane ñimbe trunune trendø treeg kui yandø asha tøgaguy. Incha truibabe linchibgucha linchimumig køn, treenchene kwartrai.

¹⁵Inchendø kaig kønmab ashiptø ashig kømui inchib treeg inchib tøgagømøtø, nuneg kui ashabe, ‘ashiptø megau cha; øyeebe marmumig køn’ chib, eshkab wamindamig køn. Tabig wamindiilø srabeig

¹⁶Señor tru chi isumgaig tab købigwan tranøbig, nøtøwei manatøgucha maig kuindøgucha ñimun tru chi isumgaig tab købigwan tranrrun. Señorbe ñim mayeeløba pasrønrrun.

¹⁷Na Pablo nai taska iigwan pørar, ñimun ‘ka amøñigueh’ chib. Kilgamera møitøgucha na pøriiløbe na pørig kønmab asamdeelø kønrrai, øyamay pørøbig kur.

¹⁸Namui Señor Jesucristoi ka yandø tab indiibe ñim mayeeløba kønrraimab isur.