Read Namrrik 1 Timoteo 6 Bible Online

1 Timoteo 6 - Namrrik bible

1 Timoteo 6

¹Ñim møitøgucha ka karua srua kuindiig melabeløbe ñimun karub pera købelane ka palabinø inchib maig købash inchimø, tab indamig køn. Tiuswei munchiwanba, katø tru tabig kusrenaniilanba purø trømbøig wamindig kømønrrai.

²Inchen ñim møiløgøben, ñimun karub pera købelø Jesucriston kørebeløtøwein tøgarbe, Cristogurri nunelø kønmaptø, maig køben palabinøtø indamig kømøn. Masken treeg kømøtø, purø tabguen mara tranøb melamig køn, kaguende nømui maramelan ñim mara traninabeløbe Jesucriston kørebelø undaaraig nunelø kuimba. Iigwane kusrenanøb, øyeeg marøb kømig køn chib waminchig. Chigurrimbunø palømíig purø tabig ciertonig

³Namui Señor Jesucristoi chigucha chi kalø kusrenaniimíig tabiiba, katø Tiusweimburabelan nam marøb kømig kusrenaniiba truig maig køben treetøwein kømøtø, møikkøben ka peemaytø chi tabig kømíig kusrenanøbiibe,

⁴nøasiitø purø kusrebig kurmab indan, chigucha chi kusremíig købendø. Incha maig kø chib payib aleguiyamig, chigøben wamindiilan kwayam lab wamindamibe, kan kwanrrø lataig nigaig køn. Incha øyeekkurrindøwei truyugurri arruppe, katøgan chigøben tøgagøben pusrkwai asamig arrumba, kwayam lamig arrumba, katøganun trømbøig marøb tsalø wamamig arrumba, chigøben kemesra trømbøig isub amønamig arrumba,

⁵katø tru kaig maramig isubiitø nømui turmera mindiilø tøga misaameraba ke chi kømubendø ka kwayab kømig arrumba indan. Truiløbe tru newan ciertonigwane kerraig chiga misaamera, Tiusweimburabelan marøb tøgagúigwane nømbe trutøga an marøb pønrramigweyasig tøgar køn.

⁶Inchen nam maig tøgagúizhiitøgatø kasraatø melabelaimbe tru Tiusweimburabelan marøb tøgagúigugurri, chigurrimbunø tøgagømig arrubwei inchibig køn.

⁷Kaguende nambe yu piraumayma, chigucha chigar yandiig amrruig køppe, katø treetøwei chigucha chigar ambamig kønrrun.

⁸Inchawei nam mamig tøgagøb, asru kemig tøgagøb indinukkurrimbe, trutøgabe kasraatø amønamig køn.

⁹Kaguende pua misrøg kui inchibeløbe, chine tabig lataig kenamisrøb arruben, treegwan chull asha kegørran. Incha chine chine nebunrrab isuptø maramgaigwan mariiløyuba, katø ka trømbøig mincha pønrramig kønrrai mariiløyuba kegørra pønrramisren, truiløbe møguelane yandø chindamikkuchagaig misra pønrrønrrai kegørrøsrkøb, managatig kaigu kegørra pønrramig kønrrai mara pønsran.

¹⁰Kaguende chigurrimbunø kaig maramig arrubiibe, anwan ¡katø! ke kan chinchimmørø inchib chull indiiløyugurri arrubig køn. Inchawei møiløgøbenma an tøgagug købiitø yandø pella, nømui isubigwan Jesucristoinuutø pasra tøgagúigugurri tarømisra, nømasiitøwei chine chine purø isumdiig puig melønrrab tøga pønrramisran. Kørrømisrmø ibig inrrai wamindig

¹¹Trune ñi Tiusweyasiitø pasrab møøbe treeg indameløyugurrimbe tarømisramig køn. Sølgandø tabig kømigwanba, Tiusweimburabeløyu tabig kømigwanba, isubigwan Jesucristoinug pasra tøgagømigwanba, undag købig tøgagømigwanba elachimø marøbig marøb megamigwanba, katø maig købendø inchimø, purø tammay megamigwanba, iilan martrig.

¹²Ñui isubigwan Jesucristoinuutø pasra tøgagúigwane ñi tøga pasrønrrab isua kwayab, tru managatig øsig kømig tøgagúigwane pachamørtrab kømø tab tøga pasrau, Tius trunun tøgagønrrai wamøben, tru ñi truba yamelai merrab, purø tabig pasrønrrab waminchib pasraig købigwan.

¹³Katø chigurrimbunø pønrrabigwan øsig kønrrai tranøb Tiuswei merrappa, katø Poncio Pilatoi merrab, purø tabig nø maig kuigwan ‘nabe treeg kur’ chib, waminchib eshkab pasrabig Cristo Jesúswei merrappa, nabe ñune karua pasrar:

¹⁴tru martrai ñun karua pasrigwane kaig mariitøga chillig indig chigaig, katø chigøben ‘kailø køn’ tainab pasramig chigaig, treeg tøgagønrrai namui Señor Jesucristo kenamisramnegatig.

¹⁵Yandø tru treeg maram kwalømmera puben, trunun nø kenamartrab kuinrrun, tru nø mayanguen tab indig, tru nøtø Mayeelaim Pala Pasrabig trurrigu maya reymeraim pala nø Rey, katø maya misagwan ashib karub pønrrabelaim pala Nø Karub Ashib Pasrabig.

¹⁶Managuen kwanrrabig kømíig, muguen kemalamgaigu tørguegwalmabigu wabig, nune mu møkkucha asiimíig, katø mugucha nune ashchab kaimaig, Tius nøtø køn. Treegwan purø tab indiiba, managatig mayeelaim pala karub wamibabe nuyasig kønrrai inchar. Treeg kønrrun.

¹⁷Møin kwaløm yu pirau pua misaamerane puarmera kermaptø, purab nørreelø kermab inchib, tru chigurrimbunø tøgagúilø treetø kønrraitamab isumgailøyu ke truyutø isua pønrrømønrrain karunrrig. Masken treeg inchimøtø, nam kasraatø tab kui warønrrai Tius tru chigucha palønrraingaig tøgagømburab tøgagønrrai namun tranøbigweinug isua pønrrønrrai inchig.

¹⁸Tabigwan marøbelø kønrrain karunrrig, truba puarmera misrøppe, nømui chigøben tabig mariiløyu puarmera misrtrai. Tøgagúigwane chigucha merø kui inchimø, lata pirishib purugunrrab muniitø købelø kønrrai.

¹⁹Øyamaybe tru wendøsrø attrabigweyasig, tabig pølbasra marøb esegab kebamrrun, øsig kømig, tru managatig cierton øsig kømigwan nebua tøgagømig kønrrai. Timoteowan wamindiilø srabeig

²⁰¡Au! Timoteo, ñun chi martrai trana pasrigwane tabig isua møra tøgagu, Tiuswane chigucha kømíig marøb wamindiilanba, ke ka wamincha møriilanba, katø tru nømui nørrø nebua ashib kusreb taig chi cierton kømíigwanba, treelan mørøb pasrønrrab kømø meganrrig.

²¹Pøs møiløgøbenma trunun marøb kebamba, nømui isubigwan Jesucristoinuutø pasra tøgagúigugurrimbe yandø pella, chab tarømisran. Tiuswei ka yandø tab indiibe ñimba pasrønrrun.