Read Namrrik Filemón 1 Bible Online

Filemón 1 - Namrrik bible

Filemón 1

¹Na Pablo Cristo Jesúsweimburabelan marøb megaikkurri kailan keeri yau pasrabiibe, namui nuneg Timoteoba misra, ñi nai undaaraig namui maramigu lincha marøbig, Filemónwan køben,

²katø namui nuchag Apian køben, trugurri Arquipo tru namui marameløyu, marig kørrømisrtrai tranrrab megabigwan køben, katø tru iglesia ñui yau tulundzunabelan køben pørar.

³Tius namui Møskaimba, Señor Jesucristoba nui ka yandø tab indigwan køben, chi isumgaig tab købigwan køben, ñimun tranrraimab isur. Jesucristoinuutø pasra tøgagúiba, undag købiiba tøgagúig

⁴Tiusba waminchippe, chu urastøgucha ‘ungwa, ungwa’ chibig kur ñun isub.

⁵Kaguende ñui isubigwan Señor Jesúsweinug pasra tøga megaigwanba, katø Tiuswei misaameran ñibe truba undaguig køn taigwanba wammørikkurri.

⁶Inchawei tru ñui isubigwan Jesucristoinug namba lata tøgagúig, truibe truba tabig purugub pasrønrrai Tiuswan miabig kur, tru Cristo Jesúsweinug nam chigurrimbunø purø tabig tøgagúigwan nebua ashchai.

⁷Kaguende nane truba truba kasrag køb, truba tab kuig kuig køn, tru ñui undag købikkurri. Kaguende Tiuswei misaamerai manrrømerabe, ñigurri pishindø tab kuig kasraatø pønrrønrrai marin køn, ñi nai nuneg. Pablo Onésimoyasig purøwaminchib

⁸Inchawei nabe Cristogurri mu chi chinrraingaig, ñi maig maramigwan treegwan martrai karua pasramig tøgagøbendø,

⁹treeg inchibgunrriibe tammay undag købiitøga tiusmanda treeg martrurrunrrig cha, ñun miawa pasrar, na Pablo, yandø køllig, na møi ya Cristo Jesúsweiwan marøbig kuikkurri kailan keeri yau pasrabig.

¹⁰Nai nusrkai lataig Onésimoyasig ñui merrab purøwaminchab inchar, na kailan keeri yau pasrøwa, nai unø lataig misra pasrabigweyasig.

¹¹Onésimobe merrappe chigucha kømíig købig kuig, møimbe ñuyasig lata, nayasig lata, chiyutøgucha ke nø purugub megabig misrin køn.

¹²Incha nabe katøle nune ñuimay ørar, tru nai manrraugurri undaaraigwan.

¹³Pøs naba kørrømisrtrai nune, nabe kørrømarømmørø isuig køn, Tiuswei tabig srø wamgurri nan merrarrawa keerig pasrøben, ñi purugub megab lataitøwei nan purugub meganrrai.

¹⁴Inchendø ñimerrig maig tainguen ashmøwatøbe, nabe ke treeg martrab inchimuig køn. Tru na ñun øyeeg martrunrrig taigwane, ke na ñun treeg maramne indig kømøtø, uyube ñi maig maramdiig køben treeg asha martrai inchar.

¹⁵Onésimo kan maya yanagatig ñun øyeeg tarømisrøppe, katøle managatig ñi nun yandø tøgagørrømisramig kønrrab kua, øyeeg tarømisrig kuitamab isur.

¹⁶Møimbe yandø nune karuindiig megabig kui lataig kømøtø, katøguchinguen tøgagømmay tøgagørrunrrig, kan undaaraig nunewan lataikke, nøbe naimbe truba undaaraig køn. Trune ñibe treetøguen kømø, katøguchinguen isua undaaramig køn, nø misag pasraigu lata, Señorweinug pasraigu lata.

¹⁷Inchawei ñi naba lincha marøbig kuabe, trube, nune nan utab lataig uta tøgagørrunrrig.

¹⁸Inchippa ñun chigøben kalø mara kuin kui, kabe chigøben ulø misra kuin køb chigøbene, trube, trunun na ashchab, nan ulø payrrunrrig.

¹⁹Na Pablo naashib nai tasiitøga iigwan pørar: ‘Ulø chigúin købene, trube, na purø waramønrrun’ chib, ñuimburab ñitøweinguen Tiusweimburabeløyu nan truba nørrø ulø kuigwan truigwanguen chi kebachimøtø.

²⁰Trube, nai nuneg, ñi Señorgurri øyeeg tabig nayasig marimbe køtan, nai manrrau chi isumø, tab kui pasramig kønrrai Cristoinug.

²¹Na pørøppe, na maig taigwan møra martraitamab isua pørar, katø na maig taigwandø kømøtø, katøguchinguen tabig martraitamab isuague.

²²Tru kømnetø katø na ñimuisrømay arrua, na chu pua kørrømisramigwangucha tamarøb megarrunrrig chinrrab inchar, na ñun ashchab arrumig kønrrai, ñim Tiuswan miab melaig treeg pubene, katøle ñimun ashchab arrumuitamab isua. Wamindiilø srabeig

²³Cristo Jesúskurri tru kailan keeri yau naba pasrabig Epafraskucha ñimun ‘tab ka amøñigueh’ cha øran.

²⁴Katø Marcos køben, Aristarco køben, Demas køben, Lucas køben nai maramigu maram purugub melabelø, truiløgucha ‘tab ka amøñigueh’ cha øran.

²⁵Namui Señor Jesucristoi ka yandø tab indiibe ñimba kønrraimab isur.