Read Namrrik Hebreos 13 Bible Online

Hebreos 13 - Namrrik bible

Hebreos 13

¹Ambugurri igurri undaarabig undaaray, kan trag nunelø lataitøwei.

²Ñimui yau asiimeelø pubelan tab wamab ya pebamigwane pesannamøtay. Kaguende møiløma øyamay marøb meløwa, ángelesmeranguen ya pebøbelø køn, chi truilø kuitamab isumøtø.

³Katø kailan keeri yau purrabelane ñimbe nømba kanbalatø keerig purrøwa lataitøwei isub, katø kaig indinab melabelane ñimun treeg indi lataig isumig køn.

⁴Kasharamibe purø tabig købig kui mayeeløba treeg isua tøgagøb, katø kasharawarmerabe nømui kiainuube mu pegwan pera kiamig kømøtø køn. Kaguende møg lata, ishug lata trømbøig marøbelanba, katø itøluløpteelanba, Tiusbe nømun maig kønrrabigwan asha martrab køn.

⁵Ñim amøñippe, anwane ke chinchimmørø chull inchib amøñimøtø, ñim møi maig tøgagúitøgatø tab kui mørøb kasraatø amønamig køn. Kaguende Tiusbe trendaig kuig køn:“Managuen ñundø elachimøwei, chinchibgucha tsunrrai managuen ñun tarømisrmøwei indamønrrun” cha.

⁶Inchawei øyeeg taig købene, nambe treeg kønrraitamab isua, chi isumø trenchinrrun:“Nan purugubiibe Señor nø køben, nabe chigucha kørmumønrrun cha.¿Møøbe nane chigúi martrautah?” cha.

⁷Tiuswei wamwan ñimun waminchib, ñimun pera marøb pønrrabelane isua kømig køn. Nømui tru tabig amønaigu asha kusrenrrai mandø tabig kørrømarig købigwan tab isua asha, tru nøm isubigwan Jesucristoinug pasra mandø tøgagúigwane treetøweih tøgaguy.

⁸Jesucristobe merrabsrø lata, møiyan kwaløm lata, katø managatig nøbe yunømarmíig, treetø køn.

⁹Chigøben peemaytø kusrenaniilø pesrøteeløtøga amburab iburab srua ambiilø kønrrab kømøtø kuy. Pøs namui manrrømera Tiuswei tru ka yandø tab indiitøga mur pønrramigwan utiibe tabig køn, tru chi mamimeran manrrai karua pønsrailan marøb megaig lata kømøtø, tru øyeelan mariibe chiweingucha chi purugumeelan.

¹⁰Nambe kan altar tøgaguer tru Tiuswei carpa ya tabzhigu marøb pønrrab sacerdotesmerabe tru altaryuigwane mamig kømíig.

¹¹Pøs tru maya sacerdotesmeran nø karub sacerdote tru, “Kerriguwan Tiusweindiig Kønrrain” tannug tru animal kweetsiilai aniwane tru kaig mariilaimburø trannrrab umbusrø srua kebyaindøgucha, tru animal kwaigwei asrmerane nøm warainukkurri nøørøsrø srua webamba, parriilø købig køn.

¹²Inchawei treetøwei Jesúskucha ciuda yaskabyugurri wambig nøørøsrø kwaig købig køn, nui anindøga Tiusweindø kønrrai misaameran chish martrab.

¹³Inchawei namgucha nuimay nun katønrrab webamgun ciudayugurri wambig nøørøsrø, nun maig trømbøig indinab megaigwan namgucha treetøwei kaig marinab melønrrab.

¹⁴Kaguende nambe yu piraube kan ciuda managatig pasrab pasrønrrabig chigar kua, nambe tru attrabigwan lab ker.

¹⁵Inchawei Señor Jesucristogurri chu urastøgucha Tiuswan nam animal kweecha lataig tranøppe, purø tabzhig wamindiilø trangun, nui munchiwan tabig wamindi wam tru trigugurri webarrubiitøga.

¹⁶Ñimbe tabig maramigwanba, ñim chi tøgagúigwan pirishib kømigwanbabe pesannanrrab kømø melay. Kaguende kweecha tranøb lataitøwei Tiuswan keta traniilø øyeeg traniiløbe nø purø tab kui wanrrai marøbig, treeg køn.

¹⁷Ñimun pera marøb pønrrabelane maig karuigwan mørøb, nøm maig chiben treegwan melay. Kaguende ñimun chi kømønrrai chu uraskucha ashibeløbe nømwein køn, nømui chi mariilan nøm Tiuswan eshkab pønrrønrrabelø kua. Nøm maramigwan marøb melappe, kasraatø, chi isuin kømøtø, marøb kønrrai inchigay. Kaguen trengømuisruandøbe, ñimune chiguen chi tabig kønrraamøn.

¹⁸Namuimburab ñim Tiuswan miarrunrrigay. Pøs nambe namui isub kebachib pasrabigu chi ‘kalø køn’ chibig chigar pønrrab, katø chiyutøgucha nambe tabig marøb melønrrab isua meler.

¹⁹Nabe ke tiusmanda Tiuswan miab kørrunrrigay chinrrab inchar, na peba ñimuisrømay katøle arrumig kønrrai. Patsøgønrrab srabe wamindiilø

²⁰Tru chi isumgaig tab købigwan tøga Tius, tru managatigwei acuerdo mari anindøga tru Ubishameran Ashibig purø nuig, namui Señor Jesúswan kwailai utugurri kusrubiibe

²¹tru nø maig maramig palai waigwan martrai chigurrimbunø tabig palabigwan ñimun tranrrun, Tius nø purø tab kui ashib wamig kønrrai Jesucristogurri namuinug nø marøb pasraitøga. Jesucristone managatig tørguegwalmabig kønrrun. Treeg kønrrun.

²²Na øyamay melamig køn chib wamindi wamwane, nai nunelan, tiusmanda tammay utørrunrrigay chinrrab, pøs nabe landøtiig pørar.

²³Namui nuneg Timoteobe kailan keeri yaugurri webyain kui ñim wammøra kønrrai inchar. Incha nø petø arrubene, nabe nøba ñimun ashchab arrumønrrun.

²⁴Ñimun ashib pera pønrrabelø mayeelanba, katø mayeelø Tiuswei misaameranba ‘tab ka amøñigueh’ tan chirrunrrigay. Katø italiasreeløgucha ñimune ‘tab ka amøñigueh’ cha øran.

²⁵Tiuswei tru ka yandø tab indiibe ñim mayeeløba pasrønrrun.