Read Namrrik Santiago 1 Bible Online

Santiago 1 - Namrrik bible

Santiago 1

¹Na Santiago Tiusweimba, Señor Jesucristoimba marøb megabig Israelwei doce nusrkaløgurri misag nørrø larrøbicha, pirau kan ørøtø amba warabelan ‘ka amøñigueh’ chinrrab inchar. Tiuskurri kusrebig kømig

²Nai nunelø, chigøben, chigøben puig meløwabe, truba tab kui inchib, kasraaray,

³kaguende ñimui isubigwan Jesucristoinuutø pasra tøgagúigwan maig køtashchab marigugurrimbe masken tammay melamig arrubig kui ñim ashibeløbe.

⁴Inchendø ñim tru treeg tammay kullaaramø, ka melaibe, newanig kønrrai inday, chiyugucha neilø, chi isumgaig newan pønrrabelø, yandø chiyugucha palømø newanelø.

⁵Ñimun møigwan køben øyeeløyu tab asha maramigwan kusrebig kømig paløbene, Tiuswan miau, nøbe tranrrun. Kaguende nøbe mayeelan tranøppe, merøbalatø tranmøwei, katø chi miabene, namømøtø, tammay tranøbig køn.

⁶Inchendø miappe, ke Tiusbe tranrraitamab isua miamig køn, treeg kømuptinchaitamab maizhikken chi treeg isumøtøgue. Kaguende chi treeg kømønrrab kø chindermab isubiibe kan maryu pi welarwan isig ichibig amburab, iburab srua yaig lataig køn.

⁷Møikkøben treebe Señorwan chigøben utamuitamappe isumøta.

⁸Kan møg møindø øyeeg martrab isub, katøguen srønabe peetø isubiibe, chiyutøgucha mumayguen kømíig unan.

⁹Kan truburab chiga nuneezhigwan Tius nune truba nuig marene, purø tab kui møramig køn.

¹⁰Inchen puaibe purø tab kui møramig køn, Tius nune chigucha kømíig lataig marene. Kaguende puaibe kaumerayu u lataig kua, pasrabig pasrønrrab kaiman.

¹¹Pøs pørr webarrua, purø mur pachene, kaube mul-laben, ube peñen, tru tabzhiibe yandø pinan. Øyeetøwei puaikkucha nui chigøben penab, yanøb uniiløyu pinønrrun. Chinetø kaig pub arringucha treegu ka megab

¹²Chigøben pub arruben, tammay megabig megabiibe mayanguen tab kuig køn. Kaguende treegu puraya pasramisrøppe, nun undaguelan Tius keta trannrrab kørrømisrig tru øsig køm coronan utønrrun.

¹³Møigwan køben chiyugøben kaigyu kebenamdiig mørørabene, Tius treeg isunandan chimøta. Kaguende Tiusbe mana kaigu kebenamdiig kuig mørørai wamøwei, ni katø mun kaigu kebenøsrkønrrab inchimøwei inchibig køn.

¹⁴Treeg kømøtø, møigwandøgucha nui kaig isubeløtøwei srua iben, truiløtø yandø tabig lataig asønangarua kebenøsrkaim pasran.

¹⁵Inchen tru trømbøig isuilø yandø umbu kebya, pasramisrikkurrimbe, kaig maramig kal-lan. Inchen tru kaibe yandø ne nurappe, kwamigwan kal-lanrrai mara pasran.

¹⁶Nai undaaraig nunelø, ñimguen pella peemaytø isub pønrrømøtay,

¹⁷chitøgucha tabig ketiiba, katø chigøben tabig newan marøbelø kønrrai ketiibabe srømbalasrøngurri arrubig køn, tru srømbalasrø chine pilab pønrrabigwan marøbig Tiusweinukkurri. Nøbe nø maig køppe, manatøgucha treetø kua, nuinuube løstørab lata inchib, tørmisrøb lata inchib, inchibiibe chigagøn.

¹⁸Nun trendø treeg marøg kuikkurri, nui newan cierton wamdøga namune katøyug srøig kal-langaruig køn, nø kerrigu misagwan ellmara pønsrailai utu nammerrig ke srøsrø ellmarig misrig latailø kønrrai. Kalutøga møriitø kømø, maramig køn

¹⁹Nai undaaraig nunelø, iigwan isuy: ñim mayeeløba møramigwane muniitø purramig køn. Inchen wamindamigwanba, namamigwanbabe tsøndatø isuptø maramig køn.

²⁰Kaguende kan møg namig køtanmaptø mariibe Tiuswei sølgandø tabigwan marmøn.

²¹Inchawei treeg købene, ñimbe ashikken kønrrabgaig marigwanba, chigøben kaig mariilø trutø netsaig tøgagúilanba webeta elacha, Tiuswei wamwan ñimui manrrau ellgwaigwane mur kurrashmø, tammay utay. Kaguende tru wam wamindiibe maramburab marøbig køn, ñimui møsigwan wesramig.

²²Pøs Tiuswei wamwane maig martrain taigwan ñimbe marøbelø kømig køn, ka møratø, møratø kønrrab kømøtø. Trengømuisruandøbe, chi mørmui lataitøwei ñimasiitø ka kegørrab pønrraig webinrrun.

²³Kaguende møikkøben Tiuswei wamwan mørøptø møra, tru maig taigwan møra marmíibe, kan møg nui maløwan espejoyu ashibig lataig køn,

²⁴nui malø maig kuigwan asha, katø llirawa, ippe, pesannab lataitøweingue.

²⁵Inchen møikkøben Cristo maig martrai karua pasrig newan sølgandiig, tru chi iløsrkaimíig kønrrai marøbigwan ke tab asha, truyu megabig megawa, tru martrai karuigwan pesannaptinchimøtø marøbigweimbe, nui mariiløyu mayanguen tab kuig kønrrun.

²⁶Ñim møikkøben, Tius martrai karua pønsrailøyu maizhikken purø punømø marøbig kurmab isubendø, nui niløtøgabe maig kurrøbashtø waminchibiibe nøasiitø kebeñib pasran. Inchen tru nø Tiusweiwan maizhikken purø punømø marøb pasrab taibe chi marmui lataitøwei webyan.

²⁷Tius Møskawei merrab tru nø karuilan maizhikken pinab marmø, chillig indiimíig mariibe, iig køn: usri møskai, peta kwailanba, kelø peta kwailanba chigøben isuig meløben isua ashchab ambub, katø yu pirau kaig trømbøig arrubiitøga chillig incha pønrrømøwei indamig.