Read Namrrik 1 Juan 2 Bible Online

1 Juan 2 - Namrrik bible

1 Juan 2

¹Nai ureezheelø, iigwan ñimun pørar ñim chigøben kaig marmønrrai. Møikkøben kaig marindøgucha, namuimburab Møskawei merrab kan purøwaminchibig tøgaguer, Jesucristo tru sølgandø tabigwan.

²Namui kaig mariiløgurri Tiuswei namig købigwan nø uta pasramisra namuyasig nø kwaig køn, trurrigu namuiwandø kømøtø, yu pirau maya misaamerai kerriguelaimba.

³Tius maig maramigwan martrai pønsrailan nam møra marabe si, trube, nam nun nebua ashibelø kermab asamig kønrrun.

⁴Inchen møikkøben: “Nabe Tiuswan ashibig kur” chibendø, nø maig maramig martrai karuilan møra marmubene, truibe isaptiig kui webiben, tru newan ciertoniibe nuinuube pasrømøn.

⁵Trune Tiuswei wam maig karuigwan møra marøbig, truibe si, Tiuswan kerrigu newan tabig undaarabig misrin køn. Trumaybe nambe nøba kanbalatø lincha pønrrermab aser.

⁶Møikkøben Tiusba kanbalatø lincha pasrar chibiibe, Jesucristo nø maig uñibig køben, treetøwei unamig køn. Kan srøig martrai karua pasrig

⁷Nai undaarailø, i maramigwan martrai karua pasrigwan na ñimun pøriibe srøig kømøtø, tru ñim merrabsrøngurri trendø tøgagúig truitøwein køn, tru martrai karua pasrig tru trendø merrabsrøngurri tøgagúig tru wamwan ñimbe møra køn.

⁸Inchen køben nabe ñimun martrai karua pasrig ñimun srøig pørar, nuinug lata, ñimuinug lata ciertonig. Kaguende tru løstiibe yandø pureb iben, tru tør newan ciertoniibe yandø pilabguen pasran.

⁹Møikkøben ‘tøryu pasrar’ chibendø, nui nunewan tsalø inchibiibe katøgucha løstøyu srø pasran.

¹⁰Inchen nui nunewan undaarabiibe tøryu pasran. Incha nuinuube srurrengwangarubiibe chigagøn.

¹¹Inchen nui nunewan ashig kømui inchibiibe løstøyu pasrab, katø løstøyu unan. Incha nøtøwei chumay ib pasrarmabguen ashmøn, kaguende løstiibe nui kabmeran ashmønrrai kasrøben.

¹²Ñim ureezheelan, na ñimun pørar. Kaguende Jesucristoi munchigurri ñimui kaig mariilan ulø paymønrrab pesannaig køn.

¹³Na ñim møskalan pørar, kaguende srøsrøgurri manawei nø pasrabigwan ñim nebua ashibelø kuimba.Na ñim matsørelan pørar, kaguende Satanás, tru larrø kaigwan ñim kanaig kuimba.Na ñimun ureezheelan pørig køn, kaguende Møskawan ñim nebua ashibelø kuimba.

¹⁴Na ñim møskalan pørar, kaguende nun srøsrøgurri manawei pasrabigwan ñim nebua ashibelø kuimba.Na ñim matsørelan pørig køn, kaguende ñimbe kørrømø,mur pønrrabelø kuikkurri, katø Tiuswei wam ñimui manrrau pasrøben,Satanás, tru larrø kaigwan kanaig kuimba.

¹⁵Yu pirauigwan purø undaaramøwei, katø yu pirau chi købigwangøba undaaramøwei indamig køn. Møikkøben yu pirauigwangøba undaarabene, Tius Møskawei undag købiibe nuinuube kaagøn.

¹⁶Kaguende yu piraugurri arrubiibe, øyeeg køn: asr maig marøg køben mariilø, kaptøga chigøben chull asiilø, katø namui chigøben købiitøga truba nørreelø kømmørø indiilø. Øyeeløbe Tius Møskaweinukkurri arrumøtø, yu piraugurrindøwei arrubig køn.

¹⁷Inchendø pirøbe, katø truyu chigurrimbunø chull indiiløbañau patsab iben, trune Tius maig kønrrain køben treegwan marøbiibe managatig øsig kønrrun. Criston ashig kømui inchibelø

¹⁸Ureezheelø, yandø srabe kwalømmera puin køn. Tru Criston ashig kømui inchibig attrab kui ñimbe wammørøbelø køn. Inchawei møi yangucha tru ‘Cristo ker’ chibelø truba truba amrruin køn. Treekkurri nambe yandø srabe kwalømmera kui aser.

¹⁹Truiløbe namui utugurri webambuppe, webambubwei inchendø, namuielø kømuig køn. Pøs namuielø kui kuimbe, namba pønrrabig pønrrabsruig kuinrrun. Inchendø webambuppe, ke mayeeløbabe kerrigu namui utuelø kømuin kui tørgandø ashchain kuig køn.

²⁰Inchendø ñimbe Espíritu Santoiwan itølusig tøgar kua, treekkurri ñimbe chiwandøgucha ashibelø køn.

²¹Nabe ñimun pørøppe, newan ciertonigwan ashmeelø kuimba kømøtø, ñim ashibelø kuimba pørar. Katø ñimbe ashibelø køn, chitøgucha isatø indiibe tru newan ciertonigugurri arrumíig kuin kui.

²²¿Tru isaptiibe mu kerah? ¿Tru isaptiibe Jesúswan ‘Cristo kømøn’ chibig kømuitarru? Iig køn tru Criston ashig kømui inchibiibe, tru Møskawan lata, Nusrkawan lata ‘Tius kømøn’ chibig, truig.

²³Mutøgucha Nusrkawan ‘ashmíig kur’ chibiibe Møskawangucha chigaig køn. Inchen møikkøben Nusrkaweimburab ‘nøbe mu kui ashig kur’ chibiibe, truibe Møskawangucha treetøwei tøga pasran.

²⁴Inchawei ñim srøsrøgurri wamindi mørigwane truyutø pønrrabig pønrrønrrab inday. Tru ñim srøsrøgurri wamindi mørøb amrruig ñimuinug pasrabig pasrøbene, trube, ñimgucha Nusrkaweinuuba, Møskaweinuuba pønrrabig pønrrønrrabguen.

²⁵Inchen Jesucristo tru namun trannrrab misra kørrømisriibe iig køn, tru managatig øsig kømig.

²⁶Na ñimun iigwan pørøppe, isatø may wamincha ñimun kegørrøsrkønrrab inchibelaimburab pørar.

²⁷Pøs ñimuimburappe, tru Espíritu Santoi itølusigwan ñim nun uta tøgagúig ñimui manrrau pasrabig pasraikkurri, ñimbe mu katøgane chi kusrennamig palain kømøn. Kaguende tru itølusiitøwei ñimune chiwandøgucha kerriguh kusrenanen, tru kusrenaniibe ciertonig, ka isatø indig kømøwein køben, nui Espíritu ñimun maig kusrenanen, trumay Cristoinug pønrrabig pønrray.

²⁸Inchawei ureezheelø, møimbe nuinug kanbalatø pønrrabig pønrray, nø kenamisren, chi isumø, nui merrab pønrrab, katø, nø arruben, nui merrab kørig misra kørrømisramig kaanrrai.

²⁹Jesucristobe sølgandø tabig kui ñim ashibelø kuabe, trube, mutøgucha sølgandø marøbelane Cristoinug kal-lawar kuin kui asamig køn.