Read Namrrik Apocalipsis 11 Bible Online

Apocalipsis 11 - Namrrik bible

Apocalipsis 11

¹Incha nane kan caña, unaasin tsig lataig tranabe, trenchibig køn: —Kurra, Tiuswei yawanba, tru altarwanba unaasha, katø truyu Tiuswan køriibala tabig waminchibelan munchi cha.

²Inchendø Tiuswei yau, tru yawambigwane unashmøta cha. Kaguende judíos kømø misaamera Tiuswan ashmeelan tranig pasran cha. Truiløbe tru Tiusweindø tarømari ciudawane pøn pila y tøbø pilaba itølulrrab køn cha.

³Inchen nabe pailø naimburab maig kuigwan waminchibelan øramønrrun cha, eshkanrrab amrrai. Truiløbe yaliig trøsrkøleelø kewar kwalømmera mil doscientos sesenta nemisramne naimburab eshkab waminchun— cha.

⁴I tru pailø naimburab maig kuigwan waminchibeløbe, tru pagatø olivo tusrmera køb, tru pagatø kandilerumera køb køn, Tius pirøwan nø ashib karub pasrabigwei merrab pønrrabelø.

⁵Møikkøben chigøben nømun kaig martrab inchene, nømui trigugurrimbe nag webarringarua, nømune kerrigu chishtø parrøbelø køn. Møikkøben nømun mindishinrrab inchibeløbe øyeeg kwamig nebunrrun.

⁶Tru Tiusweimburabigwan eshkabeløbe srømbalawan kasramig maramburab martrabelø køn, nøm Tiusweimburabigwan eshkab amøñib kwalømmerawan sre pumønrrai. Katø treetøwei pimerangucha anim pimera misrtrai marøg købene, anim pimera martrabelø køn. Katø pirøwangucha kaig nebunrrai, kaig kwanrrømera køben, kaig pølømmera mindishinrrabelø ørtrun, nømun mammay mindishig køben mindishinrrai.

⁷Yandø tru Tiusweimburabigwan maig kuigwan nøm chab eshkabene, tru purø trømbø umbu trabyugurri animal purø trømbøgølig nebarrua nømba kwayam lawa, nø kanawa, truilane kwetchun.

⁸Inchen kwailai asrmerabe ciudayu mayeelø llirai mayu waramisrtrun tru nømui Señorwan kurusyu mesraig nu ciudayu, truibe Sodomaba, Egiptoba lataig asønabig køn cha waminug.

⁹Inchen misag nørrø kanbalatø warabeløba, peg peg misag søtømeraba, peg peg wam waminchibeløba, chu pirausreelø køben misag nørrø pønrrabeløba, truiløbe pøn kwaløm menrra tru kwailai asrmerane ashib kønrrun. Incha truilai asrmerane sørinrrabmerayu sørøbashmønrrun.

¹⁰Inchen misaamera pirau warabeløbe tru kwaig warabelaimburab truba truba kasraarawa, kasrag købiitø kangurrin kangurri ketiilø ørtrun, kaguende tru pailø Tius maig karuigwan eshkabeløbe tru nømune mumaygucha kømíig ¡katø! isua møra melønrrai marøbelø kuikkurri.

¹¹Indiibe pøn kwaløm menrrayube øsig kømig Tiusweinukkurri arrubig nømuinug kebiben øsiiranrrai Tius nømun urrøben, katø kurra, pønrramisrøptinchen, mayeelø ashibelane purø trømbøig kørig købig arrubig køn.

¹²Inchene tru pailøbe srømbalasrøngurri kan wam truba mur wamindi mørøbelø køn, trenchibig: “Yusrø nerruy” cha. Inchen nømun ashig kømui inchibeløbe ashibelø køn, nømbe kan wañiyu srømbalasrømay nebamben.

¹³Inchen treeg puraibendø, kan truba mur pirø kønabig arruben, tru pirø kønabikkurri ciudayu yamerabe milmørig cienbatø kegørrabig køn. Inchen treegu misaamera siete mil kwabelø køn. Inchen kwamø kørrømisrøbeløbe truba trømbøig kørig kuilø, Tius srømbalasrø wabigwan truba truba tabig waminchibelø køn.

¹⁴Srøsriigwei wendauig trømbøig chab puraibendø, tru kørig kømdiig pøn kønrrabyuibe petø attrun. Tru siete kønrrabyu trompeta

¹⁵Inchen tru ángel siete kønrrabyuig nui trompetan urrøbene, srømbalasrømbe wammera purø mur trenchibelø køn:“Pirau reymera nøm ashib karub tøgagúiløbe namui Señorweimba, nui Cristoimba misran cha. Inchen nøbe managatig ashib karub wanrrun” cha.

¹⁶Inchen tru kølli misaamera veinticuatroelø tru nøm karub purrainug Tiuswei merrab purrabeløbe pirau tømbønsrøb srala, Tiuswan køriibala tabig waminchib,

¹⁷trenchibelø køn:“Mayanguen ungwa, ungwa, Señor Tius Newan Maramburab Marøbig, møi ya pasrabig, katø manawei købig.Kaguende ñui purø nuig maramburab mariitøga ñibe ashib karub pølbasran cha.

¹⁸Misaamera nørrø pønrrabeløbe truba truba namig kurrig køn cha. Inchendø ñui purø trømbøig namig købig pub,katø tru kwabelan maig kønrrabigwan asha maramikkucha yandø pub indin køn cha.Inchen ñui marøb melabelø tru ñi maig karuigwan eshkabelanba, katø tru ñui misaameranba, ñui munchiwan kaig kui lataig maramigwan køriguelanba, nørrø kusrebelanba, treeg kømeelanba,truilan truburø ketamikkucha puin køn cha. Trugurri pirøwan mindishib pinishibelangucha pinisamig puin køn” cha, trenchibelø køn.

¹⁹Inchen Tiuswei ya tru srømbalasrø pasrabig kurene, tru israelitasmeraba Tius acuerdo marig, tru arcabe, truyu kena pasrabig køn. Inchen palaig pilabelø køben, wammera køben, palaig trashibelø køben, katø kan truba mur pirø kønabig køben, purø trømbøig sre srug pubig køben arrubig køn.