Read Namrrik Apocalipsis 15 Bible Online

Apocalipsis 15 - Namrrik bible

Apocalipsis 15

¹Srømbalasrømbe katøgan chigøben kønrrab kuitamab asha kømig truba nuig ashibig kur kwaara asamdiig, siete ángelesmera siete chine kaig nebunrrai marøb amrrunrrabelø yandø srabeelan tøgar. Truiløtøga yandø tru Tiuswei namig købiibe truyu yandø newan patsøgaig kørrømisrøbig køn.

²Katø kan mar pigriu lataig naaba lindisaig ashibig kur. Tru animal trømbøgøligwanba, nundøwei tru treetøwei asha marigwanba, nui munchi numeronba utømø, treegu chinchamamø webambarbe tru mar tørguelarrøzhig pala Tius arpas traniilan srua pønrrabelø køn.

³Nømbe tru Moisés Tiuswei marøb megabig cantaigwanba, katø Ubisha-unø cantaigwanba trenchib cantabelø køn:“Señor, purø nørreelø ñi chigøben mariiløbe, kwaara asamdeelø mariilø køn chib,Señor Tius Newan Maramburab Marøbig. Ñui maymerabe tabig sølgandeelø, newan ciertonelø køn chib.¡Chusrøn køben misag purø nørrø pønrrabelai ñi Rey køn! chib.

⁴¡Ay Señor! ¿Ñun kørmíibe mu kuaasamø? chib. ¿Ñui munchiwan tabig waminchimíibe mu kua asamø? chib.Newan tabig chishiibe ñitøwein køben, truørø tru misag nørrø pønrrabelø kerrigubañui merrab amrrua køriibala tabig waminchun chib. Kaguende mumaytøgucha ñui sølgandø tabig mariilø kenamisran” chib cantabelø køn.

⁵Øyeelø chab puraiben, na ashene, srømbalasrø Tiuswei yaambusrø tru Tius nø pasramig nuyasiitø tarømarig pasrabiibe kuri ashibig kur.

⁶Inchen truyugurrimbe tru siete ángelesmera tru siete chine kaig nebunrrai marøb amrrunrrabelan sruar werrui ashibig kur. Truiløbe linotøga marig chishcheelø, tørbilabzheelø kewar, pørønaig orotøga marig pechoburab pørønawar købig køn.

⁷Inchen møikkøsrøn tru pibgatø øsiguelai utuibe tru siete ángelesmeran oro copamera siete tranøbig køn, Tius tru managatig øsig wabig, nui namig købigwan truyu netsøganiilan.

⁸Inchen Tiuswei tru tab yaube Tiuswei tørguegwalmabikkurrimba, maramburab marig pasraikkurrimba naguishtø tinbuløben, mugucha kebamrrab kaimabelø køn truyube, tru ángelesmera siete tru chine kaig nebunrrai marøb amrrunrrabelan ángelesmera kan kan srua ambiilø maig punrrabig chab purayamnegatig.