Read Namrrik Apocalipsis 16 Bible Online

Apocalipsis 16 - Namrrik bible

Apocalipsis 16

¹Inchen kan wam truba mur wamindi mørøbig kur, Tiuswei purø tab yaugurri tru siete ángelesmeran trenchib: “Ambay cha. Incha tru siete copas Tiusweinukkurri purø trømbøig kørig kømdiig namig købig tøgaig arrubigwan pirau lushchigay” cha.

²Inchen tru srøsrø ángelbe ya, nui copan pirø palawan lushene, tru animal trømbøgøligwei marcan tøgarwanba, nun tru treetøwei asha marigwan køriibala tabig waminchibelanba kan pisrø purø trømbøig pusrkwab pill-llabig webarrubig køn.

³Inchen tru ángel par kønrrabyuig nui copan mar pala lushene, maryu pibe kan kwaigwei ani lataig misrøbig køn. Inchen maryu chine øsiguig purrabeløbe mayamba chab kwabig køn.

⁴Inchen tru ángel pøn kønrrabyuig nui copan nørrø pimerayuba, pigabmerayuba lushene, kerriguba anindø misrøbig køn.

⁵Inchen tru pimeran ani misrtrai marøb pasrab ángelbe trendaig mørøbig kur:“Ñi, Señor, tabig sølgandø marøbig, møi ya køb, katø manasrøngurri købig,Tius Newan Tabig ñibe treeg køn cha. Kaguende ñibe iilan maig kønrrabigwan asha maran cha.

⁶Pøs tru pirau misaamerabe tru ñui misaameranba,Tius maig karuigwan eshkabelanba kweecha aniwan lusikkurri,møimbe nømungucha ñibe ani mutsøsrain køn cha. Kaguende nømune øyeeg maramigweim palaig kuig køn” cha.

⁷Inchen tru altaryugurri trendaig mørøbig kur:“¡Øø, treegwein køn cha, kan ñi Señor Tius Newan Maramburab Marøbig.Ñui maig maramigwan ñi asha mariibe, ciertonig, sølgandø tabig mariilø køn!” chib.

⁸Inchen tru ángel pib kønrrabyuig nui copan nøsig pala itølushene, tru nøsiibe nui pachibiitøga misagwan parrøbig køn.

⁹Inchen misaamerabe tru purø trømbøig pachibiitøga parrig kørrømisra, Tiuswei munchiwan tsalø wamabelø køn, tru øyeeg chine kaig nebub attrai arringarub maram purab marøbigwan. Treeg kuindøgucha nømbe isua møra, Tiusweimay llirameelø køn, nun truba tabig waminchab.

¹⁰Inchen tru ángel trattrøgatø kønrrabyuig nui copan tru animal trømbøgølig wamisra karub waigwan itølushene, nø ashib karub tøga waibe kerriguba løstiig kørrømisrøbig køn. Inchen misaamerabe pusrkwabiitø nilømeran ke tsachatø mørøbelø køn.

¹¹Incha tru srømbalasrø wab Tiuswan tsalø wamabelø køn, tru chine nømun pusrkwabeløgurrimba, katø trømbøig pill-llab pisrømeragurrimba. Treeg indingucha, nømui kaig mariilan isua møra Tiusweimay llirameelø køn.

¹²Inchen tru ángel seis kønrrabyuig nui copan tru Eufrates purø nu pi pala kelushene, tru pimerabe kølaptinchibig køn, pørr kal-labsrøngurri amrrub reymera puraambamig kønrrai may kura kørrømartrab.

¹³Inchen dragonwei trigugurrimba, tru animal trømbøgøligwei trigugurrimba, tru ka isatø ‘Tius maig karuigwan eshkabig kur’ chibigwei trigugurrimba pøngatø trømbøig marøb kwaimandziimera urututuumera lataig asønabelø werrubelø køn.

¹⁴Iiløbe kwaimandziimerai møsiimera købig køn, nui maramburab marigwan kenamarøbelø. Truiløbe pirø ørøba maya reymeraisrømay webambubelø køn, kwayamig truilan tulundzuningarunrrab, Tius Newan Maramburab Marøbigwei tru purø nu kwaløm kwayamig.

¹⁵“Au, nabe kan niliig lataig arrumønrrun. Mayanguen tab kuig køn pesannamø, ashiptø megabigweimbe, nui keigwan tab asha tøgagøb, katø ñi køsaatiig uñen, ñui køsagwan misagasinab, kørig puraimønrrappe.”

¹⁶Incha truiløbe tru reymeran tru hebreomaybe Armagedón tainug tulundzuningarubelø køn.

¹⁷Inchen tru ángel siete kønrrabyuig nui copan tru chiguchagayu srønzhig pala lushene, srømbalasrø tru Tiuswei yau tru wamisra karub wainukkurrimbe kan wam truba mur trenchibig webarrubig køn: —Yandø chab patsøgaig kørrømisran— cha.

¹⁸Inchen palaig pilabelø køben, sre mullibelø køben, palaig trashibelø køben arruben, pirøbe purø trømbøig kønabig køn, misaamera yu pirau srøtø warab urassrøngurri øyeeg lataibe managuen kønømuinrrunikke.

¹⁹Inchen tru purø nu ciudabe pønbaliig misrøb lanrra, pirisaig kørrømisren, yu pirau ciudamera pønrrabeløbe kerrigu tuin pitis kegørrabelø køn. Inchen Tiusbe tru Babilonia purø nu ciudawan isua, tru nui copayu purø trømbøig namig købig tøgaigwan mutsøsrøbig køn.

²⁰Inchen tru pirø pi tøbøtag pønrrabeløbe mayamba trubab chab lulen, katø nørrø tunmera chigucha chab trubabelø køn.

²¹Inchen srømbalasrøngurrimbe misaameraim pala sre srug ibig køn, truba nørreelø, pib arroba lutau kuatsiguelø. Inchen møgueløbe tru treeg trømbøig srug kørrøben, Tiuswan tsalø wamabelø køn. Kaguende tru treeg kaig nebub arrubiibe ¡katø! purø trømbøig købig køn.