Read Namrrik Apocalipsis 17 Bible Online

Apocalipsis 17 - Namrrik bible

Apocalipsis 17

¹Inchen tru siete ángelesmera tru copas siete srua pønrrabelai utuig kan ángel arruabe, nan trenchibig køn: —Amø cha. Tru nørrø pi palamerawan wabig tru nui asrwan møguelan anwei yanøb ishuwan nun chu pasrønrrai pasramigwan eshkarrumøn cha.

²Pirau reymerabe tru ishuuba purø trømbøig maren, katø pirau warab misaamerabe mutsiirain køn cha, nø tru treeg trømbøig mariibe vino lataig køben trunun mucha.—

³Inchen Espíritu nø nan tøga pasramisren, tru ángelbe mu misag warab waraimøsrømay nan srua iben, trusrømbe kan ishug kan animal piguiig trømbøgøligu itøgwana wai ashibig kur. Tru animalbe Tiuswan purø trømbøig wamabig munchimera pøriitø netsaig, truibe turmera siete, kigulmera diez tøgaig købig køn.

⁴Tru ishuube piguiiba, yalø piguiiba keweig købig køn, orotøgagøben, tab sruuzheeløtøgagøben, perlastøgagøben tabzhig tamaraig. Tasigube kan oro copa mutaig købig køn, tru møgueløba trømbøig marøptø køsøngømdiig mariiba, ashikken kønrrabgaig mariibatø netsiigwan.

⁵Katø nui kappaløyube kan munchi øyeebe mandø termab muguen nebua isumgaig pørig tøgaig købig køn:Babilonia purø nuig, møgueløba kaig marøptø warab ishumburweimba,pirau trømbøig køsøngønrraptiig mariilaimba usrin køn.

⁶Tru ishuwane mutsiguig wai ashibig kur, Tiuswei misaamera kweetsiilai aniwanba, katø Jesúsweimburab waminchibelan kweetsiilai aniwanba mucha. Inchen nabe ashippe, truba kørrø kwaarig kørrømisrinaben,

⁷tru ángelbe nan trenchibig køn: —¿Chindimbarre kwargu? cha. Nabe ñune tru ishuweimburappa, tru animal trømbøgølig ishuwan niga pasrabig turmera siete, kigulmera diez tøgaigweimburappa, øyeebe mandø chibig kermab mu nebua isumgaigwan chi chibig kui eshkarrumøn cha.

⁸Tru animal trømbøgølig ñi asiibe merrabsrømbe øsig købig yandø treeg kømøn cha. Inchendø tru purø trømbø umbu trabyugurri nebattrun cha, tru managatig møra pasramnuumay inrrab. Inchen chiwangurrimbunø marøb urassrøwei yu pirau warab misaamera nømui munchimeran tru managatig øsig purrønrrabelai pørig libroyu pørig chigarbe, tru animal trømbøgøligwan ke kwaara ashchun cha, srøtøbe øsig kua, møi yambe pinig mu kaagua, katøyug attrabig kui ashippe.

⁹’Iigwan tab maig køtashchab ashchappe, yube purø may isubig kømig palønrrun: Tru siete turmerabe tru siete tunmera køn, tru ishug pøtø waig. Katø tru turmeratøwei siete reymerangucha eshkabig køn.

¹⁰Tru siete reymerai utu trattrøgatøbe chab kørrabguen inchen, kan møikkøsrøn truiløyuibe møin kwaløm ashib karub pasrøben, kane katøgucha arrumø, srø køn cha. Inchendø yandø truig arruabe, nune maya yanatø kørrømisramig nebunrrun.

¹¹Tru animal trømbøgølig, merrabsrømbe øsig pasrabig købig, møi yambe øsig pasrømíibe, tru ocho kønrrabyu rey køn, tru sieteelai utugurri webarrub reytøwei, truibe tru managatig møra pasramnuumay inrrabig.

¹²’Tru diez kigulmera ñi asiibe ashib karub purramigwan utømø srø pønrrab reymera køn cha. Inchendø tru animal trømbøgøliiba kegøtø, truiløbe reymera lataitøwei mugucha manchinrraingaig karumigwan kan uratø tøgagømig utønrrun cha.

¹³I tru reymera diezeløbe ke kandø isua pønrramisra, nømui maramburab maramig tøgagúigwanba, mugucha manchinrraingaig karumig tøgagúigwanba tru animal trømbøgøligwan tranrrun cha.

¹⁴Inchen nømbe Ubisha-unøba kwayaben, Ubisha-unøbe nømune kananrrun. Kaguende nøbe Maya Misagwan Karub Ashib Pønrrabelaim Pala Nø Karub Ashib Pasrabig, katø Maya Reymerai Nø Rey kua. Inchen nøba pønrrabeløbe Tius wamiilø, lawa wesruilø, nun elachimø melabelø købig køn— cha.

¹⁵Katø ángelbe nane trenchibig køn: —Møgueløba kaig marøptø tsub ishug wamisra wainug, tru pimera ñi asiibe, tru chi misaamera køben, misaamera purø nørrø pønrrabelø køben, misag nørrø pønrrabig køben, peg peg wam waminchibelø køben, truilø køn cha.

¹⁶Inchen diez tru kigulmera ñi asiiba, tru animal trømbøgøliibabe tru ishug nui asrwan møguelan anwei yanøbigwane ashig kømui inchib tsalø asha, nundø mu keesha asiimíig tsunrrai mara, køsaatiig yandiig kørrømarabe, tru ishuwei yauwane ma, naatøga pattrun chibig køn.

¹⁷Kaguende Tiusbe nø maig martrab isuigwan trunun nøm isua martrai nømui manrrømerayu pasrin køn cha. Treeg punrraimbe nømbe kandø isua pønrramisra, tru animal trømbøgøligwan nømui ashib karub purraigwan tranøb inchai, Tius nø mandø wamindig treeg nebumnegatig.

¹⁸Tru ishug ñi asiibe tru purø nu ciuda køn cha, pirau reymeran nø merrarrawa karumburab karub tøga pasrabig.—