Read Namrrik Apocalipsis 19 Bible Online

Apocalipsis 19 - Namrrik bible

Apocalipsis 19

¹Øyeelø chab puraiben, srømbalasrømbe kan wam purø nu søteelai lataig øyah chib kui mørøbig kur:“¡Kan øyeebe maya nuguen tab køn! chib. ¡Kaigyugurri wesraiba, tørguegwalmabiiba, maramburab maramibabe namui Tiuswein køn! chib.

²Kaguende maig maramigwan nø asha mariibe, ciertonig, sølgandø tabig mariilø køn chib.Kaguen nøbe tru møgueløba purø trømbøig marøb ishug tru nui trømbøig mariiløtøga pirau mindishibigwanmøra pasrønrrai pasrin køn chib. Katø Tiuswei karuindiig melabelannø ani lusingaruigwan nungucha ulø payib treetøwei maran” chib.

³Incha katøyug trenchibelø køn:“¡Kan øyeebe maya nuguen tab køn! chib.Tru ishuwei parrig naguishbe managatig nebib pasrabig pasrønrrun” chib.

⁴Inchen tru veinticuatro kølli misaameraba, tru pibgatø øsig purrabeløbabe pirausrøngatig tømbønsrøb srala, tru wamisra karub wainug wabig, Tiuswan køriibala tabig waminchib trenchibelø køn:“¡Treeg kønrrun! chib. ¡Kan øyeebe maya nuguen tab køn!” chib.

⁵Inchen tru wamisra karub wainukkurrimbe kan wam mørø trenchibig køn:—¡Ñim Tiusweiwan marøb melabelø mayeeløba,katø Tiuswan køriibala pønrrabeløba, tru nørreelø kusrebelø køben, katø treeg kømeelø køben,namui Tiuswane purø tabig waminday!— chib. Ubisha-unø kasharam kwaløm

⁶Inchen kan truba nu søteelai wammera lataig, kabe kan truba nu pi wanrrøb lataig, kabe kan palaig trashibelø lataig trendaig mørøbig kur:—¡Kan øyeebe maya nuguen tab køn! chib. Kaguende namui Tius Newan Maramburab Marøbiibe nø ashib karub pasran chib.

⁷Kasraarab, katø truba tab kui mørøb, katø nune maya nuguen tabig waminchigun chib.Kaguende møimbe Ubisha-unø kasharab kasraaramig pun cha. Nui srain kønrrabiibe tamara pasran cha.

⁸Incha srain kønrrabigwane lino llensu, chishig tørbilabigwan kenrrai tranig køn— chib. (Pøs tru lino purø tab llensuzhiibe tru Tiuswei misaamera nøm sølgandø tabig mariilan eshkabig køn.)

⁹Inchen ángelbe nan trenchibig køn: —Iigwan pør cha: “Tru Ubisha-unai kasharab yaumay manrrab linchab amrrunrrai eshkailøbe mayanguen tab kuilø køn”— cha. Inchabe nane treekkucha chibig køn: —Iiløbe Tius nø newan cierton wamindiilø køn— chib.

¹⁰Inchen nabe ángelwei merrab tømbønsra køriibala tabig waminchab inchene, ángelbe nane trenchiptinchibig køn: —¡Au, øyeeg marmøta! cha. Ñiba, ñui nuneløba tru ciertonigwan Jesús kenamarigwan treetøwei elachimø, pønrrabelø lataitøwei, nagucha Tiuswei marøb megabiitøwein kur cha. ¡Tiuswane køriibala tabig waminchi! cha. Kaguende tru ciertonigwan Jesús kenamariibe Tius maig karuigwan eshkabelan Tius maig tamigwan isungarub pasrabig, truitøwein køn— cha. Pulø kaulli itøgwanaig

¹¹Inchen srømbalabe kurig pasrai ashiptindinaben, truyube kan kaulli puliig kenamisrøbig køn. Inchen truyu tru itøgwana wabigwane trencha wamig købig køn: “Nø maig køppe, Managucha Treetø Tabig, katø Newan Ciertonig” cha, treeg wamig, kaguende nøbe sølgandø tabig mariitøga maig maramigwan asha marøb, katø kwayab inchibig køn.

¹²Nui kabmerabe kan nagurø pilab lataig pilabelø køben, nui turyube coronamera truba yam petsaig, kan munchi pørig tøgaig købig køn, trunune chi chibig kuigwane nøtøwei asha købig køn.

¹³Nui kewagúibe anindøga pisig keweig købig køn. Inchen nui munchibe “Tiuswei Wam” cha wamig købig køn.

¹⁴Inchen tru nørrø søtø srømbalasreelø mayamba pasrabiibe lino llensuzheelø puløzhig chishcheelø kewar, pulø kaulli itøgwanar nui wendautø amrrubelø køn.

¹⁵Inchen nui trigugurrimbe kan trøsr espada webarrubig køn, trutøga misaamera nørrø pønrrabelan kørrinchab. “Incha nøbe ashib karuppe, kan tsandzøn pørøtsiitøga karub lataig ashib karunrrun.” Incha katø nøbe tru uvaswan pi wesrunrrab kwarainug kebusra, Tius Newan Maramburab Marøbigwei purø trømbøig namig købiitøga tru uvas piwan wesrunrrab pusøbunønrrun.

¹⁶Incha nui kewagúiguba, srøptsimburappa øyeeg munchi pørig tøgaig købig køn:Maya Reymeraim Pala Nø Rey;Maya Misagwan Ashib Karub Pønrrabelaim Pala Nø Karub Ashib Pasrabig, chibig. Tru animal trømbøgøligwan chinchamamub

¹⁷Inchen kan ángel nøsigu pasramisrabe, maya illimera srømbalawan llirab amøñibelan mur wamab trendai ashibig kur: “Amrrua, tulundzunay cha, mamig purø nørrø, Tius tamarigwan manrrab.

¹⁸Reymerai yauwan køben, maya suldaumeran ashib pønrrabelai yauwan køben, chiwangucha kørmø kwayam møguelai yauwan køben, kaullimerai yauwan køben, tru itøgwanabelai yauwan køben, mayeelai yauwan, tru karuindiig melabelai yauwan køben, karuindiig melømeelai yauwan køben, kusreb møguelai yauwan køben, katø treeg kømeelaiwan købengue.”

¹⁹Inchen tru animal trømbøgøligwanba, pirau reymeranba, nømui suldau søtømeranba tulundzunin kui ashibig kur, truiløbe tru pulø kaulli itøgwanaiba, truigwei suldaumeraba kwayanrrab.

²⁰Inchen tru animal trømbøgøligwane merrarraig købig køn, tru isatø ‘Tius maig karuigwan eshkabig kur’ chibigwanbañau. Truibe tru trømbøgøligwei merrab tru maramburab mariilan asha kønrrai marøbig købig køn. Tru treeg mariitøga peløsrka chab kegørrøsrkaig købig køn, tru trømbøgøligwei marcatøga marcarramabelanba, katø tru trømbøgøligwan treezhigwei asha marigwan køriibala tabig waminchibelanba. Inchen tru animal trømbøgøligwanba, tru Tiusweinukkurri arrubig lataig marendø, peemaytø marøbgøligwanba tru nag pisu lataig azufreba, naarabigu øsiiba kebusriilø købig køn.

²¹Inchen tru katøganelø kørrømisrøbelane tru kaulli palaigwei trigugurri espada webarrubig chab kweechen, maya illimerabe truilai yaumeran ke kaasha mabelø køn.