Read Namrrik Apocalipsis 21 Bible Online

Apocalipsis 21 - Namrrik bible

Apocalipsis 21

¹Incha katø kan srømbala srøiba, srø pirøba ashibig kur. Kaguende yandø srømbalaba, pirøba srøteelø købeløbe yandø chab pinøben, yandø mar chigucha pinin købig køn.

²Inchen nabe tru ciuda Tiusweindø tarømarig, tru Jerusalén srøigwane srømbalasrøngurri kørraarri ashibig kur, Tiuswei merrabgurri. Tru ciudabe kan srai misrtrabig tabzhig keweig tamara pasrab lataig pasrabig køn nui keg kønrrabigweyasig.

³Inchen tru wamisra karub wainukkurrimbe kan wam truba mur waminchib øyah taig mørøbig kur:“¡Au! møimbe Tius nø pasraig yabe yandø misaameraba pasran cha. Tiusbe nømba pasrønrrab pasrøben,nømgurrimbe nui misaamera kønrrun cha. Inchen Tiustøwei nøashib truyu nømba pasrøwa,nømui Tius kønrrun chib.

⁴Incha nøbe nømui kappimeran kerrigu pinømørtrun cha.Inchen yandø kwamig kawei, kisamig kawei,wamab trasamig kawei, pusrkwabig kawein kønrrun chib. Kaguende merrab chi købiibe chab purayan” cha.

⁵Inchen tru wamisra karub wainug wabiibe trenchibig køn: “Nabe chiwangurrimbunø srøitø maramønrrun” cha. Inchabe katø nane trenchibig køn: —Pør cha. Kaguende i wambe maig taibe treeg køb, katø ciertonig køb køn— cha.

⁶Inchabe katø nan trenchibig køn: —Yandø chab marig kørrømisran cha. Nabe Aba, Zetaba latawei, Srøsriiba, Srabeiba kur cha. Møikkøben pimulgwaigwane øsig kønrrai tranøb pi, tru kølømø pigabyu piwan, ka yandø ketig mutchai tranamønrrun cha.

⁷Møikkøben chine nebuingucha truyu pureb ibiibe iilan keta tranamig tøgagúigwan ketig utønrrun chibig køn. Inchen nabe nui Tius køben, nøgurrimbe nai nusrkain kønrrun cha.

⁸Inchen chigøben kaig puben kørab llirawa ambubeløba, chiweingucha køremeeløba, ashikken kønrrabgaig trømbøig marøbeløba, kweechipteeløba, møguelø ishumburba trømbøig marøbeløba, kwaimandzigweimburabelan marøb, trømbø marøb piimabeløba, chiwangøben kan tius kui lataig inchibeløba, mayeelø isapteeløba, mayamba iiløbe nømuimburappe tru nag pisu lataig azufreba naarabigumay ambamig kønrrun cha. Truibe tru srøsrø kwaig kømnetø tru katøyug kwamig truig køn— cha. Tru srø Jerusalén

⁹Inchen kan ángel tru sieteelai utuig tru srabeig chine kaig nebunrrai marøb amrrunrrabelan tru siete copas netsiig mutarwei utuig arruabe, nan trenchibig køn: —Yusrø amø cha. Ubisha-unai srai misrtrabig, tru srawan eshkarrumøn— cha.

¹⁰Inchen Espíritu nø nan tøga pasramisren ángelbe kan truba nu tun trurrigu pala tunsrømay pera ya, nane Jerusalén, tru ciuda Tiusweindø tarømarigwan kenamarøbig køn, srømbalasrøngurri, Tiusweinukkurri kørraarrubigwan.

¹¹Tru ciudabe Tiuswei tørguegwalmabigwan tøgaig tørbilabig kørraarrubig køn, kan purø tab sruuzhig, kan jaspe srug tørbilabzhig lataig, kabe kan pigriu tørguelarrøzhig lataikke.

¹²Tru ciuda pøtøgatanbe srug pusrig lendiig trurrigu palaig kusraig købig køn, yaskabmera doce tøgaig. Tru yaskabmørig kan ángel pønrrøben, tru yaskabmerayube munchimera pøriilø pønrrabig køn, Israelweinukkurri karrab misaamerai tru doceelai munchimeran.

¹³Ciudayu tru yaskabmerabe pørr kal-labgatømay pøn, kandarøgatømay pøn, katøgandarøgatømaysrø pøn, pørr pinebgatømay pøn købig køn.

¹⁴Inchen tru ciudayu pøtøgatan tru srug pusrig palaig kusruigwan niga pasrønrrabig pølsrugu pøtøburab doce warig tøgaig købig køn. Inchen trumørig tru Ubisha-unai tru doce nøashib karua øriilai munchimeran pøriilø købig køn.

¹⁵Incha tru naba waminchibiibe ciudawan køben, truyu yaskabmeran køben, tru sruutøga pusrig palaig marigwan køben unaasamig kan oro caña tsig sruaig købig køn.

¹⁶Tru ciudabe mumaytøgucha atsi kømíig latazhig købig køn, lendømay lata, yammay lata. Angelbe tru ciudawan cañatøga unaashene, 2.200 kilómetros købig køn. Yammay lata, lendømay lata, mumaytøgucha latazhig købig køn.

¹⁷Incha tru pøtøburab palaig marigwan palamay mayan køtashchab unaashene, 75 metrosig købig køn, tru ángel misag unaasimay unaashen.

¹⁸Tru pøtøburab palaig kusrub mariibe jaspe sruutøga marig køben, ciudabe orotøgatø marig kan pigriu tørguelarrøzhig lataig købig køn.

¹⁹Inchen tru ciudayu palaig marigwan niga pasrønrrabig katsigwan pusriiløbe chi sruutøgagøben tabzheeløtøga purø tabzhig kønrrai marig købig køn: Srøsriibe jaspetøga marig køben, tru wendauibe zafirotøga marig køben, pøn kønrrabyuibe ágatatøga marig køben, pib kønrrabyuibe esmeraldatøga marig køben,

²⁰trattrøgatø kønrrabyuibe ónicetøga marig købig køn. Inchen seis kønrrabyuibe cornalinatøga marig køben, siete kønrrabyuibe crisólitotøga marig køben, ocho kønrrabyuibe berilotøga marig køben, nueve kønrrabyuibe topasiotøga marig køben, diez kønrrabyuibe crisoprasatøga marig køben, once kønrrabyuibe jacinto taig sruutøga marig køben, srabeig doce kønrrabyuibe amatistatøga. Øyeeg sruumeratøga marig købig køn.

²¹Tru doce yaskabmerabe doce perlas købig køn, yaskabmørig kan perlatøgatø marig kandiig kemesraimøzhikke. Inchen tru ciudayu mas lendiig llirainuube orotøgatø marig købig køn, ¡katø! kan pigriu tørguelarrøzhig lataikke.

²²Tru ciudayube Tiuswei yawane ashmur; kaguende Señor Tius Newan Maramburab Marøbiiba, Ubisha-unøba, nømashib tru ya købig køn.

²³Tru ciudabe tør kønrrai pørr pilamig palain kømøwei, pøl pilamig palain kømøwein køn; kaguende Tiuswei tørguegwalmabiibe tru ciudawan kebiløben, tru ciudayu pilab pasrabiibe Ubisha-unø køn.

²⁴Inchen misaamera purø nørrø pønrrabelø tru kaigyugurri wesrailøbe tru ciudawei tøryu amøñiben, pirau reymerabe nømui chigurrimbunø purø tabzheelø tøgagúilane srua amba, tranrrun.

²⁵Kwalømbe chu uraskucha yaskabmerabe kurindø pønrrønrrun. Kaguende truyube yem misrøbiibe kaanrrun.

²⁶Misag nørrø pønrrabelø nømui chigurrimbunø purø tabzheelø tøgagúigwanba, maya nuguen tab indigwanba ciudayumay srua amrrunrrun.

²⁷Truyube chishig kømíig kaiba, katø ashikken kønrrabgaig marøbeløba, katø isapteeløbabe managuen kebamrraamøn. Truyu kebambuppe, tru Ubisha-unai libroyu managatig øsig purrønrrabelai munchimeran pørig tøgartøwei kebamrrun.