Read Namrrik Apocalipsis 4 Bible Online

Apocalipsis 4 - Namrrik bible

Apocalipsis 4

¹Øyeelø chab puraiben, na ashene, kan yaskab srømbalasrø kurig pasraptinchibig køn. Inchen kan wam trompeta wanrrøb lataig srøtø tru na møriibe nan øyah waminchib trenchibig køn: —Yusrø nebamø cha; iilai wendau purainrrabigwan na ñun kenamartrumøn— cha.

²Inchen tru urastø Espíritu nø nan tøga pasramisren, srømbalasrømbe tru karub wamisra wamig kan pasrig pasrai nabe ashibig kur. Inchen truyube kan mugøsrøn wabig køn.

³Inchen truyu wabiibe kan jaspe sruuba, cornalina sruuba lataig købig køn. Inchen tru nø waim pøtøgatanbe kan køshømbøtø kan esmeralda srug latazhig pasrabig køn.

⁴Tru wamisra karub waim pøtøgatanbe wamisra karub purrailø katøgan veinticuatro pønrrai ashibig kur. Truiløyube kølli misaamera veinticuatro purrabelø køn, puløzheelø kewar, nømui turyube corona orotøga mariilø petsargue.

⁵Inchen tru nø wamisra karub wainug truyugurrimbe sre pilabelø køben, wammera køben, palaig trashibelø køben webambubig køn. Katø tru karub waig merrappe lámparamera nag pilabelø siete pilab pønrrabig køn, truiløbe tru Tiuswei siete espíritumera køn.

⁶Inchen tru karub waig merrappe kan mar wabig køn, pigriu tørguelarrøzhig lataig. Tru karub wainug pøtøgatanbe merrabmayba, wendaumayba, pinrrø mendamayba pibgatø øsiguelø pønrrabelø køn, truiløbe merrabmayba, wendaumayba kabmeratø netseelø.

⁷Inchen tru øsiguig srøsriibe kan león lataig køben, tru wendauibe kan toro lataig køben, katø tru wendauibe kan møwei malø lataig køben, tru pib kønrrabyuibe kan wasrø pala uñib lataig købig køn.

⁸Inchen tru pibgatø øsigueløbe møitøgucha kwaldzariimera seisbatø tøgar, truiløbe wambiimay, umbumay kabmeratø netseelø, yem kwaløm øyah tamigwane pinømø, trenchibelø køn:“Newan tabig, newan tabig, newan tabig Señor Tius Newan Maramburab Marøbig;tru købig, møi ya wabig, tru attrabig” chib.

⁹Tru managatig øsig wanrrabig, tru karub wainug wabigwan, tru pibgatø øsiguelø maya nuguen tab kønrrun chib, tabig kui asha tab inchib, ungwa, ungwa chibelø køn.

¹⁰Incha trendaimørig tru kølli misaamera veinticuatroeløbe nui merrab tømbønsrøb sraløptø sraløbelø køn køriibala tabig waminchab tru managatig øsig wabigwan. Incha nømui coronameran tru nø karub wainug merrab trenchib petabelø køn:

¹¹“Señor namui Tius, ñibe maya nuguen tabigwanba, tabig kui asha tab indigwanba, maramburab maramigwanbautambuawei utønrrabiibe ñi køn chib,kaguende chiwandøgucha kerrigu ñi marig kuimba, Ñi treeg kønrrai isuikkurri treeg mariilø,treeg pønrran” chib.