Read Namrrik Apocalipsis 5 Bible Online

Apocalipsis 5 - Namrrik bible

Apocalipsis 5

¹Incha tru wamisra karub wainug wabigwei kusrmay taskube kan libro palamay umbumay pørigwan nabe srua wai ashibig kur, truibe siete sellostøga melsra kasraig.

²Inchen kan ángel maramburab maramig tøgaig truba mur trenchib payibig køn: —Sellomeran kølsrøb, kilgawan kurøb, ¿treegwan martraptiig tabiibe mu kerah?— cha.

³Inchendø ni srømbalasrø lata, pirau lata, pirø umbu lata tru libron kurtraptiibe mu kawei, katø tru umbu pørigwan maig køtashchab trawashchaptiibe mu kawein købig køn.

⁴Inchen nabe truba kishibig kur, kaguende tru libron kurtraptiibe mu kawei, katø tru umbumay pørigwan maig køtashchab trawashchaptiibe mu kawein køben.

⁵Inchen møikkøsrøn tru utuig kan kølli misaabe nane trenchibig køn: —¡Kishmøta! cha. ¡Ash! cha. Tru León Judáwei misag søtøyugurriig, tru Davidwei misagugurri arrubiibe nun tru ashig kømui inchibelan nømun kerriguwan chi inchaingaig kanawa kørrømarøb pureb yaig køn cha, sellomeran kølsrøb, kilgawan kurøb inchabig.—

⁶Inchen tru karub wainuube kan ubisha-unø kweetsig købig lataig asønabendø, katøle kurra pasrai ashibig kur, tru pibgatø øsiguelaimba, kølli misaameraimba tøbøtaabe. Tru Ubisha-unøbe siete kigulmeraba, siete kabmeraba tøgaig købig køn. Inchen tru kabmerabe tru Tiuswei siete espíritumera købig køn, tru pirau ørøba truørø øriilø.

⁷Inchen nøbe arrua, tru karub wainug wabigwei kusrmay taskugurri libron utabig køn.

⁸Inchen nø libron utøbene, tru pibgatø øsigueløba, tru veinticuatro kølli misaamerababe tru Ubisha-unai merrab tømbønsrøb sraløptinchibelø køn. Møitøgucha arpa sruartø, katø oro copamera may irrabzhiitø netsig sruar købig køn. Tru may irrabzhiibe Tiuswei misaamera Tiusba wamindiilø truig købig køn.

⁹Katø kan cantaig srøig øyeeg cantabelø køn trenchib:“Libron uta, sellomeran kølsrøb inchabiibe ñitøwein køn chib.Kaguende ñibe kweetsig kua, ñui anindøga namune Tiusweyasig ñi penig køn chib,chi misaamerandøgucha,chi wam waminchibelandøgucha,chi misag søtømerandøgucha,misaamera nørrø pønrrabelø chu pirausreelandøgucha.

¹⁰Incha ñibe nømune namui Tiusweyasig reymera latawei karub purrabelø kønrraimba, sacerdotesmera kønrraimba mara purrønnen,nømbe pirau karumburab karunrrun” chib.

¹¹Incha katø na ashene, tru karub waim pøtøgatanbe ángelesmera truba nørrø pasrabigwei wamwanba, tru øsiguelai wamwanba, tru kølli misaamerai wamwanba mørøbig kur. Truiløbe purø nørrø køptø, millones y millones købig køn.

¹²Incha truba truba mur trenchibelø køn:“Tru Ubisha-unø kweetsig købiibe tru maramburab maramigwan køben, chiwandøgucha palømø, tøgagúigwan køben, muguen nebua kusremgaigwan køben, maramburab maramigwan køben, tabig kui asha tab indigwan køben, tørguegwalmabigwan køben, purø tabig wamindigwan køben,utambuawei utønrrabiibe ñitøwein køn” cha.

¹³Incha katø tru srømbalasrø lata, pirau lata, pirø umbu lata, maryu lata tru chigurrimbunø Tius marig øsiguig pønrrabeløbe øyah taig mørøbig kur:“Tru wamisra karub wainug wabigwanba,katø tru Ubisha-unanbabe, tru purø tabig wamindiiba, tabig kui asha tab indiiba, tørbilabiiba, maramburab maramibabe,managatig patsømíig nuin kønrrain” chib.

¹⁴Inchen tru pibgatø øsigueløbe trenchibelø køn: “¡Treeg kønrrun!” chib. Inchen tru kølli misaamerabe tømbønsrøb srala, køriibala Tiuswan tabig waminchibelø køn.