Read Napu Matiu 1 Bible Online

Matiu 1 - Napu bible

Matiu 1

¹Yesu Kerisitu iami pemuleana Datu Daudi, pemuleana Burahima. Mepongka hangko i Burahima hawe i Daudi, hanganda au mampemuleaka Yesu, idemohe:

²Burahima mopaara Isaki; Isaki mopaara Yako; Yako mopaara Yehuda hai halaluna;

³Yehuda mopaara Peres hai Sera hangko i Tamar; Peres mopaara Hesron; Hesron mopaara Ram;

⁴Ram mopaara Aminadab; Aminadab mopaara Nahason; Nahason mopaara Salmon;

⁵Salmon mopaara Boas hangko i Rahab; Boas mopaara Obed hangko i Ruti; Obed mopaara Isai;

⁶hai Isai mopaara Datu Daudi. Mepongka hangko i Datu Daudi hawe i karatawaninda to Yahudi i wanua Babeli, idemi hanganda ulu bubuna Yesu: Daudi mopaara Salomo hangko i bembana Uria;

⁷Salomo mopaara Rehabeam; Rehabeam mopaara Abia; Abia mopaara Asa;

⁸Asa mopaara Yosapat; Yosapat mopaara Yoram; Yoram mopaara Usia;

⁹Usia mopaara Yotam; Yotam mopaara Ahas; Ahas mopaara Hiskia;

¹⁰Hiskia mopaara Manase; Manase mopaara Amon; Amon mopaara Yosia;

¹¹Yosia mopaara Yekonya hai halalunahe. I tempo iti to Yahudi ratawanihe i Babeli.

¹²Mepongka hangko i karatawaninda to Yahudi i Babeli hawe i karapoanakana Yesu, idemohe hanganda ulu bubuna Yesu: Yekonya mopaara Sealtiel; Sealtiel mopaara Serubabel;

¹³Serubabel mopaara Abihud; Abihud mopaara Elyakim; Elyakim mopaara Asor;

¹⁴Asor mopaara Sadok; Sadok mopaara Akim; Akim mopaara Eliud;

¹⁵Eliud mopaara Eleasar; Eleasar mopaara Matan; Matan mopaara Yako;

¹⁶Yako mopaara Yusupu tobalilona Maria. Maria itimi au mampoanaka Yesu au rahanga Kerisitu.

¹⁷Mewali, mepongka hangko i Burahima hawe i Daudi, ara hampulo hai iba lapina toioruna Yesu. Mepongka hangko i Daudi hawe i karatawaninda to Yahudi i Babeli, hampulo wori hai iba lapina. Hai mepongka hangko i karatawaninda to Yahudi lao i Babeli hawe i karapoanakana Kerisitu, hampulo wori hai iba lapina.

¹⁸Idemi tuntukana karapoanakana Yesu Kerisitu. Maria, inana, momanu hai Yusupu, agaiana hangko damanihe mohamboko, mantimimi. Kamantimina iti, hangko i kuasana Inao Malelaha.

¹⁹Yusupu, hampomanuna, tauna au manoto poantina. Ido hai nauli laluna, “Kubotuki ngkandii pomanungku hai ia,” lawi bara naunde mopakaea Maria.

²⁰Tangana Yusupu mampepekiri iti, mangipimi. I lalu pangipina, moita hadua malaekana Pue, au mololita, nauli, “Yusupu, pemuleana Datu Daudi! Ineeko langa mampotambia Maria, lawi Anangkoi au nakantimia iti mewali anti kuasana Inao Malelaha.

²¹Maria ina moana hadua tobalilo. Anangkoi iti, hangangaa nuhanga ‘Yesu’,[1] lawi Ia au ina mohorema taunaNa hangko i dosanda.”

²²Ope-ope iti mewali bona tepabukei Ngkorana Pue au naukimi nabiNa hangkoia:

²³“Hadua anantowawine ina mantimi, hai moana hadua tobalilo. Anangkoi iti ina rahanga Imanuel.” Lempona, “Pue Ala mamporangaike.”

²⁴Mearomi Yusupu, napeulai mpuumi apa au nauliangaa malaekana Pue Ala iti. Naposambokomi Maria,

²⁵agaiana bara manihe hampapaturua duuna Maria moana. I pesupaana Anangkoi iti, Yusupu mohanga anangkoi iti Yesu.