Read Napu Matiu 11 Bible Online

Matiu 11 - Napu bible

Matiu 11

¹Karoona Yesu mopaturo topeguruNa au hampulo hai rodua, Ia laomi mepaturo hai mobambari Ngkora Marasa i boea-boea au hungku.

²I tempo iti, Yohane Toperiu tangana ratarunggu. Kanahadina Yohane apa au napobago Kerisitu, ia motudu bahangkia topeguruna lao i Yesu mekune Iria, node,

³“Ba Oio mpuumi Datu Topehompo au nadandi Pue Ala? Ba ara mani au ntanina kipegia?” Lao mpuumohe topeguruna Yohane mopahawe pampekunena iti i Yesu.

⁴Kanahadina Yesu pekunenda, Nauliangaahe node, “Mesulemokau, hai nipetumbuia Yohane apa au nihadi hai au niita:

⁵au bilo meitami, au palu molumaomi, au ketangga maohami, au bongo mehadimi, tauna au mate Kupatuwo hule, hai Ngkora Marasa Kupahawemi i tauna au meahi-ahi tuwonda.[12]

⁶Morasihe tauna au bara bata-bata lalunda Iriko.”

⁷I pesulenda tuduana Yohane Toperiu, mololitami Yesu i tauna bosa kana i Yohane, Nauli, “Apa tunggaiami lao i Yohane i pada wungi hangkoia? Ba mampeinao peakau moita tala au nawui himburu node hou node mai? Bara![13]

⁸Mewali, apari au nipeinao lao nipeita? Ba mampeinaokau mampeita tauna au makara hampina? Bara wori, lawi tauna au makara hampinda maida peahe i souna datu.

⁹Mewali, apari au nipeinao lao nipeita? Ba mampeinaokau mampeita nabi? Ane nodo, tou. Agaiana Kuuliangaakau meliu kamahilena tuwona Yohane hangko i nabi au ntanina.

¹⁰Lawi Yohane iti au natunggai i lalu Sura Malelaha hangkoia. Nauli Pue Ala i AnaNa: ‘Idemi suroNgku, au ina Kutudu moioru hangko Irio, bona mopasilolonga raraMu.’ ”

¹¹Nauli mbuli Yesu, “Bona niisa, hangko i ope-ope tauna au rapoanaka i dunia ide, bara ara hadua au meliu kamahilena tuwona hangko i Yohane Toperiu. Agaiana mepongka ide-ide, morasi mpuuhe tauna au mengkoru i Pue Ala. Mogalori hadua tauna au tepakoi tuwona i lalu poparentana Pue Ala, mahile tuwona pane Yohane.

¹²Hangko i pobagona peami Yohane Toperiu hawe i tempo ide, tauna au kadake mopari-parihe moewa taunana Pue Ala, rapeinaohe rakuasai.

¹³Mepongka hangkoia hawe i kamaina Yohane, ope-ope paturonda nabi hai aturana Musa mampololita hahahe apa au hangangaa ina mewali i tempo ide.

¹⁴Mewali, ane maukau mampoinalai, Yohanemi au natunggai hadua nabi hangkoia au mopahawe kaina hawena hule nabi Elia.

¹⁵Hema au motalinga, nipehadingi maroa!

¹⁶Ikamu au tuwo ide-ide peisa rapandiri nodo anangkoi au mohuda-huda i pobalu-balua au mombekakiohe,

¹⁷rauli, ‘Kipotulaliakau, agaiana barakau motaro-taro. Kipandawiakau, agaiana barakau moteria.’

¹⁸Lempona: Yohane Toperiu bara niunde. Iko wori, baraNa niunde. Kamaina Yohane, ia mopuasa hai bara moenu anggoro. Nisapuaka liliu, niuli node, ‘Ia napesuangi seta!’

¹⁹KamaiNgku Ana Manusia, maenuNa anggoro hai maandeNa. Agaiana nisapuaka woriNa, niuli, ‘Peita! Topehioro, tomalangu, ranganda toperuru asele hai tomadosa!’ Agaiana nauri nodo, kamanotona rarana Pue Ala tongawa i lalu katuwonda tauna au mampeulai peundeaNa.”

²⁰Hangko inditi, Yesu mokambaroa to Yahudi au maidahe i bahangkia wanua i tampo Galilea, lawi nauri paka Nababehiahe tanda kuasa i boeanda, bara mpuuhe menoso hangko i babehianda au kadake.

²¹Nauli Yesu, “Hurewukau to Korasim hai to Betsaida! Ngkaiami tanda kuasa au Kubabehi i boeami, agaiana bara mpuukau menoso hangko i dosami. Ane rapana tanda kuasa iti Kubabehi i lalu wanua Tirus hai Sidon, kemahaemohe menoso hangko i dosanda, nauri barahe to Yahudi. Kemangalamohe waru ngkasusa rapohampi, hai watanda raawui, tanda katebalikinami lalunda.

²²Mewali bona niisa, i alo pebotusi i kahopoa dunia, ina rumihi mpuu pehukuna Pue Ala irikamu pane pehukuNa i to Tirus hai to Sidon.

²³Hai ikamu wori to Kapernaum! Ba nipehangu ina naangkakau Pue Ala hawe i suruga? Bara! Ina Natendekau i lalu naraka! Ane rapana tanda kuasa au Kubabehimi i boeami, Kubabehi wori i wanua Sodomo hangkoia, wanua iti kebara napakarugi Pue Ala, ara mani duuna ide-ide.

²⁴Mewali bona niisa, i alo pebotusi i kahopoa dunia, rumihi mpuu pehukuna Pue Ala irikamu pane pehukuNa i to Sodomo au kadake babehianda hangkoia.”

²⁵I tempo iti, mekakaemi Yesu, nauli, “O Uma, Ampu langi hai tampo! KutoiaKo, lawi ope-ope au tewuniangi hangkoia, Nupopaisaamohe tauna au i woi tuwonda, agaiana Nuwuniangiahe tauna au mapangka posikolanda hai tauna au mapande,

²⁶lawi nodomi peundeaMu, Uma.”

²⁷Roo indo, nauli mbuli Yesu, “Hinangkana NaweimoNa UmaNgku. Bara ara hadua au moisaNa, Iko Anana Pue Ala, batena pea UmaNgku au moisaNa. Nodo wori, bara ara au moisa UmaNgku, batena pea Iko AnaNa hai hema pea au Kupopaisaa.

²⁸Maimokau ope-ope au mawowe hai au mantimi haleami. Ina Kuweihaakau haleami.

²⁹Nihaleami haleaNgku, hai megurukau Iriko bona molambikau katinda lalu. Lawi maalusuNa hai mengkaiwoiNa.

³⁰HawaNgku bara mapari, hai mangaa haleaNgku au Kuweikau nihalea.”