Read Napu Matiu 12 Bible Online

Matiu 12 - Napu bible

Matiu 12

¹I Alo Pengkarooangaa, Yesu hai topeguruNa moliuhe i bonde. Tanganda moliu i bonde iti, topeguruNa mokanukihe pare, ranuku hai raande lawi marimihe.

²Arahe toParisi au moita apa au rababehi. ToParisi iti mouliangaa Yesu, “Peita! TopeguruMu moliungihe atura agamanta, mobagohe i Alo Pengkarooangaa!”

³Mehana Yesu, “Bara pae nibasa apa au nababehi Datu Daudi hai ranganahe hangkoia i temponda marimi?

⁴Ia mesua i lalu sou penombaa, hai moandehe roti au rapopenomba i Pue Ala. Moula ada agamanta, tadulako mpenomba pea au peisa maande roti iti. Agaiana nauri nodo, babehiana Daudi iti bara rasalai.

⁵Nipekiri wori apa au teuki i lalu Aturana Musa, tadulako mpenomba i lalu Souna Pue Ala, mobago ntepuuhe i Alo Pengkarooangaa, agaiana barahe rasalai.

⁶Mewali, pelumbunami Iko, lawi meliu kamahilena tuwoNgku pane Souna Pue Ala,

⁷lawi Iko, Ana Manusia, au natudu Pue Ala. Ara kuasaNgku mopakanoto apa au peisa rababehi i Alo Pengkarooangaa. I lalu Sura Malelaha, Pue Ala manguli node: ‘Bara Kuperapi binata au nipopenomba Iriko. Au Kuperapi bona maahikau i hangka rangami.’ Mewali, ane rapana niisa lempona lolita ide, kebarahe nisalai au bara masala.”

⁸

⁹Padumi Yesu hangko inditi, laomi i sou penombaanda to Yahudi.

¹⁰Inditi, ara hadua tauna au mate taiena hambali. Bahangkia tauna mohaoki kanawoana Yesu. Ido hai mekunehe i Yesu, rauli, “Guru, ba peisake mopakaoha tomahai i Alo Pengkarooangaa?”

¹¹Nahanaihe Yesu, “Ane rapana ara dimbamu hambaa, hai dimba iti manawo i lalu kalolu tampo i Alo Pengkarooangaa, ba nupogiangaa pea i lalu kalolu tampo? Ba nuhore, kehapiri i Alo Pengkarooangaa?

¹²Apa mani manusia au melumbu tuwona pane dimba. Mewali ane nodo, hangangaa peisake motulungi tauna i Alo Pengkarooangaa.”

¹³Roo indo, Yesu mouliangaa tauna au mate taiena, “Ona taiemu!” Naona mpuumi taiena, liliu maoha, hai maroho hule nodo taiena au hambali.

¹⁴Ido hai padumohe toParisi hangko i sou penombaa, hai mohaokihe rara mopapate Yesu.

¹⁵Naisa Yesu kaarana tunggaianda toParisi au kadake Iria. Ido hai padumi hangko inditi, hai bosa tauna meula Iria. Ia mopakaoha ope-ope tauna au mahai,

¹⁶hai nakontohe Yesu nauli, “Inee mpuu niuli-uli kahemaNgku.”

¹⁷Tepabukeimi Ngkorana Pue Ala au napahawe nabi Yesaya hangkoia. Nauli Pue Ala node:

¹⁸“Idemi hawiNgku au Kupilei, au Kupokakaia, hai au mopamatana laluNgku. Ina Kuwei InaoNgku Iria. Ia ina mopahawe parentaKu au manoto i ope-ope tauna.

¹⁹Ia bara ina mombehehe, bara ina monganga-nganga, hai bara ina mololita masisimbuku i rara ngkaia.

²⁰Tala au malute bara ina Natepoki, hai hulo au mewao-wao pewangkana bara ina Napapate. Ia ina mobago liliu duuna notona Pue Ala tongawa.[14]

²¹Ope-ope tauna ina meharunga Iria.”

²²Hangko indo, ara hadua tauna au raanti i Yesu. Tauna iti, bilo, bara peisa mololita, hai napesuangi seta. Napakaohami Yesu alana meita hai peisami mololita.

²³Tingkaramohe tauna bosa au moita iti, alana mombekunehe, rauli, “Ba Ia idemi Datu Topehompo pemuleana Datu Daudi au radandi hangkoia?”

²⁴Karahadina toParisi lolitanda, rauli, “KuasaNa iti hangko i Beelsebul, datunda ope-ope seta. Ido hai peisa mampopeloho seta.”

²⁵Agaiana naisari Yesu apa au ara i lalunda. Ido hai Nauliangaahe, “Ane pandirina ara hambua kadatua, hai tauna bosa i lalu kadatua iti mosisala liliuhe hai mombeewa, kadatua iti bara ina mantaha. Ane tauna hamboea ba tauna hantina paka mosisala, manotomi boea ba potina iti bara ina mantaha.

²⁶Nodo wori i kadatua seta. Ane Datu Tokadake mampopeloho hangka tokadakena, lempona seta moewa hangka setana, alana magero kadatuanda seta iti.

²⁷Niuli mampopelohoNa seta hai kuasa hangko i Beelsebul. Agaiana ara wori rangami au mampopeloho seta. Kuasa apa au rapake rangami iti mampopeloho seta? Manoto kuasana Pue Ala. Mewali, hangko i babehianda rangami iti, tongawami kadana tou lolitami au manguli mampopelohoNa seta mopake kuasana Datu Tokadake.

²⁸MampopelohoNa seta mopake kuasana Inaona Pue Ala. Itimi au mopakanoto kahawenami poparentana Pue Ala i olomi.

²⁹Datu Tokadake peisa rapandiri nodo hadua tauna au maroho. Ane mesuake i lalu souna tauna iti hai mampeinaoke morampaki ihi souna, hangangaa tahilu hampai ampu sou iti, hangko peisari tarampaki anu-anuna. Nodo wori, ane Iko mampopeloho seta, lempona, Kunangimi Datu Tokadake.

³⁰Hema au bara hihimbela hai Iko, iami iwaliNgku. Hema au baraNa motulungi mobago, iami au moewaNa.

³¹Mewali bona niisa: ope-ope dosa hai lolita pesapuaka peisa raampungi. Ane ara tauna au mosapuakaNa Iko Ana Manusia, sala iti peisa mani raampungi. Agaiana ane ara tauna au mosapuaka Inao Malelaha, bara ara ampungiana, maroa tempo ide, maroa i alo pebotusi.”[15]

³²

³³Nauli mbuli Yesu i toParisi, “Ane kau au maroa, maroa wori wuana. Ane kau au bara maroa, bara wori maroa wuana. Kamaroana kau ba kadana, taisa i wuana.

³⁴Ikamu tauna au kadake! Bara mpuukau peisa mohowara lolita au maroa anti kakadakena lalumi. Lawi apa au ara i lalunta, iti wori au mesuwu i humenta.

³⁵Tauna au maroa, batenda mohowara apa au maroa, lawi lalunda buke roa. Tauna au kadake, batenda mohowara apa au kadake, lawi lalunda buke dake.

³⁶Mewali bona niisa: i alo pebotusi i kahopoa dunia, ope-ope tauna hangangaa mopangaku ope-ope lolitanda. Kehapiri lolita au bara mobundu, hangangaa rapangaku.

³⁷Lawi hangko i lolitamu haduduamu, ina rabotusi kamasalamu ba kamanotomu.”

³⁸Roo indo, bahangkia guru agama hai toParisi mouliangaahe Yesu, “Guru, kipeinao moita tanda kuasa au Nubabehi bona kiisa kahangko i Pue Alana mpuuKo.”

³⁹Nauli Yesu, “Kadake mpuukau! Mosapuaka liliukau Pue Ala! Niperapi bona Kupopaitaakau tanda kuasa. Agaiana bara ara tanda kuasa au ina rapopaitaakau. Au ina rapopaitaakau, batena pea tanda nodo au mewali i nabi Yunu hangkoia.

⁴⁰Nodo nabi Yunu talu alona talu wengina i lalu tai bau au mahile, nodo wori Iko Ana Manusia ina talu alona talu wengina i lalu talumba.

⁴¹I alo pebotusi i kahopoa dunia, ampu boea Niniwe ina rapatuwo hule hihimbela hai ikamu au tuwo ide-ide, hai ihira ina motudungiakau salami, lawi menosomohe hangko i dosanda i pohadinda lolitana nabi Yunu. Agaiana ide-ide arami i olomi au meliu kamahilena tuwoNa pane nabi Yunu, hai bara nipoinalai lolitaNa.

⁴²Nodo wori i alo pebotusi i kahopoa dunia, datu towawine hangko ntanda i Lau ina rapatuwo hule hihimbela hai ikamu au tuwo ide-ide, hai ia ina motudungiakau salami. Lawi datu towawine iti hawe hangko i tampona au karao mampeinao mampehadingi lolitana Datu Salomo au matopa. Ide-ide arami i olomi au meliu kamahilena tuwoNa hangko i Salomo, agaiana bara nipoinalai lolitaNa.”

⁴³“Tauna kadake au tuwo tempo ide peisa rapandiri nodo hadua tauna au napesuangi seta. Padumi seta hangko i tauna iti, hai molulumao i pada wungi mohaoki paidaana. Anti kadana ara nalambi,

⁴⁴ido hai nauli: ‘Agina mesule peana lao i paidaa au kupalehi hangkoia.’ Mesule mpuumi lao i tauna au napalehi hangkoia, naita bara ara au mampaidai. Tauna iti nodo mpuu sou boa, au tekawohi malelaha hai tekadipura maroa.

⁴⁵Ido hai laomi mokakio pitu hangka setana au meliu kakadakenda hangko iria. Lao mpuumohe mesua i tauna au napalehi hangkoia, hai maidamohe inditi. Kahopoana, tetambaimi kakadakena tauna iti hangko i nguru-nguruna. Nodomi pewalina i tauna au kadake i tempo ide.”[16]

⁴⁶Tangana mani Yesu mololita hai tauna bosa, hawehe inaNa hai adiNa. Meangkamohe i raoa sou mampeinao mololita hai Ia.

⁴⁷Hadua tauna mouliangaa Yesu, “Guru, inaMu hai halaluMu arahe i raoa mampeinao mampohidupaaKo.”

⁴⁸Nahanai Yesu, “Hema inaNgku? Hema halaluNgku?”

⁴⁹Roo indo, Yesu motudohe ope-ope tauna au meula Iria, Nauli, “Idemohe, inaNgku hai halaluNgku.

⁵⁰Lawi hema-hema au mobabehi peundeana UmaNgku au ara i suruga, ihirami halaluNgku hai ihirami inaNgku.”