Read Napu Matiu 13 Bible Online

Matiu 13 - Napu bible

Matiu 13

¹I alo iti wori, padumi Yesu hangko i sou, lao mohuda i wiwi rano.

²Bosa mpuu tauna teruhu motoleliki, ido hai laomi mesawi i duanga hai mohuda i laluna. Tauna bosa meangkahe i wiwi rano.

³Roo indo, Yesu mopahaweahe ngkaia pakana paturo i lalu ngkora pandiri, Nauli, “Ara hadua tauna au lao mohawu.

⁴I pohawuna iti, ara tinuda au manawo i rara. Hawehe tadasi, motilo tinuda iti duuna ope.

⁵Ara wori tinuda au manawo i tampo au mowatu-watu, haodi pea tampona. Tinuda iti holiga mpuu tuwo, lawi manipi tampona.

⁶Ane kealo, malau duuna bangi, lawi bara kaladu uakana.

⁷Ara wori tinuda au manawo i lalu dui. Dui mobalungkuhi tinuda iti, alana mate.

⁸Ara wori tinuda au manawo i tampo au marudu. Tinuda iti mowua, ara au hangatu belana hangko i tinudana, ara au ini pulona belana, hai ara au talu pulona belana.”

⁹Roo mopahawe ngkora pandiri iti, Nauliangaamohe, “Hema au motalinga, nipehadingi maroa!”

¹⁰Maimohe topeguruna Yesu Iria, hai mekunehe, rauli, “Guru, apa tunggaiaMu mopake ngkora pandiri ane mopaturoKo tauna bosa?”

¹¹Nahanai Yesu, “Hangkoia, tewuniangi mani paturo kana i poparentana Pue Ala. Ide-ide Naweikau Pue Ala pekiri bona niisa lempona paturo iti. Agaiana ane tauna bosa, barahe Nawei pekiri molempo paturo iti.

¹²Tauna au mampoinalai Ngkorana Pue Ala, rapakanoto lalunda bona katetetambaia au ara irihira. Agaiana tauna au barahe mampoinalai Ngkorana Pue Ala, nauri arami haodi au raisa, hangangaa raala hule.

¹³Idomi hai Kupake ngkora pandiri ane mololitaNa i tauna bosa, lawi meitatohe agaiana bara raisa lempona apa au raita. Mehaditohe agaiana bara raisa tunggaiana apa au rahadi.

¹⁴Ido hai tepabukeimi Ngkorana Pue Ala au napahawe nabi Yesaya hangkoia au manguli node: ‘Meitatohe, agaiana bara raisa apa au mewali. Mehaditohe, agaiana bara raisa lempona.

¹⁵Tauna ide matuami lalunda, talinganda mewalimi bongo hai matanda rapidika, lawi lohehe metotoki bona raita, lohehe motaa talinganda dati rahadi, lohehe rapamanoto lalunda. Kahopoana barahe ina mesule Iriko hai barahe ina Kuwei katuwo maroa.’ ”

¹⁶Napaliliumi Yesu lolitaNa i topeguruNa, Nauli, “Agaiana ikamu, morasi mpuukau, lawi niitami apa au Kubabehi hai nihadimi paturoNgku, hai niisa lempona.

¹⁷Tou mpuu au Kuuliangaakau: hangkoia arahe bosa nabi hai tauna au manoto au mampeinaohe moita apa au niitami, agaiana bara raita. Mampeinao mpuuhe mampehadingi apa au nihadi, agaiana bara rahadi.”

¹⁸“Pehadingi, Kuuliangaakau apa lempona ngkora pandiri topohawu iti.

¹⁹Tinuda au manawo i tanga rara lempona tauna au mampehadingi mpuu bambari kana i poparentana Pue Ala, agaiana barahe moisa lempona. Hawemi Datu Tokadake morampaki ngkora iti hangko i lalunda.

²⁰Tinuda au manawo i tampo au mowatu-watu lempona tauna mampehadingi au Ngkora Marasa, hai tou-tou matana lalunda mohadi.

²¹Agaiana bara kaladu pouakana Ngkorana Pue Ala i lalunda, ido hai barahe mantaha. Ane rapopeahi-ahihe ba rapamaparihe anti pepoinalainda i Ngkorana Pue, mousulihe hai barapohe mepoinalai.

²²Tinuda au manawo i olo dui lempona, tauna au mampehadingi Ngkorana Pue Ala, agaiana mopailalu liliu peahe katuwonda i lalu dunia, hai mampeinao peahe morampu anu-anu dunia. Ido hai barapi ara paidaa Ngkorana Pue Ala i lalunda, hai barapi mobundu Ngkora iti i lalu katuwonda.

²³Tinuda au manawo i tampo au marudu lempona, tauna au mampehadingi hai mopailalu Ngkorana Pue Ala. I tauna iti, Ngkorana Pue Ala mowua. Ara au mowua hangatu belana hangko i tinudana, ara au mowua ini pulona belana hangko i tinudana, hai ara au mowua talu pulona belana hangko i tinudana.”

²⁴Napahawe mbuli Yesu hampaka ngkora pandiri i tauna bosa, Nauli, “Poparentana Pue Ala nodo ngkora pandiri ide: hadua topobonde lao mohawu tinuda au maroa i bondena.

²⁵I laembengi tangana tauna leta, hawemi iwalina topobonde iti mohawuka wua dana au ina himbela hai pare i bonde iti, hai roo indo, ia padu.

²⁶Tuwo mpuumi pare iti duuna mowua, tuwo worimi dana i olo pare.

²⁷Hawemohe topobagona mouliangaa ampu bonde iti, ‘Tua, bara pae tinuda au maroa au tahawuka? Hangko iumbari mai dana iti tuwo?’

²⁸Nahanai ampu bonde iti, ‘Iti bagona iwalinta.’ Hangko indo, rauli mbuli topobondena, ‘Ane nuunde, aginami lao kiwuka dana au ara iti!’

²⁹Nahanai ampu bonde, ‘Inee, lawi ane niwuka danana, ina tewuka wori parena.

³⁰Pogiangaa peami dana tuwo hihimbela hai pare, duuna tempota mepare. I tempo iti, ina kutuduhe topepare mowuka hampai dana, ragulu, raboke hai rahuwe. Roo indo, hangko raguluri pare, hai rawoli i lalu tambaru’.”

³¹Roo indo, Yesu mopahawe mbuli hampaka ngkora pandiri i tauna bosa, Nauli, “Poparentana Pue Ala nodo lihu hahawi i lalu ngkora pandiri ide: ara haogu lihu hahawi au naala hadua tauna, hai nahawuka i bondena.

³²Lihu hahawi iti manete mpuu, agaiana ane tuwo, meliumi kamapangkana pane halo-halo au ntanina. Tuwo nodo kau hangkau, alanda hawe tadasi mobabehi haranda i daana.”

³³Ara wori hampaka ngkora pandiri au Napahawe i tauna bosa, Nauli, “Poparentana Pue Ala nodo ragi au naala hadua towawine, hai nagalo tapu. Nauri ragi iti haodi pea peisa mampopembongke tapu au ngkaia[17].”

³⁴I lalu ope-ope pepaturoNa i tauna bosa, Yesu mopake ngkora pandiri. Bara ara au Napaturoahe ane bara hai ngkora pandiri.

³⁵Mewali, tepabukeimi lolita ide au nauki hadua nabi hangkoia: “Ina mololitana hai ngkora pandiri. Ina mopahawena tatangkulera au tewuniangi hungka i pewalina dunia.”

³⁶Roo indo, Yesu mopalehi tauna bosa iti, hai mesua i lalu sou. Maimohe topeguruNa mohungkuki, rauli, “Guru, Nuuliangaangkai lempona ngkora pandiri dana au i olo pare.”

³⁷Nahanai Yesu, “Ampu bonde au mohawu tinuda au maroa lempona, Ikomi, Ana Manusia.

³⁸Bonde lempona, dunia ide. Tinuda au maroa lempona, tauna au mengkoru i Pue Ala bona mewalihe anaNa i lalu poparentaNa. Dana lempona, tauna au meula i Datu Tokadake.

³⁹Iwali au mohawu dana, iami Datu Tokadake. Tempo pepare, lempona alo pebotusi i kahopoa dunia. Hai topepare, lempona malaeka.

⁴⁰Nodo dana ragulu hai rahuwe, nodo wori tauna au kadake ina rahuku i alo pebotusi.

⁴¹Iko Ana Manusia ina motudu malaekaNgku lao morampu ope-ope au mepakanawo hai tauna au mobabehi dake hangko i olonda taunaNgku.

⁴²Ope-ope tauna iti ina ratendehe i lalu api au lolaa. Inditi, ina moteria hai mantodiha liliuhe.

⁴³Agaiana tauna au manoto babehianda, ina mewangkahe nodo alo, i lalu poparentana Pue Ala Umanda. Hema au motalinga, pehadingi maroa!”

⁴⁴Nauli Yesu, “Ane hadua tauna mengkoru i Pue Ala au moparenta i poparentaNa, ia nodo tauna i lalu ngkora pandiri ide: ara hadua tauna au molambi bulawa au tetawu i lalu tampo, hai liliu natawu hule. Anti kamatanana laluna, laomi i souna mampobalu ope-ope anu-anuna, napopoholo tampo polambiana bulawa iti.

⁴⁵Nodo wori, ane ara hadua tauna au mengkoru i Pue Ala au moparenta i poparentaNa, ia nodo tauna i lalu ngkora pandiri ide: ara hadua topobalu-balu au mohaoki mutiara.

⁴⁶Kanalambina haogu mutiara au masuli mpuu holona, liliu mampobalu ope-ope anu-anuna, napopoholo mutiara iti.”

⁴⁷“I alo pebotusi i kahopoa dunia, poparentana Pue Ala nodo ngkora pandiri ide: hambua dala au mahile ratende topebau i lalu rano. Ngkaia pakana bau mesua i lalu dala iti.

⁴⁸Bukemi, dalanda radii lao i lore, hai mohudamohe mampilei bau iti. Au maroa rapopesua i pamboliana, au bara maroa ratende.

⁴⁹Nodo wori i alo pebotusi i kahopoa dunia: malaeka ina laohe mopatani tauna au kadake hai tauna au manoto.

⁵⁰Tauna au kadake ina ratende i lalu api naraka. Ihira ina moteria hai mantodiha liliuhe.”

⁵¹Roo indo, Yesu mekune i topeguruNa, Nauli, “Ba niisa lempona ngkora pandiri inona?” Rahanai, “Kiisato.”

⁵²Hangko inditi, Nauliangaa mbulihe, “Ane nodo, ara mbuli hampaka ngkora pandiriKu: ane ara hadua guru agama to Yahudi au meula Iriko hai au rapaguru paturo kana i poparentana Pue Ala, guru agama iti peisa rapandiri nodo ampu sou au ara anu-anuna au hae hai ara wori anu-anuna au wou.”[18]

⁵³Karoona Yesu mopahawe ope-ope ngkora pandiri, padumi hangko inditi,

⁵⁴lao i boea karapakahileaNa. Inditi, Ia mepaturo i lalu sou penombaa. Tingkaramohe tauna au mampehadingi lolitaNa, rauli, “Hemari au mopaturo pane nodo kamapandeNa? Hai hangko iumba mai kuasaNa mobabehi tanda kuasa?

⁵⁵Bara pae Ia ana basi pea? Bara pae Maria inaNa? Bara pae HalaluNahe, Yakobu, Yusupu, Simo hai Yudasi?

⁵⁶Hai bara pae halaluNa towawine, ara worihe hihimbela hai ikita inde? Moapari hai ara kuasaNa mobabehi ope-ope iti?”

⁵⁷Ido hai lohehe mepoinalai i Yesu. Hangko inditi, nauliangaahe Yesu, “Hadua nabi ina rabila iumba kalaoana. Agaiana i boeana haduduana hai i souna, bara rabila.”

⁵⁸Idomi hai Yesu bara mobabehi ngkaia tanda kuasa inditi, lawi barahe mepoinalai Iria.