Read Napu Matiu 15 Bible Online

Matiu 15 - Napu bible

Matiu 15

¹Hambela tempo, arahe toParisi hai guru agama Yahudi au hangko i Yerusale laohe mampohidupaa Yesu, rauli,

²“Moapari hai topeguruMu moliungihe adanda toiorunta? Ane maandehe, barahe hampai memando moula aturanta.”

³Nahanaihe Yesu, “Moapari hai niliungi parentana Pue Ala i kamampeulaimi adanda toiorumi?

⁴Lawi nauli Pue Ala, ‘Bila umamu hai inamu.’ Hai Nauli mbuli, ‘Hema au motunda-tunda umana ba inana hangangaa rapapate.’

⁵Agaiana ikamu mepaturo node: barapi paraluu tabila umanta hai inanta ane tauliangaahe node, ‘Apa au hangangaa kuweikau, kupopenombami i Pue Ala.’ Mewali, Ngkorana Pue Ala au manguli bila umamu hai inamu, barari nipeulai. Ada toiorumiri au nipomahile.

⁷I raoana pea peulami i Pue Ala! Tou mpuu lolitana nabi Yesaya hangkoia au mololita kana irikamu node:

⁸Nauli Pue Ala: ‘Tauna iti, i humenda pea mobilaNa, agaiana lalunda karao hangko Iriko.

⁹Bara mobundu penombanda Iriko, lawi paturonda hangko i manusia pea, bara paturo hangko Iriko.’ ”

¹⁰Roo indo, Yesu mokakiomohe tauna bosa, pane Napahaweahe ngkora pandiri ide, Nauli, “Nipehadingi bona niisa.

¹¹Paande au mesua i nganganta, bara iti au mopakedaike i peitana Pue Ala. Lolita au mesuwu hangko i humenta, iti au mopakedaike i peitana Pue Ala.”

¹²Hangko inditi, maimohe topeguruNa, mouliangaa, “Bara pae Nuisa kakoina inaonda toParisi mohadi lolitaMu inona?”

¹³Nahanai Yesu, “Pogiangaamohe toParisi iti padu! Ihira nodohe tuda-tuda au bara natuda UmaNgku au ara i suruga, hai batenda rawuka. Toparisi iti nodohe tadulako au bilo, lawi barahe moisa rara au manoto lao i Pue Ala. Hai ane hadua tobilo monini hangka tobilona, batena ina manawohe rorodua i kalolu.”

¹⁵Nauli Peturu, “Guru, Nupakanotoangkai ngkora pandiri au Nupahawe inona.”

¹⁶Mehana Yesu, Nauli, “Bara pae niisa lempona?

¹⁷Paande au mesua i lalu nganganta liliu mesua i lalu tainta, hai hangko inditi tatende. Bara iti au mopakedaike i peitana Pue Ala.

¹⁸Agaiana lolitanta au kedai au hangko i lalunta hai mesuwu i humenta, itimi au mopakedaike i peitana Pue Ala.

¹⁹Lawi hangko i lalunta mesupa hinangkana pekiri au kadake, alana ara au mepapate, mebualosi, metie, manangka, mosabi dongko hai mengkora-ngkora.

²⁰Babehia au nodo iti au mopakedaike i peitana Pue Ala. Ane maande hai bara hampai memando, bara iti au mopakedaike i peitana Pue Ala.”

²¹Hangko indo, laomi Yesu i tampo au hungku i wanua Tirus hai Sidon.

²²Inditi, ara hadua towawine to Kanaa, au bara to Yahudi. Towawine iti mai i Yesu, hai meraroa, nauli, “Pue, pemuleana Datu Daudi! Pokaahi wongkoia! Anangku towawine napesuangi tokadake, rumihi kamahaina.”

²³Agaiana Yesu bara mehana. Maihe topeguruNa mohungkuki, rauli, “Guru, Nutudumi padu towawine iti, lawi paka monganga-nganga meula irikita.”

²⁴Nauli Yesu i towawine iti, “Pue Ala motuduNa mai motulungi pemuleana pea to Isaraeli, lawi ihira nodo dimba au puha.”

²⁵Agaiana mai pea towawine iti molingkudu motumpa i lindona Yesu, nauli, “Pue, tulungi wongkoia!”

²⁶Nahanai Yesu, Nauli, “Bara maroa moala paande anangkoi hai rawei dike.”[19]

²⁷Mehana towawine iti, nauli, “Tou, Pue, agaiana dike moande wori wuta au manawo hangko i wongko meja paandeana ampuna.”

²⁸Hangko inditi, nauli Yesu, “Mahile mpuu pepoinalaimu! Ina mewali nodo peundeamu.” Tempo iti peami, maoha mpuu anana.

²⁹Roo indo, padu worimi Yesu hangko inditi, molumao metalinti i wiwi rano Galilea. Mempanai lao i tongku-tongkuna, hai mohuda mepaturo.

³⁰Mokoloromohe tauna bosa monontohi Ia, moantihe au palu, au bara masilolonga watanda, au bilo, au bara peisa mololita hai tomahai au ntanina. Rawolihe i lindona Yesu, hai Napakaohahe.

³¹Tingkaramohe tauna bosa moita ope-ope tauna au napakaoha Yesu: tauna au bara peisa mololita, mololitamohe, au bara masilolonga watanda, maroa hulemi watanda, au palu molumaomohe, au bilo meitamohe. Ido hai tauna iti mampomahile Pue Ala au rapenombai to Yahudi.

³²Roo indo, Yesu mokakio topeguruNa, Nauliangaahe, “Maahi laluNgku moitahe tauna au bosa ide. Talumi alonda inde, bara ara paandenda. Bara turu inaoNgku motuduhe mesule i lalu kamariminda, laloarahe pae deade i rara.”

³³Rauli topeguruNa, “Hangko iumba ina tahumba paande au ina tapopopaandehe tauna hanode kabosanda, lawi paidaa ide boa?”

³⁴Yesu mekune irihira, “Hangkia oguna roti au ara irikamu?” Rahanai, “Pitu oguna, hai bahangkia pea baana ikane kokoi.”

³⁵Hangko inditi, Natudumohe tauna bosa mohuda i tampo.

³⁶Naalami roti au pitu oguna hai ikane kokoi au bahangkia baana iti, hai mekakae i Pue Ala. Roo indo, Ia mobise-bisemi roti hai ikane hai Naweihe topeguruNa bona rakira-kiraahe tauna bosa.

³⁷Maandemohe ope-ope duunda mabuhu. Karoonda maande, topeguruNa morampu pentarana, pitu bingkana.

³⁸Kabosanda au maande i tempo iti, iba sabuna tobalilo, bara teimba towawine hai anangkoi.

³⁹Roo indo, Natudumohe mesule lao i sounda, hai mesawimi i duanga lao i tampo Magadan.