Read Napu Matiu 17 Bible Online

Matiu 17 - Napu bible

Matiu 17

¹Ini alona hangko inditi, Yesu moanti talu topeguruNa mempanai lao i wongko bulu au mapangka. TopeguruNa au talu iti iami: Peturu, Yakobu hai Yohane adina Yakobu. Ihira pea au ara inditi.

²Temponda ara inditi, mobalimi lenggena Yesu. LindoNa mewangka nodo alo, hai hampiNa mengkila-ngkila.

³Unga peahe topeguruNa moita rodua nabi au mololita hihimbela hai Yesu. Nabi au rodua iti iami: Musa hai Elia.

⁴Hangko inditi, Peturu mouliangaa Yesu, “Pue, maroa mpuu ane maidake inde. Ane Nuunde Pue, kubabehi talu oguna bambaru inde: haogu Irio Pue, haogu i Musa hai haogu wori i Elia.”

⁵Tangana mani Peturu mololita, unga pea hawe gawu au mewangka mobalungkuhihe, hai hangko i lalu gawu iti mohadihe hambua wotu au manguli, “Idemi AnaNgku au Kupokakaia hai au Kupokatana. Nipehadingi lolitaNa!”

⁶Karahadina topeguruNa wotu iti, madampamohe lawi rumihi kalanganda.

⁷Agaiana laohe nahungkuki Yesu hai Napetobohe, pane Nauliangaahe, “Pearo, ineekau langa!”

⁸Metotokimohe agaiana apa au ara inona barapi raita, batena pearai Yesu.

⁹Pendaulunda hangko i wongko bulu iti, Nauliangaahe Yesu “Inee hampai niuli-uli i hema pea apa au niita inona hangko damani Iko, Ana Manusia rapatuwo hule hangko i kapate.”

¹⁰Mekunemohe topeguruNa, rauli, “Wulingkai. Moapari hai rauli guru agama, nabi Elia hangangaa hawe ioru, hangko haweri Datu Topehompo?”

¹¹Nahanai Yesu, “Tou, Elia hangangaa hawe ioru, lawi ia au mopasilolonga hinangkana.

¹²Agaiana Kuuliangaakau, hawemi Elia, agaiana bara raisa tadulako boeanta. Ia rapopeahi-ahi moula peundeanda. Nodo wori Iko, Ana Manusia ina rapopeahi-ahi moula peundeanda.”

¹³I tempo itimi, hangko raisari topeguruNa lempona lolitana Yesu inona: au rapandiri nodo nabi Elia, iami Yohane Toperiu.

¹⁴I pesulenda Yesu hai topeguruNa au talu iti, mampohidupaahe tauna bosa, hai ara hadua tobalilo au mai molingkudu i lindoNa, nauli,

¹⁵“Pue, Nupokaahi woia anangku. Mohaki dungka, hai doko malimpu ane hawe hakina. Bosa belana madungka i lalu api ba i lalu owai.

¹⁶Kuantimi i topeguruMu, agaiana bara rabuku mopakaoha.”

¹⁷Nauli Yesu i tauna bosa hai i topeguruNa, “Noumbarikau dide? Moapari pane bara mani maroho pepoinalaimi? Nisapuaka mani peundeana Pue Ala! Hangkia maniri kamahaena ina hihimbelaNa hai ikamu? Hangkia maniri kamahaena hangangaa Kusabarai peewami? Anti mai anangkoi iti!”

¹⁸Hangko inditi, Yesu mokambaroa seta au mopakasusa anangkoi iti. Moloho mpuumi seta iti. Pelohona seta iti, maoha mpuumi anangkoi iti.

¹⁹Roo indo, i tempona Yesu haduduana, maimohe topeguruna mekune Iria, “Guru, moapari hai bara kibuku mampopeloho seta iti?”

²⁰Nahanaihe Yesu, “Nodomi, lawi makura mani pepoinalaimi. Tou mpuu au Kuuliangaakau ide: ane arami pepoinalaimi nauri kokoi pea nodo lihu hahawi, ope-ope peisa mewali. Peisakau mouliangaa bulu iti: ‘Melimbako hangko inditi!’ hai batena melimba.

²¹[Agaiana seta au kadake iti, peisa pea rapopeloho ane mekakaeke hai mopuasake.]”

²²I tempona Yesu hai topeguruNa teruhu i Galilea, Yesu mouliangaahe, “Iko Ana Manusia, ina rahuhuNa i kuasa manusia.

²³Ina rapapateNa, agaiana i alo katalu ina tuwo huleNa.” Indo, masusa ntepuumi lalunda topeguruNa.

²⁴Kahawena Yesu hai topeguruNa i wanua Kapernaum, hawemohe tauna au mampesingarai asele Souna Pue Ala i Peturu hai mekune, “Noumba gurumu ba mobaiari wori asele Souna Pue Ala, ba bara?”

²⁵Nahanai Peturu, “Nabaiari!” Hangko inditi, mesulemi Simo Peturu lao i sou paidaanda. Kahawena, bara mani tepaka mololita, iorumi Yesu mekune, “Simo, noumba pelambiamu: hema au hangangaa mobaiari asele i datu au mokamumu tampo ntanina? Ba taunana haduduana, ba tauna i tampo au nakamumu?”

²⁶Nahanai Peturu, “Manoto tauna au maida i tampo au nakamumu.” Nauli Yesu, “Ane nodo, taunana haduduana bara paraluu mobaiari. Nodo wori ikita au mewali taunana Pue Ala, barake hangangaa mobaiari asele Souna Pue Ala.

²⁷Agaiana nauri nodo, agintami mobaiari bona dati koi inaonda irikita. Mewali, laomoko mopeka i rano. Nualami ikane au nguru-nguruna nupeka. Ina nuhumba doi i lalu ngangana sukana handa tapopobaiari aselenta rodua. Ala doi iti, hai nupopobaiari asele Souna Pue Ala.”